Hâi lơ 10/11/2023, Kuô̆k hô̆i hiăng têk kŏng tơbleăng Pơkâ ‘na kơxop hlá mơéa liăn ngân tơnêi têa hơnăm 2024, tiah mê Kuô̆k hô̆i ăm phêp pơtroh liăn ngân tơnêi têa pêi pro 03 tơdroăng pơkâ tơnêi têa hơnăm 2023 ngi hơnăm 2024. Klêi kơ’nâi séa ngăn ăm hlo, tơdroăng ki hrá ‘no liăn, nếo châ 15% (tơ’mô 3.800 rơtal liăn). Tâng ôh tá châ bro ton kơxô̆ liăn pêi pro hơnăm 2023 ngi hơnăm 2024 kô tơdjâk troh tơdroăng ki tah lôi kơxô̆ liăn ăm hơnăm 2023 dâng 16 rơpâu rơtal liăn.

Tơpui a rôh hôp, Kăn xiâm hnê ngăn Kuô̆k hô̆i Vương Đình Huệ tối nhên tơdroăng ki tơkŭm tŏng kum hên ‘na kơxô̆ liăn la athế tro pơkâ, pôi tá pro ôh tá tơniăn ‘na luât ƀă athế mơnhên tối nhên ki tơdjâk dêi liăn ngân. Xuân tung kơxo lơ 15/11, Vi ƀan pơkuâ Kuô̆k hô̆i tơpui tối leăng, tơmâng xo, ‘mâi rơnêu Kơxop hlá mơéa Luât khu ki veăng kring vế, tơniăn a kong pơlê tơring cheăm ƀă ăm rơkong veăng tơpui tối ‘na tơdroăng kơdroh nâp hnoăng liăn mơhá ki kơnâ  mơdêk.