Bêng Quy Nhơn cho môi tung mâu bêng rĕng tơbleăng pêi hbrâ rơnáu ăm hâi tâ phĭu pôk kăn. Sap ing apoăng hneăng, bêng hiăng hbrâ rơnáu tŭm Khu hnê mơhno cheăng ƀă Vi ƀan Tâ phĭu bêng, tơdrêng amê hlối mơjiâng 5 tiêuh ƀan ki hmâ tơbleăng tối mê cho: mâu ngế cheăng, khu ki tŏng gum; tơbleăng tơdroăng kal, hnê tố; pơkâ tơleăng mâu tơdroăng pơsăm tối, pơsăm tơkêng; gâk kring ƀă khăm pơlât.

Mâu tiêuh ƀan mê pơrá châ xoăng ăm tôh gum cheăng, xoăng nhên hnoăng cheăng ăm rêm khu, rak vế hbrâ rơnáu hdrối, môi tuăn tung hnê mơhno ƀă tơkŭm pêi pro.

Tiô túa pơkâ, a bêng kô ai 6 tíu tâ phĭu, tiô tối hdrối pôk xo 30 ngế kăn Hô̆i đong hnê ngăn Kuăn pơlê bêng hơnăm 2026–2031. A rôh hôp tơpui tơno rôh má môi, ai 48 ngế châ tơbleăng inâi. Tung mê vâi kơdrâi châ 45,8%. Kơxô̆ ngế hriâm klêi đăi hok ngi klêng cho hên. Đi đo ai mâ tung Vi ƀan tâ phĭu pôk kăn bêng Quy Nhơn pêi pro tơdroăng ki tơdah xo hồ sơ mâu ngế ki pơtroh vâ pro kăn tiô pơkâ, tơdrêng amê hlối hbrâ rơnáu tơbleăng pêi mâu tơdroăng xoăng cheăng ki pơtối rah xo inâi kuăn pơlê, vâ pêi pro tơniăn tro tơdroăng, tiô troăng ƀă tro tiô tơdroăng pơkâ thế dêi cheăng tâ phĭu pôk kăn. Pôa Nguyễn Đức Toàn, kăn pơkuâ Đảng ủi, Kăn hnê ngăn Vi ƀan bêng Quy Nhơn ăm ‘nâi:

“Bêng Quy Nhơn tơbleăng 48 ngế kăn, vâ Kuăn pơlê pôk 30 ngế tiô pơkâ, tơniăn tro tơdroăng tơbleăng inâi mâu kăn ai tŭm hiâm mơno lĕm, ivá pêi cheăng rơkê, mot pêi cheăng tung Hô̆i đong hnê ngăn bêng vâ gum kong pơlê mơjiâng kăn pơkuâ achê kuăn pơlê, tơkŭm mơnhông cheăng kâ pơlê pơla a kong pơlê. Pakĭng mê, ngin séa ngăn vâ pro mâu tôh tâ phĭu a 63 kơpong kơphô̆ ƀă séa ngăn, chêh inâi, pơkâ inâi kuăn pơlê a kong pơlê”.

Tiô pơkâ, a hneăng tâ phĭu khế 3 la ngiâ, kong pơlê Gia Lai ai 6 tíu tâ phĭu kăn Kuô̆k hô̆i, tiô tối hdrối pôk 16 ngế kăn. Ƀa Hô̆i đong hnê ngăn kong pơlê, tung lâp kong pơlê ai 18 tíu tâ phĭu, tiô tối kô pôk 85 ngế kăn, vâ ai tŭm inâi tung mâu tơdroăng pơkâ, kơxô̆ ngế thế rah xo tiô pơkâ.

Vâ hneăng tâ phĭu kô châ tơkŭm po tơniăn, ƀlêi chiâng, sap ing mơ’nui khế 11/2025, Khu pơkuâ ngăn Đảng Gia Lai hiăng po rôh hôp tơbleăng tơdroăng cheăng tâ phĭu tiô túa ki ‘no tơdrêng ing troăng hyôh internet troh 135 to cheăm, bêng. Troh nôkố, mâu tíu tơkŭm po tâ phĭu sap ing râ kong pơlê troh cheăm bêng hiăng châ séa ngăn tŭm, vâ ăm tơniăn, tơdâng tung hnê mơhno ƀă tơkŭm pêi pro. Khu ki ai mâ đi đo Vi ƀan Măt trâ̆n Tơnêi têa Việt Nam kong plê hiăng po mâu rôh hôp hnê tơdroăng cheăng ‘na cheăng tơbleăng ngế ki vâ pro kăn, môi tuăn tiô pơkâ, tơdroăng kal ƀă pơkâ thế mâu hvêa chêng prôk athế châ tơpui tơno nhên tiô pơkâ dêi luât.

La ƀă tơdroăng mê, cheăng hnê tối ‘na tâ phĭu châ mơdêk rơdêi, gum kuăn pơlê hlê nhên hnoăng, tơdroăng cheăng dêi tơná ƀă tơdroăng ki pơkâ thế ƀă mâu kăn kuăn pơlê pôk.

Nôkố, mâu cheăm bêng tung kong pơlê Gia Lai dế tơkŭm hnê cheăng ăm mâu tôh tâ phĭu, chêh klêi mâu ngế ki vâ pro kăn tiô pơkâ; tơdrêng amê hlối hbrâ mâu tơdroăng, túa pơkâ vâ tơniăn gâk kring, tơniăn pơlê pơla ƀă tơniăn khăm pơlât ăm hâi tâ phĭu. Apoăng khế 1/2026, Vi ƀan tâ phĭu kong pơlê Gia Lai hiăng po tơkŭm hên khu lăm ngăn cheăng hbrâ rơnáu a mâu cheăm, bêng vâ teăm ‘mêng, tŏng gum xơpá, vâ ăm tơniăn tro mâu tơdroăng ki hbrâ châ tơbleăng pêi kơtăng, tro pơkâ.

Séa ngăn nếo bêng Quy Nhơn, pôa Thái Đại Ngọc, Ngế cheăng tung Đảng, Kăn pơkuâ Đảng ủi, Kăn hnê ngăn Vi ƀan tâ phĭu kong pơlê Gia Lai pơkâ thế.

“Chêh nhên inâi, tơdroăng kố gá kal khât. Pro tiah lâi ôh ti ‘nâi, la athế rơkê, kuăn mơngế athế lĕm tro, ôh ti xê to tơdroăng pơkâ. Xua kố cho ngế ki teăng mâ ăm Kuăn pơlê. Mê tâi tâng khu pơkuâ tơdroăng cheăng kal kí sap ing kong pơlê troh cheăm bêng athế pêi pro kơtăng ‘na tơdroăng kố”.