Kơxê lơ 5/6, Kuô̆k hô̆i pơtối rôh êng ƀă tiâ rơkong kơ-êng kơ pôa Hầu A Lềnh, Ngế xiâm pơkuâ Vi ƀan hdroâng kuăn ngo. Rôh kơ-êng tiâ kố hlo kơ-êng hên cho mâu rơkong kơ-êng dêi khu kăn Kuô̆k hô̆i êng tơdrăng ‘na mâu tơdroăng ki ối ‘ro, ôh tá tơniăn tung pêi pro 3 tơdroăng pơkâ tơnêi têa ‘na mơjiâng thôn pơlê nếo; mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo; xut tah hrâ mơnguâ kơtiê xơpá krá ton.

Pôa Hầu A lềnh, Ngế xiâm ngăn hdroâng kuăn ngo ăm ‘nâi: xơpá má môi nôkố cho tơbleăng tơdroăng pơkâ tơnêi têa ‘na mơdêk cheăng kâ rêh ối pơlê pơla kơpong hdroâng kuăn ngo ƀă peăng kong ngo. Hên troăng hơlâ tŏng kum ki ê ai tơdjâk troh kơpong hdroâng kuăn ngo kal athế châ tăng ‘nâi ƀă ‘mot tơ’nôm ‘mâi rơnêu ăm tơtro ƀă tơdroăng ki ai khât.

Troh hâi lơ 30/3 tâi tâng 15 khu xiâm, kơvâ cheăng ki châ pơcháu hnoăng cheăng hiăng tơleăng klêi ƀă ai hlá mơ-éa tiâ mơnhên, hnê mơhno ăm mâu kong pơlê tơleăng mơnhên châ 121 tơdroăng ki xơpá, tơvâ tơvân.