Kơxê hâi lơ 4/8, Khu kăn Hô̆i đong kuăn pơlê kong pơlê Dak Lak  ăm hnê tối ‘na mâu luât pơkâ, luât tŏng gum mâu hngei trung kơpong tơkăng kong châ tơƀrê, rĕng tơniăn, krá ton ta ah. Nôkố mâu hngêi trung hnê ai tíu kâ koi ối pơtê râ mă môi ƀă má péa a mâu cheăm tơkăng kong dêi kong pơlê va tối tơniăn ‘na mơjiâng pro, tiô tối hdrối kô xúa hriâm hlối tung hơnăm hriâm 2026-2027.

Laga, mâu tơdroăng pêi pro ki hiăng vâ klêi, tơmeăm xúa tung mơhriâm, xing xoăng ăm thái cô hnê kal pơtối pê klêi. Jâ Cao Thị Hòa An, Kăn hnê ngăn Hô̆i đong kuăn pơlê kong pơlê tối nhên, ‘no liăn pro hngêi trung hnê ai tíu kâ koi ối pơtê kơpong tơkăng kong ôh ti xê to mơjiâng hngêi trung, hbrâ rơnáu tŭm têk kế tơmeăm khoăng mê ối thế rak tơniăn ăm hok tro kơpong xơpá châ lăm hriâm a hngêi trung, pơtối rak ki tơƀrê dêi tơmeăm khoăng pro.

Klêi mê, pâ thế Vi ƀan kuăn ngo kong pơlê hnê mơhno ăm mâu tíu pêi cheăng tơdjâk troh mơdêk rĕng klêi pro mâu hngêi trung ai tíu kâ koi a kơpong tơkăng kong, rĕng klêi tiô tơdroăng chêh tung hlá mơ-éa chêh troăng hơlâ luât pơkâ ‘na tơdroăng tŏng gum hok tro ƀă mâu hngêi trung hnê ai tíu kâ koi ối pơtê.

-Hâi lơ 4/8, Vi ƀan kong pơlê Gia Lai tơbleăng troăng rah xo bro lế lĕm, vêh po pro hngêi trung mâm non ƀă phôh thong tơnêi têa vâ mơdêk ki châ tơƀrê pơkuâ, rah xúa khu thái cô, tơmeăm khoăng, tơxâng pơkâ mơnhông hnê hriâm tung rơxông nếo. Tiô troăng, kơxô̆ hngêi trung mâm non ƀă phôh thong tơnêi têa dêi kong pơlê kô kơdroh ing 1.267 hngêi trung chu u ối 699 hngêi trung (kơdroh 568 hngêi trung).

Tơdroăng rah xo bro lế lĕm tro châ pêi pro tiô troăng, tơtro hnoăng cheăng nôkố dêi rêm cheăm, bêng; tung mê, a 61 cheăm, bêng kơpong tơ’lêi, kơdroh tíu xiâm hngêi trung hriâm châ lối 51%, u ối 74 cheăm, bêng ki u ối châ lối 37%. Kơvâ Hnê hriâm Gia Lai tối ăm ‘nâi, tơdroăng rah xo bro lế lĕm tro ƀă tơniăn hnoăng hriâm tâp dêi hok tro, ki má lối cho hok tro kơpong pá puât, kơpong kuăn pơlê hdrông kuăn ngo.