Kơxê lơ 12/7, Vi ƀan pơkuâ Kuô̆k hô̆i hiăng tơbleăng Pơkâ dêi Vi ƀan pơkuâ Kuô̆k hô̆i ‘na tơdroăng ki xing xoăng mâu tíu pêi cheăng râ tơring, râ cheăm pơla hơnăm 2023 – 2030. Tiô túa pơkâ xing xoăng dâng 33 tíu pêi cheăng râ tơring ƀă 1.327 tíu pêi cheăng râ cheăm tung pơla hneăng kố.

Tơpui a rôh hôp, pôa Vương Đình Huệ, Kăn xiâm hnê ngăn Kuô̆k hô̆i pơkâ thế pêi klêi Pơkâ vâ kĭ pơkâ, tung mê tơtrŏng, tơmiât nhên mâu tơdroăng pơkâ ki xiâm ‘na tơdroăng pêi cheăng tiah hmâ, mơhno túa lĕm tro, hdroâng kuăn ngo, tơdroăng khôp, tơdroăng loi tĭng, khôi túa tơlá; tơdrêng amê, hlối pơkâ nhên tơdroăng tơtro tíu pêi cheăng râ tơring, râ cheăm pơla hơnăm 2023 – 2030 mơ-eăm troh hơnăm 2030, mâu tíu pêi cheăng râ tơring, râ cheăm châ xing xoăng tơtro tiô tơdroăng cheăng tung la ngiâ mơnhông mơdêk cheăng kâ rêh ối pơlê pơla; pêi pro châ tiô tơdroăng pơkâ thế mơjiâng tơnêi têa chiâng môi tơnêi têa xúa kơmăi kơmok rơxông nếo, tiô troăng pơkâ xah hô̆i chuh ngiah.