A rôh trâm mâ kuăn pơlê cheăm Đưng K’Nớ, tơring Lạc Dương, kong pơlê Lâm Đồng, kuăn pơlê pâ thế Tơnêi têa kal rĕng pro klêi troăng Trường Sơn Đông, troăng ki lăm ngi kong pơlê 722 tơkâ luâ kong pơlê vâ mơdêk rơdêi tơdjêp tê mơdró ‘no liăn pro hngêi trăng, troăng klông, malối cho troăng on tơhrik 3 pha rak tơniăn gum pêi cheăng kâ ƀă tơdroăng rêh ối, mơdêk tơdroăng cheăng kâ rêh ối pơlê pơla mơnhông ƀă hên ki ê.

Kuăn pơlê a kố vâi kal vâ ‘nâi plĕng khât troh hnoăng cheăng pơkuâ ngăn rak vế kong ƀă mâu troăng hơlâ tŏng gum pro pơxúa tơdrêng ing kong vâ mơdêk pêi lo liăn, tơniăn tung tơdroăng rêh ối. Kuăn pơlê tối, troăng ‘no mơhá ăm tơdroăng ki rak ngăn kong hiăng châ tơbleăng tung hên hơnăm kố, laga xua a cheăm ôh ti ai hngêi kơmăi on tơhrik mê kơxô̆ liăn kuăn pơlê châ xo ing troăng tŏng gum kố iâ tâ tâng pơchông ƀă hên tíu ki ê.

Kuăn pơlê ƀon Niêng Oanh, a thôn 1, cheăm Đưng K’Nớ pâ thế, Tơnêi têa kal athế séa ngăn vâ ai tơdroăng ki tơdâng tơ’mô, tơtro tâ tung ‘no mơhá liăn xo rak ngăn kong, ai tiah mê ‘nôi kuăn pơlê nếo kâi rak ngăn kong nếo cheăng kâ rêh ối.

“Tơdroăng ki ‘no mơhá liăn ăm tơdroăng ki rak ngăn kong mê cheăm ngin bu châ pơxúa iâ khât tâng vâ pơchông ƀă mâu cheăm ki ê, gá ôh tá tơtro. Tung pơla mê, ki hên kuăn pơlê tíu kố pơrá ngăn tung hnoăng pơkuâ pơkuâ rak ngăn kong mê trâm hên xơpá. Ngin púi vâ kal ‘mâi rơnêu yă ‘no mơhá ăm tơdroăng ki rak ngăn kong”.

Tơpui a rôh trâm kuăn pơlê, pôa Phan Đình Trạc, Ngế cheăng tung Khu xiâm kal kí, Kăn pơkuâ ngăn xiâm Đảng, Kăn pơkuâ cheăng Tơnêi têa tối tiah kố mâu rơkong tơpui tối dêi kuăn pơlê cho tơtro khât. Khu kăn Kuô̆k hô̆i kong pơlê Lâm Đồng kô pâ thế mâu kơ koan, tíu pêi cheăng ki ai tơdjâk séa ngăn, pơkâ tơleăng, tŏng gum, hlối hriăn ngăn tơ’nôm mâu troăng hơlâ vâ rak vế tơniăn tơdroăng rêh ối cheăng kâ krá ton ăm kuăn pơlê ki rak ngăn kong.

“Tíu ki lâi rak ngăn kong krâu la ôh tá ai hngêi kơmăi on tơhrik, kế tơmeăm rơpâ mê vâi krâ nhŏng o ko ‘nhiê kong kô pro lŭp kân lơ mơdêk liăn ‘no mơhá ăm tơdroăng ki rak ngăn kong gá chía tro lŭp iâ tâ? Tơdroăng kố pin athế tơmiât vâ tơdroăng ki mơ’nui cho châ rak kong prâi tơnêi tơníu. Malối, athế hnê mơhno kuăn pơlê pro tiah lâi tăng hlo mâu nhâ loăng pơkeăng kơnía pêt a kơdâm kong, vâ vâi krâ nhŏng o rế rak ngăn kong, rế pêt, pui xo nhâ loăng pơkeăng ki mê vâ mơdêk tơdroăng rêh ối. Á tơmiât tiah kố, cho ai túa pêi ki mê ‘nôi nếo châ rak kong ƀă mơdêk pêi lo liăn”.

A rôh trâm mâ kuăn pơlê cheăm Ka Đơn, tơring Đơn Dương, kuăn pơlê tối tơdroăng ki môi tuăn, loi ƀă mơnhên tối khât klêi kơ’nâi pêi pro hnoăng cheăng hbrâ mơdât kâ kơluâ, malối cho khŏm mơ-eăm tung pêi pro ‘nâng ‘nâi tơkŭm khu pêi cheăng kơ koan dêi Đảng, Tơnêi têa. Tơdrêng amê kuăn pơlê pâ thế ƀă Khu kăn Kuô̆k hô̆i kong pơlê Lâm Đồng hên tơdroăng ki ôh tá tơniăn tung pêi pro Luât Tơnêi, Luât Khu pêi cheăng tơrŭm, tơdroăng ăm mung, pơhlêh yă tơnêi ƀă mâu tíu ki dế pêi mơjiâng kế tơmeăm.

Kuăn pơlê pơtối pâ thế kal tơmâng ngăn ‘no liăn, ‘mêng rơnêu troăng prôk lăm ngi klâng chiâk, kông kuăn pơlê prôk tơkâ, pro tơ’lêi hlâu mâu mơ-éa, tơdroăng ki ‘nhiê tah hngêi xi kơchoh, tơ’nhiê, kơjo gum kơxô̆ liăn mung vâ pêi cheăng kâ ƀă hên tơdroăng ki ê. Rơhêng vâ tối, kuăn pơlê tối ối ai mâu tơdroăng ki khu kăn ƀô̆, chêh bro, hbru ăm hlá mơ-éa rak xúa tơnêi ối pro pá, pro kuăn pơlê prôk lăm hên xôh.

Tiô pôa Phan Đình Trạc, Ngế cheăng tung Khu xiâm kal kí, Kăn pơkuâ ngăn xiâm Đảng, Ngế xiâm pơkuâ cheăng Tơnêi têa, kố cho mâu tơdroăng ki kal, tơdjâk troh tơdroăng cheăng ƀă tơdroăng rêh ối dêi kuăn pơlê, kal châ kơvâ cheăng, mâu khu râ tơmâng tŏng gum. Tung mê, nhôm ai tơdroăng ki ôh tá tơniăn dêi tung pơkâ tơleăng mâu hlá mơ-éa, ối pro pá puât ăm kuăn pơlê, kal châ séa ngăn pêi pro nhên ƀă pơkâ tơleăng kơtăng.

“Hô sơ ki chêh bro a môi tíu mê mơdrếo hên xôh, mê nếo pro ăm ngế ki ê ‘nâi hô sơ dêi ngế ki pơtroh, ôh tá tơbleăng ăm ngế ki pơtroh hô sơ mê tơbleăng ing ngế ki pro pơxúa ăm dêi tơná, ing tíu ngế ki ê. Mê chiâng vâ tối ‘na ivá cheăng, hnoăng cheăng pôu râng ƀă kuăn pơlê, lơ cho pa rŏng mê ai tơdroăng ki ôh tá tơniăn há? Nôkố, pôa Tô Lâm, Kăn xiâm pơkuâ hnê ngăn Đảng hên rôh tối nhên, ƀă pin khŏm mơ-eăm pêi môi rôh kăch măng ‘na tơrŭm khu kơ koan dêi tơnêi têa, ‘nâng ‘nâi, tơkŭm rơkê plĕng tung mâu kăn ƀô̆ kong chưk, mê pin vâ môi tiah kố cho pêi pro tro tơdroăng púi vâ. Á pơkâ thế pin kal pêi pro nhên tơdroăng kố, tâng ai tơdroăng ki ôh tá tro mê pơxâu phâk troh tui ƀă tơbleăng ăm vâi krâ nhŏng o kuăn pơlê akố”.