Ƀă tơdroăng ki kơchăng, nhên ƀă pôu râng dêi hnoăng cheăng, a Hneăng hôp má 6, Kuô̆k hô̆i pơkâ pơtê rôh tơbleăng tơdroăng tơkêa Luât Tơnêi tơníu ki ‘mâi hơ’lêh vâ mơnhên tối nhên mâu tơdroăng ki tro tơdjâk ‘na troăng hơlâ tŏng kum, rak vế tơniăn mâu luât drêng châ pơkâ athế pêi pro châ tiô tơdroăng ki rơhêng vâ dêi tơdroăng rêh ối, malối cho ôh tá ăm ai tơdroăng ki ôh tá tơniăn, ôh tá tơdrăng ƀă mâu luât ki ê. Tơdroăng kố châ xo mâu tơdroăng môi tuăn dêi Khu kăn Kuô̆k hô̆i. Laga, Phạm Văn Hòa, ngế ki lo ing Đồng Tháp tối tiah kố, tơdroăng ki pro ton, tá hâi tơbleăng Luât Tơnêi tơníu kô pro pá ăm kuăn pơlê:

 "Tá hâi tơbleăng kơxop hlá mơ-éa Luât tơnêi tơníu ki ‘mâi hơ’lêh á tơmiât tiah kố gá kal khât. Laga, Luât tơnêi tơníu athế tơbleăng tung hơnăm kố lơ apoăng hơnăm la ngiâ pôi tá lôi ton. Lôi ton troh lâi cho ôh tá tơniăn tung Luât tơnêi tơníu xuân ối xơpá, bro kuăn pơlê hêng hôu. Tâng Luât tơnêi tơníu tá hâi châ tơbleăng mê athế  ai mâu rôh hôp ki ôh tá tối hdrối mơ’nui hơnăm lơ apoăng hơnăm 2024”.

Troh mơ’nui khế 12/2023, kơxop hlá mơ-éa Luât tơnêi tơníu ki ‘mâi hơ’lêh hiăng séa ngăn nhên 232/265 tơdroăng. Klêi kơ’nâi séa ngăn, ối 35 khu tơdroăng, tơdroăng châ mâu kơ koan hiăng môi tuăn pơtối ‘mâi hơ’lêh, ‘mot tơ’nôm. Vi ƀan cheăng kâ dêi Kuô̆k hô̆i tối tiah kố, tâng ai tơkŭm po Hneăng hôp Kuô̆k hô̆i ôh tá tối hdrối a khế 1 hơnăm 2024, ƀă hên hĭn tơdroăng cheăng, hâi khế ôh tá pơkâ thế tơdrêng, tơdroăng ki pơtroh Kuô̆k hô̆i têk kŏng tơbleăng cho tơdroăng ki pơloăng mơnúa.

Nôkố ai 3 tơdroăng ki châ pơtối tối tơbleăng ăm Vi ƀan pơkuâ Kuô̆k hô̆i pơkâ thế Chin phuh pro nhên tâ tơdroăng, ai rơkong tơpui tối păng ‘nâng ƀă chêh pro nhên túa pơkâ: ‘na mâu ngế ki châ xúa tơnêi gâk kring pơlê pơla tơkŭm ƀă tơdroăng pêi cheăng kâ, mơjiâng tơdroăng cheăng kâ; ‘na hnoăng ƀă tơdroăng pêi dêi khu mơdró kâ khu lêng, kŏng an drêng xúa tơnêi pơlê pơla cheăm bêng gâk kring tơrŭm ƀă tơdroăng pêi cheăng kâ mơjiâng cheăng kâ; ‘na tơdroăng túa pơkâ yă tơnêi ƀă mâu ngế ki xúa, tơdroăng ki xúa rêm túa pơkâ.

Kăn xiâm hnê ngăn Kuô̆k hô̆i Vương Đình Huệ mơnhên tối kơxop hlá mơéa Luât tơnêi tơníu ki ‘mâi hơ’lêh gá kal khât. Xua mê, tơdroăng ki ‘mâi hơ’lêh, ‘mot tơ’nôm tơdroăng tơkêa kố luât kố hiăng luâ 3 hneăng hôp la xuân ối ai hên tơdroăng ki pơtối châ tơmiât nhên. Kăn xiâm hnê ngăn Kuô̆k hô̆i pơkâ thế séa ngăn mâu túa tơmiât ƀă túa pơkâ mơjiâng luât. Tung mâu tơdroăng ki kân, bu ối tơpui tơno ‘na 3 tơdroăng ki kân ƀă mâu tơdroăng ki ê. Tiah mê, hiăng ai tơdroăng chiâng vâ pêi pro troh tơdroăng ki pơtroh ăm Kuô̆k hô̆i tơbleăng kơxop hlá mơéa Luât Tơnêi tơníu ki ‘mâi hơ’lêh tung Hneăng hôp ki ôh tá tối hdrối rôh má 5:

“Ôh tá pơtê tơbleăng Luât tơnêi tơníu ki ‘mâi hơ’lêh xếo. Xua Pơkâ 18 tối nhên athế pêi klêi Luât tơnêi tơníu tung hơnăm kố. Tâng ối lôi troh Hneăng hôp má 7 mê ôh ti ai to 2 luât ki kố xo ôh. Ki Hneăng hôp má 7 tiô tối hdrối tơbleăng 9 luât. Tâng akop tơ’nôm péa Luât kố vâ chiâng 11 tơdroăng tơkêa luât mê ối ai hên tơdroăng nếo”.

Tiô tối hdrối, hneăng hôp ki ôh tá tối hdrối má 5 dêi Kuô̆k hô̆i hneăng 15 kô hôp 3 hâi, pơxiâm po a hâi lơ 15/1/2024 la ngiâ séa ngăn mâu tơdroăng ki kal, vâ pêi pro châ tiô tơdroăng ki rơhêng vâ mơnhông tơnêi têa, tung mê ai kơxop hlá mơéa Luât Tơnêi tơníu ki ‘mâi hơ’lêh.