Tiô mâu kăn, têa ngeăm ai xik cho môi tung mâu xiâm kối pro chiâng rơlối kâng, piê, kố cho mâu tơmeăm ôu ki pá vâ kâi mơdât xik tung châ. Jâ Nguyễn Kim Thúy, ngế ki o ing Đà Nẵng; jâ Nguyễn Thị Lệ Thủy, ngế ki lo ing Bến Tre tối leăng:

''Tơdroăng ki ôu têa ngeăm ai xik gá cho ki xiâm ‘na tơdroăng ki ai pơreăng ôh tá tâ tú môi tiah: plâi nuih, nŭm nheăm ƀă hên ki ê xua pro ai hên xik mot tung châ hên xôh kơlo ki kal. Xua mê, khu ngăn pơkeăng ƀă khăm pơlât lâp plâi tơnêi ƀă mâu khu ki pêi dêi hnoăng cheăng rak ngăn ivá, pâ thế ƀă Chin phuh mâu tơnêi têa xúa troăng nâp hnoăng liăn mơhá ƀă mâu kế ôu ki ai xik, vâ pơkâ troăng tơdroăng ki ôu kâ”.

Mâu kăn hiăng môi tuăn ‘na tơdroăng nâp hnoăng liăn mơhá ƀă mâu têa ngeăm, drôu ƀiê̆r vâ kơdroh iâ tơdroăng ki ôu drôu ƀiê̆r. Laga, vâ kuăn pơlê kơdroh ôu drôu ƀiê̆r ôh ti xê to ƀă tơdroăng ki pơkâ thế nâp hnoăng liăn mơhá mê kal thăm mơdêk pơxâu phâk liăn, hlối ƀă tơdroăng ki hnê tối, pơxâu phâk liăn. Mâu kăn rơtế vâ môi tuăn thăm mơdêk nâp hnoăng liăn mơhá tiô troăng pơkâ ƀă drôu, la ƀă ƀiê̆r kal athế séa ngăn nhên hên xôh. Pôa Hoàng Văn Cường, ngế ki lo ing Pơlê kong kân Hà Nội pơkâ thế:

"Pin kal séa ngăn túa pơkâ mơdêk ‘na nâp hnoăng liăn mơhá ƀă ƀiê̆r. Tiô á pin kal athế mơdêk, la kơxô̆ mơdêk hên má môi cho drôu gá rơdêi tâ, klêi mê ƀiê̆r cho iâ tâ pá xôp 20 đô̆ ƀă iâ tâ nếo cho ƀiê̆r. Môi tiah mê nếo tơtro”.

‘Na mot tơ’nôm kơlo nâp hnoăng liăn mơhá ƀă hât, tiô mâu kăn, kal athế mơdêk kơlo nâp hnoăng liăn mơhá ƀă hât. Xua ôu hât gá pro 28 khu pơreăng. Tiô riân nhên, Việt Nam ai lối 84.500 ngế hlâ xua ôu hât ƀă 18.800 ngế hlâ xua ôu hât ki ôh tá vâ. Laga, pơkâ thế séa ngăn nhên, malối cho ki tơdjâk ‘mêi troh tê mơdró ƀă khu mơdró kâ, pro tơ’lêi hlâu ăm hât châ roê ‘mot ôh tá tro luât. Pôa Trịnh Xuân An, ngế ki lo ing Đồng Nai pơkâ thế:

"Á vâ ‘nâi plĕng khât mê cho tơdroăng ki tơdjâk ‘mêi ƀă kuăn pơlê ƀă mâu khu mơdró kâ pro hât. Nôkố mâu khu mơdró kâ veăng nâp liăn ối má pơtăm, má tơdrốu, la tâng môi tiah kố mê kô pro tơ’lêi hlâu ăm tơdroăng ki pro pơxúa phá dêi pó hngế, mê mơhnhôk ăm tơdroăng ki tê mơdró ôh tá tro luât, tơdjâk troh tơdroăng cheăng lêng, gâk kring. Kố cho tơdroăng ki athế hriăn plĕng, kal vêh tối troăng prôk ăm tơtro, vâ pin rế châ xo liăn ngân rế rak vế tơniăn ăm khu mơdró kâ ai tíu pêi cheăng, rế ôh tá tơdjâk troh kuăn pơlê pêi tung kơvâ pêi chiâk deăng ƀă malối cho ví tơdroăng mơhnhôk ăm tơdroăng tê mơdró ôh tá tro luât”.

Tơpeăng ƀă dêi rơpó a Tíu hôp, pôa Trương Trọng Nghĩa, ngế ki lo ing Pơlê kong kân Hồ Chí Minh tơpui leăng:

"Tiah lâi ôh tá mơnhên troh hơnăm 2045, 100 hơnăm mơjiâng tơnêi têa mê Việt Nam kô chiâng môi tơnêi têa ôh tá ôu hât. Mâu tơnêi têa ki ê vâi xuân dế vâ pro troh tơnêi têa ôh tá ôu hât. Á môi tuăn cho athế kal tơmiât nhên troăng prôk, la á tối tiah kố athế kơtăng tung tơdroăng kố ƀă pôi tá tơmiât hên troh tơdroăng xua xâu tê mơdró ôh tá tro luât mê pin tơ’lêi pêi tung tơdroăng kố”

Tơpui tối leăng a rôh hôp, pôa Hồ Đức Phớc, Ngế pro xiâm phŏ hnê ngăn, ngế xiâm ngăn liăn ngân pro nhên tơdroăng pơkâ kơlo nâp liăn mơhá ƀă kơvâ hât kố:

"Hât gá tơdjâk ‘mêi ó khât, ƀă pin athế chiâng mơhrê dâng 1 rơtal dollars Mih ăm tơdroăng ki pơlât tơdjâk troh ki ‘mêi dêi hât pro. Hât a Việt Nam ai yă tê rơpâ bu ing 6 rơpâu troh 20 rơpâu liăn xo, tung tơdroăng ki 7 rơpâu liăn nâp hnoăng mơhá ăm môi tơdrong hât, tung pơla a Singapore mê athế riân 200 rơpâu liăn nâp mơhá a tơdrong hât. Xua mê, nâp liăn mơhá ƀă hât cho tơdroăng ki tiah mê”.

Jâ Đào Hồng Lan, ngế xiâm ngăn pơkeăng pơlât môi tuăn ƀă tơdroăng ki xiâm, túa tơmiât ƀă tơdroăng ki kal pơkâ kơxop hlá mơ-éa Luât nâp hnoăng mơhá tê roê ki ‘mâi pơhlêh, malối cho troăng pơkâ thăm mơdêk nâp hnoăng liăn mơhá ƀă mâu tơmeăm ki ai tơdjâk ‘mêi troh ivá châ chăn môi tiah hât, drôu ƀiê̆r, ƀă ‘mot tơ’nôm kế ôu ki ai xik tung inâi nâp hnoăng liăn mơhá. Ngế xiâm pơkuâ mơ’no tối mâu tơdroăng ki mơhno ăm hlo ki kal athế mơdêk nâp hnoăng liăn mơhá ƀă hât. Xua ôu hât gá pro chiâng 28 khu pơreăng. Tiô riân ngăn, Việt Nam ai lối 100 rơpâu ngế hlâ xua ôu hât.