Hbrâ ăm roh hôp má 5 Kuô̆k hô̆i hneăng 15, măng tĭng hdrối nah, Vi ƀan hnê ngăn Kuô̆k hô̆i hiăng hôp roh má 23, ăm mâu kăn veăng tơpui tối ‘na hlá mơ-eá tơbleăng mơnhên ngăn mâu rơkong tơpui tối, tơdroăng pâ thế dêi kuăn pơlê ƀă kuăn pơlê pơtroh ăm roh hôp má 5. A rôh hôp, mâu kăn tung Khu kăn pơkuâ hnê ngăn Kuô̆k hô̆i pâ thế ‘mâi rơnêu tơdroăng ki ai mâu kăn ƀô̆, mâu ngế ki cheăng, khu ngế ki pơkuâ cheăng, pôu râng hnoăng cheăng la tơpôu ăm vâi ki ê, ví hnoăng cheăng, xâu tung pôu râng dêi hnoăng cheăng “rak vế tơniăn kơlo ki luâ kơ tơdroăng”, ôh tá khên tơleăng mơnhên, tăng troăng, ing mê, tơdjâk troh tơdroăng pêi cheăng, tê mơdró dêi khu mơdró kâ.

Pôa Đỗ Văn Chiến, Kăn pơkuâ ngăn xiâm Đảng, Kăn hnê ngăn Vi ƀan xiâm Măt trâ̆n Tơnêi têa Việt Nam ăm ‘nâi: Kuăn pơlê tối tơngah khât tung tơdroăng ki kal tung hnoăng cheăng mơjiâng ƀă ‘mâi rơnêu Đảng malối cho hnoăng cheăng hbrâ mơdât kâ kơluâ châ hnê mơhno pêi pro kơtăng, tối rơtế ƀă pêi, ôh ti ai tơdroăng ki lâi ôh tá chiâng.

Mâu rơkong pâ thế dêi kuăn pơlê rơhêng vâ ai mâu troăng hơlâ pơkâ tơtro, tơƀrê, rế rak vế tơniăn tơdroăng ki tơniăn vâ mơnhông tơnêi têa, pâ thế pơtối tơmâng xo mâu rơkong tơpui tối dêi kuăn pơlê ƀă kơxop hlá mơéa Luât tơnêi têa ki ‘mâi hơ’lêh, kơxop hlá mơéa Tê mơdró hngêi trăng tơnêi tíu ki ‘mâi hơ’lêh, kơxop Hlá mơéa Luât Hngêi ối ki ‘mâi hơ’lêh ƀă hên ki ê ki rơhêng vâ tối cho tơdroăng ki tŏng kum mâu tơdroăng mơnhông mơdêk cheăng kâ rêh ối pơlê pơla:

“Ƀă tơdroăng mơnhông mơdêk cheăng kâ rêh ối pơlê pơla kơpong hdroâng kuăn ngo ƀă peăng ngo. Mâu tơdroăng tơkêa tŏng kum tơdrêng ăm kuăn pơlê ‘na tơnêi ối, tơnêi pêi, têa ôu kâ hum roh ki ‘ló cho liăn ‘no ing kơxô̆ liăn cheăng dêi pin xing xoăng ăm ‘no hrê tơdroăng cheăng tơdjuôm. Tiah mê athế pêi pro túa pơkâ ‘no liăn cheăng tơdjuôm mê ôh tá chiâng ‘no liăn hrê.

Ki má péa mê nôkố kong pơlê xơpá tung tơdroăng ki tŏng kum liăn. Tŏng kum liăn ‘no cheăng tối tiah mê xo, la ôh ti ai ƀai ki lâi hnê mơhno tŏng kum liăn tiô túa ki tơƀrê má môi mê kơxô̆ liăn kong pơlê xuân ối tá hâi hlê plĕng khât tung tơchĕng tơmiât”.

Ki khât a mâu kong pơlê tíu pêi cheăng, kuăn pơlê pâ thế Đảng ƀă Tơnêi têa hnê mơhno mâu kơ koan ki ai tơdjâk hriăn ngăn, pơkâ hlá mơéa tiô luât pơkâ vâ hbrâ mơdât, ‘mâi rơnêu tơdroăng ki ai môi khu kăn ƀô̆, kong chưk, viên chưk, ngế ki ai hnoăng pơkuâ pơkâ cheăng tơná ăm ngế ki ê, ví, xâu pôu râng dêi hnoăng cheăng, “rak vế tơniăn kơlo ki kal”, ôh tá khên tơleăng tơdroăng cheăng, bro mơdon, tơdjâk troh mơjiâng bro, tê mơdró dêi khu mơdró kâ ƀă tơdroăng reh ối dêi kuăn pơlê. Veăng tơpui tối ‘na tơdroăng kố, pôa Vũ Hồng Thanh, Kăn pơkuâ Vi ƀan Cheăng kâ dêi Kuô̆k hô̆i mơhno nhên:

“Tung tơdroăng tối tơbleăng dêi Măt trâ̆n xuân ai ‘na tơdroăng ki xâu pôu râng dêi hnoăng cheăng, tơpôu ăm dêi rơpó. La nôkố bu kal 1 rơpâu ngế ôh ti vâ mê vêh pâ thế rơkong tơpui tối ƀă túa pơkâ pro mơ-éa ai hên hâi chôu liăn ngân ‘no pêi pro tâk hên”.

Pôa Trần Thanh Mẫn, Kăn xiâm phŏ hnê ngăn Kuô̆k hô̆i pơchân: hlá mơéa pơchuât mơhno rơkong tơpui dêi kuăn pơlê, pâ thế ‘mot tơ’nôm mâu tơdroăng ki kal ‘na tơdroăng kơdroh ‘na ivá mơdêk, hrá kĭ pơkâ túa pơkâ, hơ’lêh chêh bro hlá mơ-éa, hơ’lêh tơdroăng ki ‘no liăn tê mơdró vâ pêi klêi hlá mơ-éa tối tơbleăng chiâng rơkê:

“Klêi kơ’nâi trâm kuăn pơlê á hlo hên tơdroăng ôh tá tro dêi khu chêh inâi séa ngăn tơdroăng ki dâi lĕm dêi mâu rơxế a mâu troăng dêi lâp tơnêi têa mê tung hlá mơ-éa tối tơbleăng ‘nâng ‘nâi mê chêh ‘mot. Má péa cho tơdroăng ki roê tê, pơto chơ ma tŭi nôkố ôh ti xê to troăng prôk xếo mê ƀă troăng tơƀai, rơkê khât. Kŏng an Pơlê kong kân Hồ Chí Minh hiăng pơsăm tối rôh ki pro xôi bă pơsăm tối lối chât ngế ki tro tơdjâk troh tơdroăng kố”.

Séa ngăn tối tơbleăng hnoăng cheăng kuăn pơlê mơhnŏng vâ xêh dêi Kuô̆k hô̆i xuân mơhno nhên klêi kơ’nâi séa ngăn ăm hlo, tung 18 hơnăm sap ing hơnăm 2003 troh hơnăm 2021, kơ koan ƀaoh hiêm pơlê pơla kong pơlê hiăng xo ôh tá tro ƀaoh hiêm pơklât thế, hiăng ai lối 4 rơpâu ngế ki pơkuâ tê mơdró krê nâp liăn ôh tá tro.

Pôa Dương Thanh Bình, Ngế xiâm hnê mơhnhôk kuăn pơlê tối nhên:

“Xua tơdroăng pêi pro ‘na nâp ƀaoh hiâm pơlê pơla pơklât thế ôh tá tro pơkâ dêi luât mê mâu ngế ki pơkuâ khu mơdró kâ, ngế krê tá hâi riân hâi chôu ki nâp ƀaoh hiêm pơlê pơla pơklât thế vâ châ xúa tơdroăng ki tŏng kum pơlê pơla, ƀaoh hiêm pơlê pơla, malối ai hên ngế nâp ƀaoh hiêm pơlê pơla châ vâ chê 20 hơnăm tơdroăng kố hiăng bro ăm kuăn pơlê hêng hôu.

Ai mâu ngế ki ‘nâ hiăng bro đơn pơsăm tối, thăm nếo pơsăm tơkêng pâ thế hriăn ngan, mơnhên tối pơkâ tơleăng klêi hlối tơdroăng ki pâ thế dêi kuăn pơlê”.

Pôa Vương Đình Huệ, Kăn xiâm hnê ngăn Kuô̆k hô̆i xuân pơchân troh hên tơdroăng ki ối hlo tá hâi tơleăng klêi, tơdroăng ôh tá tơniăn ‘na liăn ngân, hngêi trăng tơnêi tơníu châ mâu kuăn pơlê tối tung mâu rôh trâm mâ, pơkâ thế Chin phuh mơnhên tối tơtro tâ tơdroăng a hơnăm 2023, tơpui tơleăng xiâm kối vâ ai troăng hơlâ pơkâ tơleăng teăm tơdrêng. Tung mê, pơkuâ hlá mơéa liăn ngân ai pơkâ ki kal, ki xiâm; tơkŭm hơ’lêh chêh bro hlá mơ-éa, hnoăng cheăng tơdjuôm. Tơdrêng amê hlối séa ngăn, hbrâ rơnáu túa pơkâ hbrâ mơdât châ tơƀrê pơreăng COVID-19.