A tơring Čư Kuiñ, Khu lo tŏng veăng kong pơlê Dak Lak nếo tơkŭm po tơdroăng Kơchơ Têt tuăn pâ hơnăm 2024. Tơdroăng tŏng kum hiăng diâp 33 kơxuô tơmeăm ƀă 300 phĭu lăm kơchơ 0 liăn, tâi tâng ki kơnâ lối 233 rơtuh liăn ăm kuăn pơlê ai tơdroăng rêh ối pá puât tung tơring Čư Kuiñ. Mâu tơmeăm 0 liăn mê cho kơƀăn chưng, kơƀăn kĕo, tơmeăm ki kal xúa rêm hâi (têa rơmâ, têa măm, xi yâu, ƀôt ngŏt, xup kơxŏng khăng, phái).

Tung tơdroăng tŏng kum ai mâu tơdroăng pôe xâk tê kơtê, chêh chư thư pháp; tíu kơxuô kơƀăn chưng; tíu xup um tơbâ ƀă mâu tơdroăng xah hêi tiô khôi vâi krâ nah. Nếo châ tơdah kơxuô tơmeăm Têt ing tơdroăng tŏng kum, ngoh Y Gu Ƀyă, ƀuôn Ea Mtah, cheăm Ea Bhôk, tơring Čư Kuiñ tối:

            ‘’Á phiu ro ‘nâng, mơnê mâu ngế ai hiâm mơno tŏng kum hiăng tơkŭm po môi tơdroăng kơnâ ƀă phiu ro ăm mâu ngế ai tơdroăng rêh ối pá puât môi tiah ngin o, kô kum ăm ngin o ai môi Têt hơtôu tâ, phiu ro tâ’’.

Tiô jâ A Yun H’Hương, Kăn hnê ngăn Khu lo tŏng veăng kong pơlê Dak Lak, tơdroăng kơchơ Têt tuăn pâ hơnăm 2024 kô diâp 25 rơpâu kơxuô tơmeăm, tâi tâng kơnâ 17,5 rơtal liăn ăm kuăn pơlê ai tơdroăng rêh ối pá puât tung lâp kong pơlê. Pakĭng 3 tơdroăng tŏng kum a mâu tơring Čư Kuiñ, Čư Mgar ƀă Ea Kar xua Khu lo tŏng veăng kong pơlê tơrŭm ƀă khu râ kăn pơkuâ tơring tơkŭm po, mâu tơring ki ê kô rah xo xêh troăng tơkŭm po tơtro ƀă tơdroăng dêi kong pơlê tơná.

“Ing kơchơ Têt tuăn pâ kố mơnê mâu khu tŏng kum, mâu ngế hiăng tŏng kum ăm tơdroăng kố, xuân pói vâ tung la ngiâ mâu khu tŏng kum ƀă mâu ngế ai hiâm mơno tŏng kum kô pơtối rơtế ƀă Khu lo tŏng veăng vâ pêi pro mâu tơdroăng tŏng kum pơlê pơla rế hía rế lĕm tro tâ, kum ăm kuăn pơlê ai môi Têt tơniăn ro, hơtô ƀă hơniêp lĕm’’.

            Vi ƀan kong pơlê Dak Lak nếo tơbleăng Pơkâ pêi xing xoăng kơxô̆ liăn ƀă diâp kơxuô tơmeăm ăm khu pú hên, ngế krê tung roh Têt Lo hơnăm nếo Giáp Thìn hơnăm 2024. Pơtối mê, kong pơlê pơkâ ‘măn tâi tâng kơxô̆ liăn lăm pôu ƀă diâp kơxuô tơmeăm ăm mâu khu pú hên, ngế krê tung roh Têt Lo hơnăm nếo Giáp Thìn hơnăm 2024 cho lối 77 rơtal liăn.

            Roh kố khu râ kăn pơkuâ kong pơlê Dak Lak kô tơkŭm po mâu khu râ kăn lăm pôu, diâp 51 kơxuô tơmeăm ăm mơngế ai hnoăng ƀă mâu Kơ koan tơnêi têa, Kŏng an, Mô đô̆i gâk tơkăng kong ƀă khu cheăng lêng tung kong pơlê. Rơtế a mê, Vi ƀan Măt trâ̆n Tơnêi têa kong pơlê, Khu lo tŏng veăng kong pơlê Dak Lak xuân pơkâ pêi mơhnhôk mâu kơxô̆ liăn vâ lăm pôu, diâp kơxuô tơmeăm ăm mâu rơpŏng kơtiê, rơpŏng ai tơdroăng rêh ối pá puât ƀă mâu ngế ai hnoăng tơnêi têa... A kơpong hơngế hơngo, kuăn pơlê hdroâng kuăn ngo vâ rêm ngế kuăn pơlê pơrá châ tơdah Têt phiu ro, hơtô.

            Tơdroăng ki tơniăn kơbố xuân ai Têt ƀă “Ôh tá lôi kơbố peăng parŏng’’ dế châ Khu xiâm pơkuâ cheăng pêi Mô đô̆i rong râ ƀă Rêh ối pơlê pơla rơtế mâu khu râ, mâu kơvâ cheăng, kong pơlê tơmâng pêi pro. Pôa Phạm Hồng Đào, Kăn phŏ pơkuâ Ƀơrô Tơnêi têa ‘na kơdroh kơtiê (ối tung Khu xiâm pơkuâ cheăng pêi – Mô đô̆i rong râ ƀă rêh ối pơlê pơla).

“Khu râ kăn pơkuâ kong pơlê xuân môi tiah mâu ngế tŏng kum mơngế pá puât ƀă mâu kơ koan ki tơdjâk xuân ai troăng pêi, mơhnhôk mâu khu râ ki ê vâ rơtế tŏng kum, tơniăn ăm vâi tơdah Hơngui phiu ro, lĕm tro môi tiah hnê mơhno dêi Khu pơkuâ hnê ngăn cheăng Đảng, Chin phuh ƀă Ngế pro xiâm hnê ngăn Chin phuh. Ki hên cho tŏng kum phái, tiah hmâ mơ’nui hơnăm hmâ ai tŏng kum tiah mê. Pakĭng mê xuân ai kơxuô tơmeăm dêi Kăn xiâm hnê ngăn tơnêi têa, kơxuô tơmeăm dêi mâu kăn. Ki mê tiô ivá liăn ngân dêi rêm kong pơlê, kô mơ-eăm tung ivá kô tơniăn lĕm má môi ăm kuăn pơlê tung kong pơlê pơkuâ. Khu xiâm pơkuâ cheăng pêi mô đô̆i rong râ ƀă rêh ối pơlê pơla xuân hiăng ai mơ-éa pơtroh mâu kong pơlê, pơkâ thế tơmâng hnê mơhno tŏng kum Têt ăm mơngế kơtiê tơniăn tro pơkâ. Pakĭng mê, kong pơlê ai hnoăng séa ngăn tơdroăng pêi pro kố vâ tơniăn tro mơngế ki lâi kô châ tŏng kum, ôh tá ăm ai tơdroăng vâ pro pơxúa ăm dêi tơná ing tơdroăng kố’’.

            Têt Lo hơnăm nếo Giáp Thìn dế vâ chê troh. Tŏng kum Têt ăm mơngế kơtiê, cho mâu ngế ki pá puât, tơniăn kơbố xuân châ tơdah Têt phiu ro, hơtô hiăng chiâng khôi túa lĕm tro dêi hdroâng mơngế Việt Nam.