A roh hôp mê, pôa Trần Lưu Quang, Ngế pro xiâm phŏ hnê ngăn ai tối nhên, tung la ngiâ kô thăm mơdêk tơdroăng tah lôi ki mơnhêa mơnhĕn, tơvâ tơvân, rĕng chêh bro rơnêu luât i tơtrro, krá tơniăn vâ mâu Tơdroăng cheăng xiâm dêi tơnêi têa châ pơkâ pêi pro tro tiô pơkâ.

Séa ngăn rôh hôp kơ-êng dêi kăn Kuô̆k hô̆i ƀă pôa Hầu A Lềnh, Ngế xiâm pơkuâ Vi ƀan hdroâng kuăn ngo a hneăng hôp má 5 Kuô̆k hô̆i hneăng 15, kuăn pơlê lâp tơnêi têa mơnhên tối, Ngế xiâm pơkuâ hiăng tơkŭm tiâ mơnhên mâu tung tơdroăng ki kăn Kuô̆k hô̆i tơmâng ngăn, tơpui tối leăng tŭm mâu tơdroăng ki hlo tá hâi tơtro, tá hâi klêi, tơdrêng amê hlối pơkâ mơ’no túa pơkâ vâ ‘mâi rơnêu mâu tơdroăng ki hâi tơtro tung kơvâ pơkuâ.

Tơdjâk troh tơdroăng tơbleăng tơdroăng tơnêi têa “mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo”, kuăn pơlê Trương Thế Vinh, kăn ƀô̆ pêi hnoăng cheăng hdroâng kuăn ngo a tơring Ia Grai, kong pơlê Gia Lai tối tiah kố, kăn ƀô̆ cheăm tơring dế trâm pá khât drêng tơbleăng tơdroăng.

Ngoh Trương Thế Vinh tối tơdroăng tơmiât dêi tơná:

“Ai hên hlá mơ-éa dêi kong pơlê tá hâi teăm hâi pêi pro tâng pơchông ƀă drêng tơbleăng tơdroăng, malối a mâu cheăm pơlê tá hâi ai tơdroăng ki hnê mơhno nhên. Malối Tơdroăng tơkêa 1 tŏng kum hngêi ối, tơnêi pêi tiô pơkâ 4 dêi Ngế pro xiâm hnê ngăn Chin phuh mê tŏng kum tơnêi ối ƀă kơlo 44 rơtuh tung môi rơpŏng ƀă tơnêi pêi mơjiâng tơmeăm 22 rơtuh tung môi rơpŏng mê pá vâ tơbleăng.

Tơnêi pêi mơjiâng tơmeăm ăm vâi krâ nhŏng o mê yă tê gá kơnâ, ƀă kơxô̆ liăn kum môi tiah a kơpêng ƀă kơxô̆ liăn mung môi tiah mê mê vâi krâ nhŏng o ôh tá kâi vâ roê tŭm ƀăng tơnêi pêi, tơnêi bro hngêi”.

Pôa Lâm Tấn Bình, kuăn pơlê hdroâng kuăn ngo a cheăm Phan Hiệp, tơring Bắc Bình, kong pơlê Bình Thuận tối, tung rôh ki apoăng mơ’no tơbleăng a hneăng hôp Kuô̆k hô̆i, Ngế xiâm pơkuâ tiâ tơdrăng khât, ki nhên mâu tơdroăng ki kal, malối cho mâu tơdroăng ‘na troăng hơlâ pơkâ dêi Đảng ƀă Tơnêi têa tơdjâk troh hnoăng cheăng dêi Khu xiâm ƀă tơdroăng ki tơrŭm ƀă mâu khu xiâm, kơvâ cheăng ki ê.

Pôa Lâm Tấn Bình xuân tối mâu tơdroăng ki ối tơchĕng tơmiât rơhêng vâ, ki xơpá ki pôa Hầu A Lềnh, ngế xiâm pơkuâ  hiăng tơpui tối tơdjâk troh troăng hơlâ tŏng kum, malối cho tơdroăng ki ‘no liăn mơnhông cheăng kâ rêh ối pơlê pơla ăm kơpong hdroâng kuăn ngo:

“Ƀă hnoăng cheăng dêi Ngế xiâm pơkuâ xuân ai pơkâ tơdroăng ăm troăng pêi tung la ngiâ bro tiah lâi vâ kuăn pơlê hlê ƀă châ tơdah xo mâu troăng hơlâ tŏng kum dêi Đảng ƀă Tơnêi têa ‘no liăn tơxâng ƀă tro tiô pơkâ ‘na tơdroăng rêh ối xơpá, tơdroăng rêh ối dêi kuăn pơlê hdroâng kuăn ngo a peăng kong ngo tiô túa ki tơdrăng môi tiah Ngế xiâm pơkuâ hiăng tối rơdêi drêng mơ’no tối a rôh hôp kơ-êng kơxê kố”.

A ngiâ Kuô̆k hô̆i, pôa Trần Lưu Quang, Ngế pro xiâm phŏ hnê ngăn Chin phuh ăm ‘nâi: Troh tâi khế 5/2023, kơxô̆ liăn dêi hơnăm 2022 ăm tơdroăng kố bu châ 58% kơxô̆ liăn ‘no pêi cheăng, kơxô̆ liăn dêi hnăm 2023 bu cha 17% kơxô̆ liăn ‘no cheăng.

Tung pơla bu ối 2 hơnăm 6 khế vâ pêi pro hneăng má 1 dêi tơdroăng tơkêa kố, luâ tâ mê nếo, hên kuăn pơlê hdroâng kuăn ngo châ xúa tơdroăng kố dế trâm hên xơpá. Ngế pro xiâm phŏ hnê ngăn tơnêi têa mơhno tơdroăng ki tơvâ tơvân tung tơdroăng tơbleăng tơdroăng cho xua kơxô̆ hlá mơ-éa pơkâ hên mê ai tơdroăng ki ôh tá tơdâng tơ’mô, pro pá ăm tơdroăng ki tŏng kum, bro klêi mâu tơdroăng luât krá rơdêi vâ Tơdroăng kố châ ‘no liăn tro tơdroăng pơkâ thế:

“Tơdroăng ki kal ngin kô mơdêk rơdêi klâ xoăng ăm kong pơlê vâ mâu vâi pú hbrâ rơnáu pêi pro. Mâu tơdroăng ki bu a kong pơlê nếo ‘nâi athế bro tiah lâi gá tro má môi. Hiâm mơno tơdjuôm cho ivá mơ-eăm vâ pơtối pơkâ tơleăng mâu tơdroăng ki trâm, bro tiah lâi vâ chiâng pơkâ tơleăng tơdroăng kố tro hâi khế tro pơkâ ƀă tro tơdroăng pơkâ thế dêi rêm ngế ki rơhêng vâ”.

Mơgêi khu tơdroăng ki kơ-êng ‘na kơvâ hdroâng kuăn ngo, pôa Vương Đình Huệ, Kăn xiâm hnê ngăn Kuô̆k hô̆i tơmâng xo rôh kơ-êng kố mơhno hiâm mơno pôu râng dêi hnoăng, tơdrăng. Mơhno nhên hên tơdroăng ki tá hâi pêi pro klêi, ối ‘ro, malối cho tơdroăng ki hrá tơbleăng mâu Tơdroăng pơkâ tơnêi têa.

Ai mâu hlá mơ-éa hnê mơhno hrá pơkâ lơ pơkâ ôh tá tŭm ôh tá tơdâng tơ’mô, tá hâi nhên, tá hâi ai kơlo pơkâ nhên, kăn xiâm hnê ngăn Kuô̆k hô̆i pơkâ thế tung la ngiâ khŏm tơbleăng mâu troăng hơlâ vâ pêi pro hơ’lêh tŭm, teăm tơdrêng mâu troăng hơlâ, troăng tơmiât ki kal ‘na tŏng kum hdroâng kuăn ngo pơla hơnăm 2021 – 2030. Mơhnhôk tơlo mâu kơxô̆ liăn vâ mơdêk cheăng kâ rêh ối pơlê pơla kơpong hdroâng kuăn ngo ƀă peăng kong ngo; tung mê, tơkŭm tung mâu kong pơlê cheăm tơring ki malối xơpá, khu hdroâng kuăn ngo ối hên xơpá ƀă ai xơpá cho ki xiâm.