A ƀuôn Kđoh, cheăm Čư̆ Pơng, kong pơlê Dak Lak, cheăng hnê tối ‘na hâi pôk kăn pơkuâ châ tơbleăng pêi sap ing khế 11 hơnăm hdrối. Rơtế ƀă têa ƀăng-rôl, áp-phích a mâu troăng prôk, tơbleăng tối tung rơ’jiu, loa, kăn pơkuâ cheăm bêng ối mơdêk rơdêi hnê tối tơdrêng ing rôh hôp pơlê, rôh hôp tối ‘na luât. Tơdrêng amê, hlối mơ’no tối tung um tơvi, chêh tung mơ-éa hnê tối tung mâu trang măng pơlê pơla a tíu ki tơbleăng tơdroăng kal dêi cheăm bêng vâ tơdjêp, tơbleăng teăm tơdrêng troh vâi krâ kuăn pơlê.

Pôa Y Hoh Niê, Ngế cheăng tung khu cheăng Măt trâ̆n ƀuôn Kđoh ăm ‘nâi, tơdroăng ki hnê tối cho tơkŭm hnê ăm kuăn pơlê pêi pro hnoăng tơná tâ phĭu tro pơkâ, rah xo mâu ngế ki ai tŭm tơdroăng, ivá pêi cheăng teăng mâ ăm kuăn pơlê.

“Tơpui tối leăng ăm vâi krâ kuăn pơlê hlê ƀă pôk xo tro mơngế rah xo mâu ngế ki teăng mâ ai tŭm ivá, tuăn mơno vâ teăng mâ ăm kuăn pơlê, pêi cheăng rơkê djâ ki pơxúa vâ gum kuăn pơlê ai tơdroăng rêh ối tơniăn lĕm tâ. Ngin kô tơmâng xo mâu tơdroăng hnê mơhno, pơkâ pêi sap ing râ kơpêng ƀă vêh tơno ăm kuăn pơlê pêi pro tro, vâ rôh tâ phĭu pôk kăn kố châ tơkŭm po ƀlêi chiâng tơniăn lĕm”.

 Ing tơdroăng ki hnê tối, ‘na mâu tơdroăng pôk rah xo kăn pơkuâ châ mơ’no tối nhên, kuăn pơlê loi tơngah khât tung mâu kăn ki kô châ rah xo, mê cho mâu ngế ki ai tŭm tơdroăng dêi luât pơkâ, tơdrêng amê hlối athế hlê plĕng ‘na túa tơlá, hmâ ƀă kuăn pơlê ƀă tối tơbleăng nâl tơpui dêi kuăn pơlê tơná. Nôu Lip, a ƀuôn Ea Klok, cheăm Čư̆ Pơng, tối:

“Á rơhêng vâ la ngiâ kố ah pôk xo mâu ngế ki ai tŭm tơdroăng ki lĕm tro, rơkê, đi đo tơmâng ngăn tŏng gum kuăn pơlê, ôh tá pơrah kro, kơtiê. Đi đo ối achê ƀă kuăn pơlê, hlê ‘na túa tơlá, hlê ‘na tơdroăng rêh ối dêi vâi krâ kuăn pơlê, kâi tối mâu tơdroăng ki kuăn pơlê rơhêng vâ tối dêi tơná”.

Tiô Vi ƀan tâ phĭu pôk kong pơlê Dak Lak, troh nôkố, rôh hôp má môi hiăng môi tuăn 28 ngế châ pơtroh tơbleăng vâ pôk 15 ngế kăn Kuô̆k hô̆i hneăng XVI, tung mê ai inâi pơkâ cho 5 ngế hdroâng kuăn ngo, 9 ngế kơdrâi ƀă 1 ngế hơnăm ối nếo. Ƀă kăn Hô̆i đong hnê ngăn kuăn pơlê kong pơlê, inâi tơkêa ai 18 ngế vâ pôk xo 84 ngế kăn. A râ cheăm, tung lâp kong pơlê tiô tối hdrối kô pôk 2.445 ngế kăn Hô̆i đong hnê ngăn kuăn pơlê.

A cheăm bêng, pơkâ thế ‘na ki chêh inâi rah xo kăn, malối cho vâi kơdrâi ƀă hdroâng kuăn ngo, châ pơkâ mơ’no nhên sap ing rôh hôp tơkêa. Jâ H’Hương Ƀuôn Krông, Kăn hnê ngăn Vi ƀan Măt trâ̆n Tơnêi têa Việt Nam bêng Ea Kao, kong pơlê Dak Lak tối tiah kố:

“Hnoăng cheăng tíu ối dêi vâi kơdrâi rế hía rế châ tối rơdêi, kô teăng mâ ăm rơkong tơpui dêi kuăn pơlê tơná, tối mâu hiâm mơno púi rơhêng vâ dêi kuăn pơlê, malối tung mê cho vâi kơdrâi. Tiah mê rah xo inâi pơkâ tung la ngiâ ƀă vâi kơdrâi, hdroâng kuăn ngo cho tơdroăng ki tơrŭm tơtro, rak tơniăn tro ăm hnoăng pơxúa dêi khu ngế ki kố tung tơdroăng veăng chêh inâi vâ pro kăn. Kố xuân cho rế mơhno hnoăng pơxúa la tơtơdrêng amê xuân cho hnoăng ƀă cho tơdroăng ki pôu râng hngăm hngo ƀă rêm ngế ki châ tơbleăng inâi vâ pro kăn”.

Tung pơla ai tơdroăng ki pơhlêh ‘na tơnêi tơníu ƀă tơdroăng pơkâ ‘na tíu ối klêi kơ’nâi ‘mot tơkŭm, cheăng hbrâ rơnáu ăm rôh tâ phĭu pôk kăn a Dak Lak châ mơnhên cho hnoăng cheăng kal kí ki kal, pâ thế ai tơdroăng ki hbrâ rơnáu hdrối ƀă tơrŭm tơniăn krá pơla rêm râ, mâu kơvâ cheăng. Tơdroăng ki séa ngăn, ‘mâi pơhlêh troăng pơkâ, mâu ngế ki vâ pôk ƀă kơxô̆ ngế ki chêh inâi vâ pro kăn châ pêi pro kơtăng, tro pơkâ, pro tíu ngăn ăm mâu hvêa prôk hôp tơkêa ki pơtối.

Tiô jâ Cao Thị Hòa An, Phŏ kăn pơkuâ ngăn Đảng, Kăn hnê ngăn Hô̆i đong hnê ngăn kong pơlê, Kăn hnê ngăn Vi ƀan tâ phĭu kong pơlê Dak Lak, mâu cheăng hbrâ rơnáu dế châ tơbleăng pêi tơdâng tơ’mô, rak vế pơkâ thế ‘na troăng pơkâ ƀă tơdroăng pơkâ rah xo mâu kăn.

“Mâu tơdroăng cheăng troh nôkố mê Vi ƀan tâ phĭu xuân hiăng tơrŭm ƀă hbrâ rơnáu klêi tro ƀă rĕng hdrối tâ pơkâ. Tung la ngiâ ah pơtối mâu tơdroăng cheăng rak vế tơniăn tro pơkâ, tơdroăng pơkâ mâu ngế cheăng ƀă tơdroăng ki kal a mâu ngế cheăng tro tiô pơkâ”.

Rak tơniăn tro tơdroăng pơkâ mâu kăn cho hdroâng kuăn ngo ƀă vâi kơdrâi tung tâ phĭu pôk kăn ôh ti xê pêi châ tiô tơdroăng púi vâ dêi luât, mê ối cho tơdroăng veăng gum ‘mâi mơnhông tơdroăng loi dêi kuăn pơlê. Ƀă kong pơlê ki ai hên ‘na tíu ối môi tiah Dak Lak, cheăng rak tơniăn tro pơkâ tung pơla tâ phĭu pôk kô pro tơ’lêi hlâu mơnhông hnoăng cheăng teăng mâ dêi mâu kơ koan kuăn pơlê pôk, pro tơdroăng môi tuăn tung mâu rơxông kuăn pơlê.