Xông tơpui hnê mơhno, Kăn xiâm hnê ngăn Kuô̆k hô̆i tối nhên, môi luât ki lĕm athế "krá ing troăng hơlâ, krá tung tơdroăng pêi pro, môi tuăn tung tơdroăng pêi pro, tơdrăng tung tơdroăng pêi pro". Kố xuân cho tơdroăng pơkâ mơ'no vâ tơdroăng cheăng mơjiâng luât rế hía rế tơtro ƀă tơdroăng rêh ối, ƀă mâu tơdroăng ki kuăn pơlê ƀă khu mơdró kâ kal vâ ‘nâi.

Tiô pôa Trần Thanh Mẫn, Kăn xiâm hnê ngăn Kuô̆k hô̆i, tơdroăng mơjiâng luât ki hdrối tâ thế pơxiâm ing ki dâi lĕm troăng hơlâ, ôh tá xê kơxô̆ luât pơkâ. Rêm tơdroăng tơkêa luât kal mơnhên dế tơleăng tơdroăng klâi dêi tơdroăng rêh ối, xua ti lâi kal 'mâi rơnêu luât, troăng hơlâ nếo pro pơxúa ki klâi, tơdjâk troh kơbố, kơxô̆ liăn pêi pro ti lâi, kơxô̆ liăn pêi pro ing lâi ƀă kơ koan ki lâi pôu râng hnoăng cheăng.

Malối, mâu kăn kal tơkŭm tơpui tơno mâu troăng hơlâ ki ối ai rơkong tơpui tối phá tơ-ê dêi pó, mâu tơdroăng ki tơdjâk tơdrêng troh kuăn pơlê, khu tê mơdró; mâu troăng hơlâ ki nếo tá hâi ai hdrối lơ tá hâi châ séa ngăn tŭm. Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế tơdroăng cheăng mơjiâng luât thế mơhno tuăn tơmiât ki nếo, tung mê, luât tơkŭm a mâu tơdroăng ki ối tung hnoăng pơkuâ dêi Kuô̆k hô̆i, ai tơdroăng pơkâ ƀă tơniăn. Tơdroăng ki châ tối nhên cho luât chiâng iâ la ôh tá chiâng iâ 'na troăng hơlâ; pơkâ iâ la hnoăng cheăng thế nhên. Luât athế tiô tơdroăng rêh ối, la ôh tá xê ƀă tơdroăng ki pơhlêh luât đi đo.

“Mâu tơdroăng ki tơdjâk troh hnoăng kuăn mơngế, hnoăng kuăn pơlê, tơdroăng tê mơdró, xing xoăng kơxô̆ liăn, tơkŭm hnoăng pơkuâ ƀă pôu râng hnoăng cheăng dêi kơ koan tơnêi têa thế châ pơkâ nhên nhên tung luât. Tơkéa vâ tối, ôh tá chiâng 'mot tung luât lối hên tơdroăng pêi cheăng 'na kih thuât lơ mâu tơdroăng ki hmâ hơ'lêh. Hiâm mơno luât iâ tâ la ôh tá iâ 'na troăng hơlâ; pơkâ iâ tâ la pôu râng hnoăng cheăng thế nhên; tơniăn tâ la xuân ối ai tŭm ivá vâ hơ'lêh ƀă tơdroăng ki ai khât. Luât thế tiô tơdroăng rêh ối, la tiô tơdroăng rêh ối ôh tá tơ'mô ƀă tơdroăng pêi pro tiô tơdroăng rêh ối ƀă tơdroăng 'mâi rơnêu luât đi đo”.

Ƀă kuăn pơlê, ki tơniăn tro dêi môi luât pơkâ ôh tá xê to mơhno a mâu tơdroăng ki châ Kuô̆k hô̆i tơbleăng, mê ki kal tâ cho drêng mot tung tơdroăng rêh ối, luât ai xêt khât pơkâ tơleăng tơdroăng lơ ôh, hnoăng ƀă ki pơxúa tro luât dêi kuăn pơlê ai châ rak tơniăn lĕm tâ há lơ ôh. Pôa trần Thanh Mẫn, Kăn xiâm hnê ngăn Kuô̆k hô̆i pơkâ thế thế séa ngăn nhên rêm tơdroăng pêi pro luât; rak tơniăn tro ƀă túa pơkâ khu kăn pơkuâ kong pơlê péa râ ƀă pơkâ thế pơtối mơdêk xing xoăng râ, xing xoăng hnoăng. Xing xoăng râ ôh tá xê to pơcháu hnoăng cheăng mê athế prôk rơtế ƀă kơxô̆ liăn, tơdroăng kal ƀă hnoăng cheăng pôu râng.

“Kuô̆k hô̆i chêh pro luât vâ tơleăng mâu tơdroăng ki ai khât, rak vế hnoăng ƀă pơxúa tơtro luât ăm kuăn pơlê, lêi tah mâu tíu kreăng, pro tơniăn lĕm ‘na kơxô̆ liăn ‘no hrê, po troăng ăm mơnhông mơdêk. Mâu tơdroăng pơkâ má mơ'nui ôh tá xê tơbleăng châ to lâi luât, mê cho klêi kơ'nâi luât pơkâ, khu pêi cheăng ai pêi cheăng lĕm tro há lơ ôh, kuăn pơlê ƀă khu mơdró kâ hôm tơ'lêi hlâu há lơ ôh, ivá cheăng dêi pơlê pơla hôm châ mơdêk há lơ ôh, ivá pơkuâ ngăn tơnêi têa hôm châ mơdêk há lơ ôh. Môi luât pơkâ ki lĕm athế "krá ing troăng hơlâ, krá tung tơdroăng pơkâ, môi tuăn tung tơdroăng pơkâ, tơdrăng tung pêi pro".

Kăn xiâm hnê ngăn Kuô̆k hô̆i rơhêng vâ rêm rơkong tơpui tối dêi mâu kăn a hneăng hôp ôh tá xê pơtê to a tơdroăng ki chêh tối, mê athế pơxiâm ing tơdroăng ki hriăn plĕng 'na hồ sơ, séa ngăn tơdroăng ki ai khât ƀă pơkâ tung tâi tâng luât ki hiăng môi tuăn. Mâu tơdroăng tơkêa bro luât tá hâi rak tơniăn tro 'na troăng hơlâ luât pơkâ, séa ngăn tơdroăng ki tơdjâk, tơdroăng ki tơrŭm trih mâu luât ki ê lơ tơdroăng pêi pro mê kal pơtối chêh pro klêi. Ƀă kuăn pơlê, kố cho tơdroăng ki vâ mơnhên ki kal dêi tơdroăng cheăng mơjiâng luât. Môi luât pơkâ bu ai pơxúa khât drêng gum ăm kơ koan cheăng tơnêi têa pêi cheăng tơƀrê tâ, kuăn pơlê ƀă khu mơdró kâ tơ'lêi hlâu tâ, kơxô̆ liăn pơlê pơla châ