A ilâng kiâ mố đô̆i Bảo Lộc, tíu ki ối pơtê dêi 740 ngế mố đô̆i ki hlâ, tung mê 102 to tơnâp ki tá hâi 'nâi nhên inâi, khu kăn pơkuâ cheăm tơrŭm krá tơniăn ƀă khu lêng kong pơlê Lâm Đồng pêi pro tơdroăng xo kơxêng, xâk. Jâ Nguyễn Thị Huyền Phương, Kăn phŏ hnê ngăn Vi ƀan bêng 3 - Bảo Lộc, tối ăm ngin 'nâi:

“Tơkŭm po tơdroăng xo kơxêng, xâk a Ilâng kiâ mô đô̆i Bảo Lộc, Vi ƀan bêng hiăng hnê mơhno Khu pơkuâ ngăn lêng bêng 3 - Bảo Lộc rak tơniăn tơmeăm khoăng, tŭm tơdroăng vâ tơrŭm ƀă Khu pơkuâ ngăn lêng kong pơlê tơkŭm po xo xâk, kơxêng mô đô̆i hlâ tung tơplâ xâ, veăng mơnhên inâi mâu Ngoh khên tơnôu hlâ tung tơplâ xâ, djâ mâu ngoh vêh ƀă rơpŏng hngêi, mơhno khôi túa, vêa vong 'Nâi pâ kơ mâu ngế ki ai hnoăng dêi hdroâng mơngế”.

Tơdroăng cheăng châ tơbleăng pêi pro tơdrêng a 11 ilâng kiâ mố đô̆i tung kong pơlê Lâm Đồng. Klêi kơ'nâi pêi pro, 4.776 to tơnâp kiâ mố đô̆i tá hâi 'nâi inâi châ chiâ xo, xo mơheăm. Tung mê, 3.625 to tơnâp ai mơheăm tŭm tơdroăng vâ séa ngăn ADN. Đăi tă Phạm Văn Soái, Kăn phŏ pơkuâ tơdroăng kal kí, Khu xiâm pơkuâ ngăn lêng kong pơlê Lâm Đồng, tối ăm ngin 'nâi:

“Lâm Đồng cho môi tung mâu kong pơlê pêi klêi rĕng má môi tơdroăng xo kơxêng, xâk. Tơdroăng kố châ chiâng pêi pro kơnôm ing tơdroăng tơmâng ngăn dêi Khu kăn pơkuâ hnê ngăn Đảng kong pơlê, Hô̆i đong hnê ngăn, Vi ƀan hnê ngăn, Vi ƀan Măt trâ̆n Tơnêi têa Việt Nam kong pơlê; ki rơhêng vâ tối cho tơdroăng kơdo mơ-eăm, khŏm pêi pro tơdrêng, mê cho hnoăng cheăng dêi mâu kăn ƀô̆, mâu lêng dêi kong pơlê. Maluâ kong prâi ôh tá tơniăn, tô mêi, ối hên tơdroăng pá puât ki ê, ngin xuân mơ-eăm pêi klêi hnoăng cheăng rĕng má môi”.

Tâng a mâu ilâng kiâ, xơpá cho pơkâ rơhí rơhó 'na hnoăng cheăng pêi pro, hâi khế, mê tí tăng mâu kơxêng kiâ mố đô̆i pá kong tơnêi tơníu ối tơvâ tơvân tâ. Klêi kơ'nâi chât hơnăm, tơnêi tơníu, kong kế, ngo ngối hên tíu hiăng hơ'lêh; tíu ki 'măn hdrối nah mơni hiăng cho kong loăng, tơnêi pêi chiâk, kơpong kuăn pơlê rêh ối lơ hngêi nhĕng. Tơdroăng chêh tối ki hên kơnôm a hlá mơ-éa ton nah, tơdroăng tơmiât dêi mố đô̆i hơnăm hiăng krâ ƀă kuăn pơlê, tung pơla ngế ki châ hlo rế hía rế iâ. Kong mêi ton pro tơdroăng lăm tăng, lăm ngăn, chiâ tăng a ngo ngối, tơnêi pêi chiâk thăm pá puât; ai tíu ki 'nâ thế mơnhên hên hdroh, po rơdâ kơpong tí tăng hlo kơxêng, hlo xâk, tơmeăm ki ê.

Ƀă mâu kăn ƀô̆, mâu lêng ki pêi pro tơdrêng, kố ôh tá xê to hnoăng cheăng ki kal mê ối cho hnoăng cheăng ƀă mâu ngế ki hiăng hlâ. Thươ̆ng tă Phạm Ngọc Khánh, Kăn phŏ pơkuâ ngăn Đảng Khu pơkuâ ngăn lêng gâk kring kơpong 1 Đức Trọng, kong pơlê Lâm Đồng, tối ăm ngin ‘nâi:

"Ƀă rêm ngế kăn drêng châ pơcháu hnoăng cheăng, ngế ki lâi xuân hâk tơngăm ƀă hlê plĕng nhên hnoăng cheăng drêng châ loi tơngah pơcháu pêi pro môi hnoăng cheăng ki kal kân khât".

Tơkâ hluâ mâu hâi kong mêi khía, Lâm Đồng hiăng pêi kêi đeăng rĕng dâng 3 khế tơdroăng tí tăng xo kơxêng, xâk a 11 tíu 'măn kơxêng kiâ mố đô̆i. 3.625 kơxêng kiâ mố đô̆i châ pơcháu ăm séa ngăn ADN, po tơ'nôm tơdroăng pói tơngah mơnhên inâi ăm mâu tíu 'măn kơxêng kiâ ki tá hâi ai inâi, tơdrêng amê hlối tŏng kum ăm tơdroăng tăng, tơkŭm mâu mố đô̆i ki ối tung kong tá hâi 'nâi tíu ối.

Peăng ngiâ xuân ối hên hnoăng cheăng, la ƀă tơdroăng khŏm mơ-eăm ƀă pôu râng hnoăng cheăng, troăng prôk djâ mâu mố đô̆i ki hlâ vêh a hngêi ƀă inâi, rơpŏng hngêi ƀă pơlê xiâm xuân dế châ pơtối rêm hâi.