Rơpŏng jâ Võ Thị Ngọc Nhị cho môi tung mâu rơpŏng ki má môi dêi cheăm An Bình ôh tá ai tơxiăn tung rơpŏng, jâ poâ rêh ối lĕm, kuăn cháu nguăn. Jâ Nhị châ tŏng kum tá hiâm mơno dêi kơnốu xua mê ai chôu veăng tơdroăng cheăng vâi kơdrâi a cheăm, veăng kum rơtế vâi kơdrâi cheăm An Bình rak ngăn ăm nâ o vâi kơdrâi tung cheăm. Jâ Võ Thị Ngọc Nhị tối ăm ‘nâi:

“Hngêi á mê kơnốu tơpui mê kơdrâi tơmâng, kơdrâi tơpui mê kơnốu tơmâng, nôu pâ tơpui kuăn ‘nĕng tơmâng, kuăn ‘nĕng nguăn. Drêng lo tung tơdroăng rêh ối mâu kuăn xuân hlo mâu rơpŏng ki ê ôh tá hơniâp môi tiah rơpŏng dêi tơná. Rơpŏng pin hơniâp mê kuăn pơlê tung kơtâu xuân kheăn kơdeăn pin, xuân hâk tơngăm ƀă vâi ê. Drêng lâi á ối a hngêi mê á pêi, pêi viâ tâi tâng. Ƀă drêng lâi á thế lăm hôp mê tối ăm dêi kơnốu mê kơnốu á xuân pêi pế hmê kơchâi kâ ăm kăn ‘nĕng’’.

Môi tiah rơpŏng jâ Trần Thị Sạn ối a cheăm An Bình. Rơpŏng jâ rêh ối ƀă tơdroăng cheăng pêt plâi ối. Jâ veăng tôh vâi kơdrâi ôh tá ai tơxiăn tung rơpŏng sap ing mơjiâng troh nôkố. Jâ Sạn pakĭng rak tơniăn tung rơpŏng ối hnê kuăn cháu nguăn pâ ƀă jâ pôa, nôu pâ, ai tơrŭm ƀă nhŏng o, pơlê pơla, tơdrêng amê pơtâng tối, mơhnhôk mâu nâ o tung chi hô̆i rơtế pêi pro vâ mơjiâng rơpŏng ôh tá ai tơxiăn pâm, rêh ối phiu ro, hơniâp lĕm:

“Tung rơpŏng á, á thế hnê kuăn cháu, kơnốu kuăn ‘nĕng dêi tơná ôh tá ai tơdroăng tơxiăn tung rơpŏng mê drêng lo pakong pêi cheăng nếo mơhnhôk nâ o khu pơkuâ vâi kơdrâi. Á xuân pơtâng tối ôh tá tơxiăn tung rơpŏng. Nâ o vâi kơdrâi thế rŭm ƀă pôi tá lôi kơnốu ai tơdroăng tơxiăn tung rơpŏng’’.

Troăng pêi ‘’Tôh vâi kơdrâi ôh tá ai tơxiăn tung rơpŏng’’ a tôh 8, kơtâu Thanh Bình, cheăm An Bình, tơring Châu Thành ai 21 ngế. Tung 8 hơnăm hiăng hluâ, troăng pêi châ tơƀrê. Apoăng tung tôh ai 3 roh ai tơxiăn tung rơpŏng laga nâ o ôh tá loi tơngah dêi tơná, kơxiâp ôh tá khên tối rak xêh tung hiâm mơno. Klêi kơ’nâi troăng pêi châ mơjiâng, ing tơdroăng tơkŭm tơpui tơno đi đo nâ o hiăng hlê plĕng hên tâ tung tơleăng mâu tơdroăng tơxiăn tung rơpŏng, môi tiah: tối tơno ƀă mâu nâ o tung tôh, ti tăng troh khu pơkuâ vâi kơdrâi cheăm hnê tối, pơchân tối kơnốu ôh tá pơtối pâm xiăn, kơnôm luât kheăn tối.

Troh nôkố, tôh troăng pêi ‘’Tôh vâi kơdrâi ôh tá ai tơxiăn tung rơpŏng” ôh tá ai xếo ngế ki tro pâm xiăn tung rơpŏng. Ƀă mâu hơnăm achê kố, tơdroăng pâm xiăn tung rơpŏng tung cheăm hiăng kơdroh, ôh tá ai mâu roh pâm xiăn ki râ ó. Jâ Huỳnh Thanh Tuyền, Kăn hnê ngăn Khu pơkuâ vâi kơdrâi cheăm An Bình, tơring Châu Thành, kong pơlê Tây Ninh tối ăm ‘nâi, sap ing mơjiâng troh nôkố, tôh vâi kơdrâi ôh tá ai pâm xiăn tung rơpŏng châ tơmâng tŏng kum tá hiâm mơno dêi mâu khu râ kăn pơkuâ cheăm, xua mê tơdroăng ai pâm xiăn tung rơpŏng châ mơdât, ôh tá ai mâu tơdroăng tơxiăn tung rơpŏng ki râ, kum ăm tơdroăng mơnhông cheăng kâ pơlê pơla, mơdêk tơdroăng rêh ối kế tơmeăm khoăng ƀă hiâm mơno:

“Sap ing mơjiâng hơnăm 2015 troh nôkố, tôh vâi kơdrâi ôh tá ai tơxiăn tung rơpŏng dêi cheăm mâu nâ châ mơdêk hlê plĕng ƀă tơdroăng tơpui kâ khôi túa lĕm tung rơpŏng pơla nôu pâ ƀă kuăn ‘nĕng, jâ pôa, nôu pâ. Ing mê, nâ o ‘nâi xúa tung tơdroăng nôkố, ai troăng tơpui rơkê tâ, trâm mâ ‘nâi pêng, ‘nâi xôp. Pakĭng mê, mâu nâ xuân châ ngế kơnốu môi tuăn, kum tơdroăng cheăng. La ngiâ, tôh troăng pêi ôh tá ai tơxiăn tung rơpŏng kô pêi pro tơ’nôm hên tơdroăng xiâm ƀă troăng pêi nếo môi tiah mơhnhôk nâ o tung tôh veăng tơlo liăn kum dêi pó vâ tŏng kum ăm khu pú tung tôh ai liăn păn mơnăn, tê mơdró kŭn ƀă kơxô̆ liăn sap ing 3 rơtuh troh 5 rơtuh liăn’’.

Tơxiăn tung rơpŏng cho tơdroăng pá kân dêi pơlê pơla, pro tô tuăn ăm kuăn mơngế, lôi hên tơdroăng ôh tá lĕm ăm kuăn mơngế, ƀă ki má lối cho ƀă vâi kơdrâi, vâi hdrêng. Tơdroăng tơxiăn tung rơpŏng a mâu tíu tá hâi hên pơ’lêh ƀă tá hâi tơdroăng pơ’lêh hên, ki má lối cho ƀă kuăn pơlê hdroâng kuăn ngo. Nôkố cho tơdroăng ki rơhêng vâ ‘nâi plĕng dêi pơlê pơla. Xua mê, troăng pêi ‘’Tôh vâi kơdrâi ôh tá ai tơxiăn tung rơpŏng’’ dêi Khu tơrŭm vâi kơdrâi cheăm An Bình, tơring Châu Thành, kong pơlê Tây Ninh châ mơjiâng, vâ kum mơjiâng tơdroăng rêh ối mơhno khôi túa lĕm, chôa ‘lâng mơjiâng rơpŏng hơniâp lĕm./.