Kơxo lơ 02/08, châ tơdroăng ki pơkâ thế dêi Kăn xiâm hnê ngăn tơnêi têa, Đăi tă Trương Minh Đương – Kăn pơkuâ Kŏng an kong pơlê Lâm Đồng rơtế ƀă kăn phŏ pơkuâ Kŏng an kong pơlê Lâm Đồng hiăng Vêh diâp Mê dái Rak vế Tơnêi têa ối má Pái ăm 3 ngế kăn sat gâk troăng prôk, mê cho: Trung tá Nguyễn Khắc Thường, Thiếu tá Lê Quang Thành và Đại úy Lê Ánh Sáng hlâ drêng pêi dêi hnoăng cheăng tung rôh tơnêi tơhnah a văng Bảo Lộc.

Tiah mê, kăn pơkuâ Kŏng an kong pơlê Lâm Đồng hiăng troh a hngêi dêi rêm ngế kăn ƀô̆, lêng ki hiăng hlâ vâ diâp Mê dái Rak vế Tơnêi têa ối má Pái ăm rơpŏng nhŏng o ngế ki hlâ. Mâu ngế ki hlâ châ diâp Mê dái xua hiăng kơhnâ rơkê tung hnoăng cheăng, veăng kum tung tơdroăng cheăng mơjiâng chuh ngiah xah hô̆i ƀă rak vế Tơnêi têa.

Kố cho tơdroăng mơnê, ô eăng kân dêi Đảng, Tơnêi têa ƀă Kuăn pơlê ƀă mâu ngế ki hiăng hlâ xua ai hnoăng cheăng mơjiâng ƀă rak vế gak kring Tơnêi têa. Tiô đăi tă Trương Minh Đương: tung plâ pêi dêi hnoăng cheăng, mâu kăn ƀô̆, kŏng an Nguyễn Khắc Thường, Lê Quang Thành ƀă Lê Ánh Sáng hiăng mơdêk hiâm mơno pôu râng dêi hnoăng cheăng, pêi pro klêi mâu tơdroăng cheăng ki châ pơcháu.