Tiô tơbleăng tơdroăng kuăn pơlê púi vâ, pâ thế dêi Kuô̆k hô̆i khế 10 ƀă 11 hơnăm kố, kuăn pơlê tung lâp tơnêi têa tối loi khât ƀă tơdroăng pơkuâ dêi Đảng, mơnhên tối khât troăng hơlâ pơhlêh nếo, klâ xoăng khu tơrŭm cheăng dêi khu pơkuâ tơdroăng kal kí tơkŭm, iâ, pêi cheăng xêt, tơƀrê. Tơdroăng pơtối pơhlêh nếo, klâ xoăng khu tơrŭm kơ koan cheăng dêi khu pơkuâ tơdroăng kal kí cho pâ thế cho kal tung tơdroăng ai khât nôkố, kuăn pơlê loi tơngah tơdroăng pêi pro troăng hơlâ mê kô pro ivá nếo ăm hnoăng cheăng rak vế, mơjiâng ƀă mơnhông tơnêi têa, pro ivá mơdêk vâ mơnhông tơƀrê, pêi klêi tâi tâng mâu tơdroăng vâ pêi cho Pơkâ Hneăng hôp mâu kăn lâp tơnêi têa rôh má 13 dêi Đảng hiăng mơ’no.

Tơdrêng amê, kuăn pơlê púi vâ drêng pêi pro troăng hơlâ tơkŭm klâ xoăng kơ koan cheăng ‘nâng ‘nâi, pêi cheăng châ xêt, tơƀrê, kal tơmâng ngăn troh tơdroăng ki rak vế hnoăng pơxúa ăm kăn ƀô̆, kong chưk, viên chưk, ngế pêi cheăng. A rôh hôp, pôa Lê Tấn Tới, Kăn pơkuâ Vi ƀan Cheăng lêng ƀă Gâk kring tối nhên:

“Klêi kơ’nâi trâm kuăn pơlê pơla kố nah. Á trâm kuăn pơlê Long An tối krê, tơbăng kroăng Cửu Long tối tơdjuôm mê ki tơƀrê má môi dêi kuăn pơlê Long An cho môi tuăn ƀă tơdroăng tơpui tối dêi pơlê pơla ‘na pro kơdroh kơ koan cheăng tiô Pơkâ 18 ai tơdjâk troh pơlê pơla gá hên. Ki hên cho kuăn pơlê vâ môi tuăn”.

A rôh trâm kuăn pơlê klêi kơ’nâi hneăng hôp má 8, Kuô̆k hô̆i hneăng 15, kuăn pơlê kong pơlê Dak Lak xuân tối loi khât ‘na tơdroăng mơgêi pêi pro Pơkâ 18/NQ-TW ‘na “Pơtối pơhlêh nếo, klâ xoăng, khu tơrŭm kơ koan cheăng dêi khu pơkuâ tơdroăng kal kí”. Kố cho rôh kăch măng ‘na pro kơdroh iâ khu tơrŭm kơ koan cheăng dêi khu pơkuâ tơdroăng kal kí, châ kăn ƀô̆, đảng viên, kuăn pơlê vâ ‘nâi. Kuăn pơlê Vũ Mạnh Khuông, a bêng Thàng Công, pơlê kong kơdrâm Ƀuôn Ma Thuột tơpui:

“Klâ xoăng kơ koan cheăng ing tơnêi têa troh kong pơlê gá tơtro khât ƀă hiâm mơno kuăn pơlê, kăn ƀô̆ xuân môi tiah kuăn pơlê vâi loi khât kơ Đảng, Tơnêi têa pêi pro klâ xoăng mâu khu xiâm pơkuâ kơvâ cheăng tơnêi têa vâ mơdêk troăng pơkâ dêi Đảng cho môi tuăn xêt tơƀrê. Rơhêng vâ tung la ngiâ ah, Đảng, Tơnêi têa pro kơtăng vâ tiah lâi pêi châ tiô tơdroăng púi vâ dêi kuăn pơlê”.

A rôh hôp, Vi ƀan pơkuâ Kuô̆k hô̆i pơkâ thế pêi rơkê tâ nếo tơdroăng cheăng ki hnê tối. Xua tơdroăng klâ xoăng kố gá tơdjâk troh kuăn mơngế, tơdjâk troh hnoăng pơxúa dêi kuăn mơngế. Kal hlá mơ-éa tối tơbleăng mâu tơdroăng dế trâm, xơpá ƀă mâu troăng hơlâ vâ pêi pro ƀlêi chiâng mâu troăng hơlâ klâ xoăng khu tơrŭm cheăng dêi khu pơkuâ tơdroăng kal kí ‘nâng ‘nâi, tơkŭm iâ pêi cheăng xêt, tơƀrê. Jâ Nguyễn Thị Thanh, Kăn phŏ hnê ngăn Kuô̆k hô̆i pơkâ thế ngăn nhuô̆m troăng hơlâ tơtro, tơ’lêi hlâu ăm mâu kăn ƀô̆ tung mâu ngế ki châ xing xoăng, kơdroh ƀiên chê̆, vêh pơkâ kăn ƀô̆, kong chưk, viên chưk, ngế pêi cheăng:

“Ngin tơmiât athế ai mâu troăng hơlâ tŏng gum rơdêi tâng vâ pơchông ƀă mâu troăng hơlâ tŏng gum ki môi tiah hdrối kố nah, vâ mơhnhôk mâu ngế ki ối 2 hơnăm, 3 hơnăm, 4 hơnăm vâi vâ lo pơtê ăm kăn ƀô̆ ối nếo, kăn ƀô̆ châ hnê ăm cheăng ối pêi cheăng mâu kăn ƀô̆ ki pin kal rak ƀă ôh tá chiâng vâ pơkâ mơ’no mâu kăn ƀô̆ ki pin kal pơhlêh cheăng ‘na kơvâ cheăng ki ê”.

Tơpui a rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế rĕng pro klêi mâu tơdroăng pơkâ, tơdroăng mơ’no thế pêi, ‘mâi rơnêu mâu luât ki ai tơdjâk, vâ pơhlêh nếo, klâ xoăng khu tơrŭm cheăng kơ koan ‘nâng ‘nâi, tơkŭm, pêi cheăng xêt, tơƀrê. Kăn xiâm hnê ngăn Kuô̆k hô̆i pơkâ thế pôi tá ăm ai xếo tơdroăng ki pơsăm tối ki hiăng ton; mơhno nhên mâu kơ koan ai pôu râng dêi hnoăng, ai hnoăng pơkuâ pơkâ tơleăng mâu tơdroăng pơsăm tối kơdrâm mơngế; malối cho athế séa ngăn kong pơlê vâ ai troăng pơkâ tơleăng tro, ‘ló ƀă klêi hlối ing kong pơlê:

“Séa ngăn vâ pơkâ tơleăng ăm gá tro ‘ló. Tâng vâi pơsăm tối khât mê nếo klâ xoăng, tơpui tối leăng. Tơnêi têa pơkâ tơleăng tơdroăng klâi, kong pơlê athế pơkâ tơleăng tơdroăng klâi vâ pơkâ tơleăng klêi hlối. La pakĭng mê athế tăng ‘nâi mâu ngế ki lâi cho pơsăm tối, cho xua ing ngế ki ‘mêi mơhnhôk ƀă hên tơdroăng ki ê mê athế pơxâu”.

Xuân a rôh hôp kố, Vi ƀan pơkuâ Kuô̆k hô̆i hiăng têk kŏng môi tuăn ƀă tơdroăng Pơkâ ‘na xing xoăng, mơjiâng tíu pêi cheăng râ tơring, râ cheăm pơla hơnăm 2023 – 2025 dêi kong pơlê Ninh Bình.