VOV4.Sêdang - Kơxo lơ 14/9, a tíu pêi cheăng Khu xiâm tơpui kâ hiăng po leh tơdah xo 1,5 rơtuh klŏng vaccine AstraZeneca hbrâ mơdât COVID-19 xua Chin phuh Pơhlăng prếi Italia kum ăm Việt Nam hŏng tơdroăng COVAX. Tơpui a rôh leh, pôa Tô Anh Dũng, ngế xiâm phŏ tơpui mơnê ƀă mơnhên tối khât tơdroăng ki tŏng kum kơnía git ƀă teăm tơdrêng dêi Chin phuh ƀă kuăn pơlê Pơhlăng prếi Iatalia, veăng kum pro ai pơxúa ăm hnoăng cheăng hbrâ mơdât pơreăng COVID-19 a Việt Nam.

Kố cho tơdroăng ki mơhno tối ăm tơdroăng mơnhông kơhnâ dêi tơrŭm cheăng la ngiâ pơla Việt Nam ƀă Pơhlăng prếi Italia tung mâu hơnăm hdrối nah xuân môi tiah tơrŭm tơrôa rơtế ƀă dêi rơpó tung tơdroăng ki xơpá, tơkâ luâ pơreăng kân. Pôa Trần Văn Thuấn, ngế xiâm phŏ ngăn pơkeăng ƀă khăm pơlât tối nhên kô rĕng xing xoăng lô vaccine kố ăm mâu kong pơlê ƀă rak tơniăn tơdroăng ki xúa ai pơxúa ƀă tơƀrê má môi.

Katarina Nga tơplôu ƀă tơbleăng