Ƀă mâu tơdroăng pêi pro ki nhên kăn ƀô̆, lêng mâu tíu pêi cheăng hiăng ‘măn chôu hiâm mơno, hâk mơnâ tơniăn lĕm tung hiâm mơno hdroâng kuăn ngo a mâu pơlê cheăm tơkăng kong Dak Lak.

Ƀuôn Ea Pri, cheăm Ea Wer, tơring tơkăng kong Ƀuôn Đôn, kong pơlê Dak Lak mâu hâi mơ’nui khế 8 tơdah hrĭng roh kăn ƀô̆, mô đô̆i Đăi đô̆i 5, Khu pơkuâ Mô đô̆i tơring Ƀuôn Đôn troh troh pêi cheăng pơtâng tối mơhnhôk kuăn pơlê. Mô đô̆i hiăng tơrŭm ƀă khu râ kăn pơkuâ cheăm ƀă mâu khu cheăng kal kí – rêh ối pơlê pơla dêi cheăm tơkŭm po mơgrúa a mâu kế tơmeăm khoăng tơdjuôm, kui tah trâp drô hno têa; tŏng kum mâu rơpŏng ai hnoăng tơnêi têa, tŏng kum mơngế krâ ôh tá ai kuăn ‘nĕng rak ngăn, pêi cheăng pêt mơjiâng tơmeăm; veăng pêt hrĭng xiâm loăng ngiât, loăng xâp rơngiâp a mâu troăng kân tung pơlê.

Rơtế veăng ƀă mô đô̆i pêi tơdroăng pơtâng tối mơhnhôk kuăn pơlê, kuăn pơlê a kố kơbố pơrá hâk vâ, kơdrâm kơdrĕng  rơtế vâ pêi pro tơtro tơdroăng mơnhông cheăng kâ – rêh ối pơlê pơla, troăng hơlâ tŏng kum rêh ối pơlê pơla, troăng hơlâ tŏng kum hdroâng kuăn ngo, tơdroăng loi tĭng tiô khôp; rak tơniăn cheăng lêng – gâk kring.

Pôa Nguyễn Anh Dũng, ƀuôn Ea Pri, cheăm Ea Wer, tơring Ƀuôn Đôn, tối ăm ‘nâi:

‘’Rêm hơnăm mô đô̆i troh a Ea Pri vâ rơtế ƀă kuăn pơlê veăng mâu tơdroăng cheăng kui tah trâp hno têa ƀă mơgrúa kong prâi péa pâ troăng kân, kum kuăn pơlê mâu tơdroăng pêi chiâk deăng, á cho kuăn pơlê a kố tâ hâk phiu ‘nâng, drêng mô đô̆i troh a kố mê kuăn pơlê xuân hiăng rơtế mô đô̆i veăng mơgrúa kong prâi môi tiah a hngêi hôp kân, kơpuih văng, mơgrúa rơtâ tá hngêi ối vâ tơniăn kong prâi lĕm ƀă krúa’’.

Ôh tá xê to kum kuăn pơlê mâu tơdroăng cheăng hngăm hngo, mê um méa ngế mô đô̆i rơtế ƀă khu ếo ngiât pleăng hnoăng cheăng dêi sinh viên Hngêi trung Đăi hok Tây Nguyên ƀă đoân viên - droh rơtăm cheăm đi đo achê, pâ dêi pó tâi hiâm mơno tơmâng troh rêm ngế, rêm toăng hngêi, ki má lối cho rơpŏng ai tơdroăng rêh ối pá puât. Ki má lối drêng pơtâng tối ‘na mâu troăng hơlâ dêi Đảng, Tơnêi têa, Troăng pơtâng tối ‘nâng ‘nâi, tơ’lêi pâ, tơ’lêi pêi tiô, ing mê loi tơngah tung pơkuâ hnê mơhno dêi Đảng, khu râ kăn pơkuâ, xuân môi tiah pêi tiô troăng prôk dêi Đảng, troăng hơlâ luât dêi Tơnêi têa, Thiê̆u tă Trần Văn Toàn, Cheăng kal kí - kăn phŏ Khu hnê mơhno Mô đô̆i tơring Ƀuôn Đôn, kong pơlê Dak Lak tối ăm ‘nâi:

‘’Ƀă Khu pơkuâ mô đô̆i tơring Ƀuôn Đôn xuân hiăng hlê plĕng trâu hơngế tơdroăng xiâm kố, pêi pro tơdroăng pơtâng tối mơhnhôk kuăn pơlê cho môi tung mâu tơdroăng ki xiâm ki kal drêng kố. Ƀă kuăn pơlê hdroâng kuăn ngo ai lối 60% cho mơngế hdroâng kuăn ngo mê ngin xuân ai troăng pơtâng tối tơtro ƀă kuăn pơlê tâ, hlê plĕng tâ, ‘nâng ‘nâi tâ vâ kuăn pơlê hlê plĕng troăng hơlâ dêi Đảng ƀă Tơnêi têa tung la ngiâ pêi pro ăm tơtro tâ’’.

Mô đô̆i troh pơlê, ngiâ méa tíu kơpong tơkăng kong xuân chôa ‘lâng châ pơ’lêh. Ing mâu tơdroăng pêi ki nhên, mô đô̆i hiăng kum, rơnêu kân lĕm rơdâ châ 11 km troăng kân tung pơlê, lối 1 km hno têa; kum kuăn pơlê rơnêu, pôe xo tơmeăm; rơnêu 5 tíu hôp tơdjuôm, hngêi kuăn pơlê, 2 hngêi trung hriâm; tơkŭm po mâu tơdroăng trâm mâ mơhno khôi túa lĕm tro, hơdruê xuăng; lăm pôu, diâp kơxuô tơmeăm ăm mâu rơpŏng ai hnoăng tơnêi têa; pêi pro tơdrêng ƀă mê cho tơdroăng pơtâng , mơhnhôk kuăn pơlê pêi pro lĕm tro tơdroăng rêh ối mơhno khôi túa lĕm tro a pơlê pơla tíu kuăn pơlê rêh ối kơdrâm, rak krúa lĕm kong prâi; mơdêk hlê plĕng tung tơdroăng pêi pro troăng hơlâ dêi Đảng, luât dêi Tơnêi têa.

Đăi tă Võ Văn Minh, Kăn phŏ cheăng kal kí Khu xiâm pơkuâ mô đô̆i kong pơlê Dak Lak tối ăm ‘nâi:

‘’Vâ pêi pro lĕm tro mâu tơdroăng pơtâng tối mơhnhôk kuăn pơlê ƀă troăng pêi rŭm môi tuăn mô đô̆i kuăn pơlê tung kong pơlê tung la ngiâ, ƀă khu mô đô̆i kong pơlê ahdrối ngin xuân mơnhên tơdroăng mơdêk hlê plĕng ăm kăn ƀô̆, mô đô̆i ‘na hnoăng pơtâng tối mơhnhôk kuăn pơlê tung rơxông nếo cho tơdroăng ki kal.

Vâ rak tơniăn lĕm tro thế chu a rêm tíu pêi cheăng, ngăn rêm tíu pêi cheăng nôkố tơkŭm po mâu tơdroăng pơtâng tối mơhnhôk kuăn pơlê a pơlê, cheăm dêi tơná hiăng mot tung tơdroăng kal má môi dêi kuăn pơlê lơ ôh ƀă rêm pơlê cheăm ki kal xiâm; ing mê nếo pêi lĕm tro tơdroăng mơgêi, tối tơdroăng ki xo vêh túa ki rơkê tơtro ƀă pêi pro, po rơdâ tơdroăng rŭm môi tuăn mô đô̆i kuăn pơlê tung kong pơlê tối tơdjuôm, ƀă tá khu mô đô̆i kong pơlê tối krê’’.

Ƀă troăng pêi ‘’4 tơdrêng’’ tung pơtâng tối, mơhnhôk kuăn pơlê hơnăm 2023, mâu tíu cheăng ối tung Khu xiâm pơkuâ Mô đô̆i kong pơlê Dak Lak hiăng tơrŭm ƀă mâu tơring séa ngăn, rah xo mâu tơdroăng cheăng pêi ki kal má môi vâ tŏng kum. Ing rêm tơmeăm, tơdroăng pêi cheăng kêi đeăng hiăng kum tơ’nôm tơdroăng phiu ro, pro hơtô hiâm mơno ƀă bâ eăng tơdroăng ki loi tơngah dêi kuăn pơlê hdroâng kuăn ngo a kơpong tơkăng kong Dak Lak ƀă ‘’Mô đô̆i Pôa Hồ’’.