Nôkố tung lâp kong pơlê hiăng ai lối 2.000 toăng hngêi hiăng pro klêi. Ai mâu tơring cheăm ki ‘nâ môi tiah pơlê kong krâm An Khê ƀă pơlê kong kơdrâm Pleiku hiăng pro klêi tơdroăng pơkâ. Ƀă kơlo tŏng gum 60 rơtuh liăn tung môi toăng hngêi pro ki nếo ƀă 30 rơtuh liăn tung môi toăng ‘mêng hngêi ki ton, mâu pơlê kong krâm, pơlê kong kơdrâm hiăng rơkê tung tơdroăng mơhnhôk tơlo kơxô̆ liăn, mơdêk hnoăng cheăng hbrâ rơnáu dêi kuăn pơlê.

Khu pơkuâ ngăn lêng kong pơlê Gia Lai ƀă mâu tíu pêi cheăng a kong pơlê veăng gum vâ chê 4 rơpâu hâi pêi cheăng, gum pơto chơ mâu hmốu, prêi, xơmong, pro hngêi ƀă séa ngăn mâu kế tơmeăm ki pro. Laga, kong pơlê Gia Lai xuân ối trâm pá xua yă mâu hmốu, prêi, xơmong, meăm to kơnâ, ôh tá ai ngế pro ƀă tơdroăng ki xo hdrối ối xơpá sap ing rơpŏng kuăn pơlê.

Vi ƀan hnê ngăn kong pơlê pơkâ thế mâu pơlê krâm, pơlê kong kơdrâm thăm séa ngăn, hnê mơhno ƀă rơkê tung tơdroăng ki xúa liăn vâ pro klêi túa pơkâ kố tro tơdroăng.