Kố cho mâu tơkong tơhrâ ki mơ-eăm dêi H’Mên Teh, mơngế  M’Nông cho đảng viên nếo mot tung rôh leh tơbâ hâi lơ 22/12/2023 kố nah, a chi bộ ƀuôn Diêo, cheăm Bông Krang, tơring Lăk. H’Mên Teh ăm ‘nâi, châ ối tung Đảng cho tơdroăng ki hâk tơngăm ƀă phiu ro xua mâu tơdroăng mơ-eăm dêi tơná tung pơla hdrối kố nah châ mơhno:

“Á châ mot tung Đảng á tâ phiu ro tơdroăng ki mê. Tung 1 hơnăm châ mot đảng viên ki hbrâ rơnáu a kô mơ-eăm tâ mê nếo vâ hriâm tơ’nôm ăm tơná hlê mâu tơdroăng ki lĕm dêi đảng viên ƀă kal thế mơ-eăm tâ nếo vâ 12 khế kơ’nâi chiâng đảng viên khât’’.

Châ mot tung Đảng sap hơnăm 2018 nâ Lữ Thị Thái kuăn ngo Thái, nôkố cho đảng viên ki rơkê dêi Chi ƀộ ƀuôn Thái, cheăm Ƀông Krang, tơring Lăk. Djâ troăng ahdrối tơdroăng pơ’lêh hdrê pêt, mơnăn păn dêi kong pơlê, nôkố ƀă túa păn ro ăm piê lĕm, păn hdrong xo prế, pêt loăng plâi, hiăng pro pơxúa ăm rơpŏng hngêi nâ Thái kơxô̆ liăn 400 rơtuh liăn.

Pakĭng mê nâ Thái đi đo djâ troăng a hdrối tung tơdroăng cheăng  ƀă mơhnhôk a thôn pơlê môi tiah pleăng tơnêi pro troăng prôk tung thôn, hnhâng troăng kơxái on tơhrik tung thôn pơlê, pro troăng pêt reăng...

“Cho môi ngế đảng viên á đi o djâ troăng ahdrối, má môi cho hnê kuăn pơlê rak vế pêi pro tro tiô troăng rơhlâ dêi Đảng, luât Tơnêi têa, ƀă tơná đi đo pêi ahdrối tung tĭm tơdroăng. Pêi pro tiô pơkâ NQ 05 dêi khu kăn Đảng tơring mê ngin xúa pêi pro tung rêh ối, tơná xuân pêi pro tung rêh ối, tơná xuân thế pêi hdrối ah kuăn pơlê nếo pêi ƀối vâ tối nôkố pơ’lêh hdrê loăng pêt, mơnăn păn a pơlê cho 70%, ‘na ngiâ pêt loăng kơphế ôh tá tơtro ƀă tơnêi prê akố,  hiăng pơ’lêh tơ-ê, nôkố kuăn pơlê mơnhông tơƀrê ‘nâng’’.

Ôh tá xê to tơmâng mơnhông tơ’mot đảng viên hdroâng kuăn ngo tung tơrêm chi ƀô̆, tơdroăng mơnhông tơ’mot đảng viên hdroâng kuăn ngo rơtế ƀă ăm mâu kăn ƀô̆ hdroâng kuăn ngo tung khu cheăng kal kí, kơ koan tơnêi têa đi đo châ Khu kăn Đảng tơring Lak tơmâng.

Troh nôkố, tâi tâng kăn ƀô̆, mâu kăn pơkuâ kơ koan, mâu ngế cheăng tung mâu kơ koan cho đảng viên kuăn ngo tung lâp tơring ai 1 rơpâu 574 ngế. Tung mê râ cheăm ai 227 ngế, ngoh Y Wu Sruk - Kăn phŏ hnê ngăn Vi ƀan cheăm Yang Tao, tơring Lak ăm ‘nâi, tơdroăng tơ’mot mơngế mot Đảng cho hdroâng kuăn ngo ƀă rah xo mâu kăn ƀô̆ hdroâng kuăn ngo a tíu kố hiăng pơtối rak vế ki rơdêi dêi kăn ƀô̆ khu tơrŭm cheăng Đảng a cheăm bêng.

Ing mê, veăng ‘no hnoăng a tơdroăng pơkâ mơnhông cheăng kâ, rêh ối a kong pơlê, tơdrêng amê, tơdroăng hnê tối, mơhnhôk kuăn pơlê a mâu thôn châ pêi pro tiô mâu troăng rơhlâ, luât pơkâ dêi Đảng, tơnêi têa hiăng châ pêi tơ’lêi hlâu, hlối tơƀrê tâ:

“Cheăm Yang Tao ai 95% ngế kuăn ngo, pin hlê châ pơtối pêi tro tiô túa tơlá tíu kố, malối cho rơkong tơpui vâ hnê tối ăm kuăn pơlê pin, a xuân cho kuăn pơlê rêh ối akố, a ‘nâi tơdroăng rêh ối dêi kuăn pơlê ối kơtiê xơpá, ing mê hlê ‘nâi hlối xúa troăng rơhlâ dêi Đảng hnê ăm kuăn pơlê hlê ƀă hnê hlối mơhnhôk kuăn pơlê pêi pro tung rêh ối’’.

Tơring Lă ai lối 75 rơpâu ngế kuăn pơlê, tung mê kơxô̆ kuăn ngo lối 63%. Jâ Đào Thị Thanh An, Kăn phŏ hnê ngăn Đảng tơring Lăk, kong pơlê Dak Lak  ăm ‘nâi, vâ tơ’mot đảng viên a chi ƀô̆ thôn, pơlê, kơpong hngế hngo, kơpong kuăn ngo, Khu kăn Đảng tơring pơcháu ăm khu tơrŭm cheăng dêi tơring tơrŭm ƀă mâu khu mơjiâng Đảng đi đo hnê ăm kuăn pơlê tơdroăng cheăng pêi, vâ tah ki xơpá tơvâ tơvân, hlối hnê tối, séa ngăn, tí tăng ngăn tơdroăng mơnhông cheăng Đảng a thôn, pơlê.

Kơnôm ing mê, tơdroăng tơ’mot đảng viên châ pêi pro tro pơkâ, tơniăn  tiô pơkâ tơƀrê ăm đảng viên nếo. Nôkố lâp tung tơring ối ai 737 ngế kuăn pơlê kơhnâ tơxâng ăm mot Đảng tung hơnăm 2024. Jâ Đào Thị Thanh An tối:

“Rêm hơnăm ngin xuân mơjiâng mâu pơkâ, mâu tơdroăng chêh vâ hnê ăm mâu tíu pêi cheăng Đảng dêi râ pêi sap apoăng hơnăm séa ngăn tơbleăng ăm kuăn pơlê ki rơkê veăng pêi a mâu lâm hriâm tơ’nôm tơ’mot Đảng. Vâ châ tơ’mot hên ngế mot rêm hơnăm ngin xuân mơjiâng pơkâ cheăng ăm tơrim ngế ki cheăng tung khu kăn Đảng, mâu ngế chăng tung khu kăn lăm troh hnê, tơkŭm hôp Đảng rơtế ƀă mâu chi hô̆i thôn pơlê vâ mơhno troăng, pakĭng tơdroăng mơnhông tơ’mot đảng viên  a mâu chi hô̆i thôn pơlê tơmâng pêi tro tơdroăng cheăng mơjiâng Đảng, tơmâng khât tăng mơngế ki vâ ăm mot đảng viên”.

Khu kăn ƀô̆, đảng viên cho kuăn ngo ki rêh ối a kong pơlê Dak Lak hiăng pơtối rak vế hnoăng cheăng ki xiâm tung tơdroăng cheăng kal kí a pơlê cheăm, đi đo djâ troăng a hdrối tung mơjiâng khu tơrŭm môi tuăn tâi tâng kuăn pơlê, tơniăn ƀă kring vế mơnhông pơlê cheăm tơring.