Pơto lối 15.400 mauh kơxêng kiâ, xâk kiâ mô đô̆i ki hlâ tung tơplâ xâ vâ gum tung tơdroăng mơnhên ADN ƀă tơƀai khu lêng
Thứ ba, 05:00, 06/10/2026
Tơplôu: A Sa Ly/VOV
Tơplôu: A Sa Ly/VOV
VOV.Xơ Đăng - Kơxo lơ 5/10, a Tơraih tơƀai lâp plâi tơnêi Cần Thơ, Khu xiâm pơkuâ ngăn lêng Kuân khu 9 tơrŭm ƀă Khu xiâm pơkuâ ngăn lêng Hbrâ mơdât a rơvâ plêng – Khu lêng tơƀai ƀă mâu kong pơlê kơpong Tơbăng kroăng Cửu Long tơkŭm pơto, pơcháu 15.401 mauh kơxêng, xâk kiâ mố đô̆i hlâ tung tơplâ xâ vâ séa mơnhên ngăn ADN, mơnhên inâi mố đô̆i hlâ.
Kố cho roh pơto má 11 ƀă cho roh apoăng pơto ƀă troăng tơƀai lêng CASA-C295 dêi Lưh đoân 918. Xông tơpui a roh leh, Trung tươ̆ng Hồ Văn Thái, Chĭnh ủi Kuân khu 9, tối nhên kăn ƀô̆, mâu lêng khu lêng tơplâ rơtế ƀă mâu kơ koan cheăng dế mơ-eăm pêi pro "Tơdroăng pêi cheăng 500 hâi măng" 'na tí tăng, chiâ rôu xo tơkŭm ƀă mơnhên inâi kơxêng kiâ mố đô̆i, mơhno hnoăng cheăng pôu râng khât a ngiâ tơdroăng ki hlâ rêh dêi mâu ngế khên tơnôu hlâ tung tơplâ xâ nah.
Mâu mauh kơxêng châ pơto chơ troh a Hà Nội vâ pơcháu ăm mâu kơ koan cheăng pêi pro séa ngăn ADN. Tơdroăng pêi pro mơhno trâu hơngế hiâm mơno "Khoh châ niân trối hâi kố kơnôm hnoăng vâi krâ nah", tơdroăng pâ mơnê dêi rơxông hâi kố ƀă mâu ngế hiăng hlâ xua Tơnêi têa.
Viết bình luận