Hbrâ pêi mâu tơdroăng troh hneăng hôp kân má 14 ôh tá xê to tơkôm kơdrâ mê hiăng ƀă dế châ pêi ƀă mâu tơdroăng mơhnhôk, pêi ai pơxúa rơtế ƀă tơdroăng rêh ối. A hên cheăm bêng tung kong pơlê Dak Lak, tơdroăng mơhnhôk mơjiâng tơdroăng rêh ối, ‘mâi rơnêu pro kơphô̆, rak lĕm hyôh kong prâi, mơjiâng khu tơrŭm môi tuăn tâi tâng hdroâng mơngế châ mơdêk pêi pro mâu “tơmeăm khoăng tro tuăn kuăn pơlê” koh hâk hneăng hôp kan.

A tôh dân phô̆ 6A, bêng Thành Nhất, tơdroăng sôk ro koh hâk hneăng hôp kân 14 châ mơhno nhên ing mâu tơdroăng xua chi ƀô̆ ƀă tôh dân phô̆ mơhnhôk. Pôa Nguyễn Ngọc Thu, Kăn hnê ngăn Chi ƀô̆, Tôh trương tôh dân phô̆ 6A ăm ‘nâi:

 "Vâ troh hbeăng hôp kân Đảng rôh má 14, Tôh tôh kơphô̆ 6A hiăng mơhnhôk mơjiâng tơdroăng rêh ối lĕm tro kơpong kuăn pơlê ối. Pro troăng chúa hlá cờ mơhnhôk kuăn pơlê pro troăng lĕm a mâu hơlâ troăng ngiât, krúa, lĕm koh hâk troh hneăng Hôp kân. Kuăn pơlê tơngah khât hlối loi tâi tâng a hneăng Hôp mê ƀă  hlối phiu ro. Púi tơngah hneăng hôp mê kô klêi tơniăng tâ nếo, pro pơxúa ăm kuăn pơlê”.

A mâu pơlê kuăn ngo, malối cho kơpong tơkăng kong, tơdroăng pêi mâu tơdroăng cheăng vâ troh hneăng Hôp kân châ pơtôu hiâm mơno hâk vâ, malối tung mâu đoân viên, droh rơtăm  ai tuăn vâ kơdôu mơ-eăm, vâ tăng troăng pơxiâm pêi cheăng. A ƀuôn Drang Phôk, cheăm Buôn Đôn, hơnăm ối nếo hiăng rah xo túa koh hak hneăng hôp kân ƀă tơdroăng pêi pro ki nhên, hlối mơjiâng pơlê rơkê plĕng, mơnhông krá ton. Nâ H’Ly A Knul, Kăn hnê ngăn Chi đoân ƀuôn Drang Phôk, cheăm Ƀuôn Đôn, kong pơlê Dak Lak tối:

 “Mâu đoân viên droh rơtăm ƀuôn Drang Phôk hiăng hơ’lêh tơdroăng cheăng mơgrúa lĕm pơlê, hnê tối ăm kuăn pơlê vâ koh hâk hneăng Hôp Kân tâi tâng tung lâp tơnêi têa rôh má 14 dêi Đảng. Ngin tơngah hneăng hôp la ngiâ kô ai hên tơdroăng pơkâ tŏng gum ăm mâu hơnăm ối nếo kơpong tơkăng kong ai rôh tơ’lêi châ pơxiâm pêi cheăng hlối mơnhông cheăng kâ ăm rơpŏng hngêi ƀă pơlê”.

Sap ing mâu tơdroăng pêi pro ai pơxúa ăm hlo, hneăng hôp kân 14 cho tíu tơngah tuăn loi khât, cho tíu ki pơtroh tơdroăng tơngah ‘na luât tŏng gum ai pơxúa khât, malối ƀă mâu kơpong kuăn ngo, kơpong hơngế, hơngo, tíu tơkăng kong.

Tơdrêng ƀă kuăn pơlê, mâu kăn ƀô̆ tíu pêi cheăng - mâu ngế ki tơbleăng troăng hơlâ pêi pro dêi Đảng tung tơdroăng rêh ối - xuân dế séa ngăn Hneăng hôp ƀă hên tơdroăng tơkôm tơngah. A bêng Ea Kao, tơdroăng tơngah mê rơtế ƀă tơdroăng pâ thế hơ’êh nếo tuăn tơmiât pơkuâ hnê, pê klêi luât pơkâ, luât tŏng gum, pro xiâm ki mơhnhôk ăm kăn ƀô̆ khên tơmiêt, khên pêi, khên pôu râng xua vâ mơnhông dêi bêng. Pôa Đặng Gia Duẩn, Kăn hnê ngăn Đảng ủy bêng Ea Kao, kong pơlê Dak Lak tối:

"Hneăng hôp kô tơpui ‘na mâu tơdroăng ki kal dêi tơnêi têa, tung mê ngin púi vâ kô ai mâu tơdroăng tơmâng hên tâ troh mâu kăn ƀô̆ râ cheăm, bêng. Mơhé cho kăn ƀô̆ râ cheăm hdrối nah lơ kăn ƀô̆ râ kong pơlê, râ tơring troh mê á tơmiât tiah kố rêm kăn ƀô̆ xuân ối tơdroăng púi vâ, vâ dêi bêng tơná mơnhông tơƀrê. Tiah mê pơtôu hiâm mơno ai tơdroăng púi vâ mê môi tiah lâi mê kal ‘mâi tơdroăng cheăng pêi rơdêi ki lâi, kal mâu luât pơkâ ăm mâu kăn ƀô̆ hriăn plĕng, rơtế ƀă xoăng râ, xoăng hnoăng chiâng pâ mâu luât pơkâ, luât tŏng gum ki tơdjâk troh cheăm bêng pin vâ mơnhông tơƀrê”.

Ing kơphô̆ troh thôn pơlê, ing kơpong tơbăng troh kơpong tơkăng kong, mâu tơdroăng tơngah mê dế tơkŭm chiâng môi troăng tơdjuôm: tuăn loi a Đảng, a troăng ki mơnhông tơnêi têa tung hơnăm nếo la ngiâ. Ƀă Dak Lak - kong pơlê ki ai hên hdroâng kuăn ngo rơtế rêh ối tơdjuôm, hên tơmeăm khoăng vâ mơnhông la xuân hên pơloăng mơnúa - Hneăng hôp 14 châ kuăn pơlê tơngah khât kô po troăng pêi ki nếo tung mâu tơdroăng cheăng, pro xiâm mơhnhôk pêi ki nếo vâ Dak Lak tối krê ƀă mâu kong pơlê ki ê tung lap tơnêi têa tối tơdjuôm mơnhông rĕng tơbrê ƀă krá ton tung mâu hơnăm la ngiâ.