VOV4.Sêdang - Kơdroh ó má môi tung tơdroăng ki tâ tú pơreăng ăm mâu ƀok thái pơkeăng, mơngế cheăng kum tung hngêi pơkeăng ƀă mâu khu râ ki dế pêi cheăng plâ hâi plâ măng a kơpong ăm kuăn pơlê klâ ối krê, klâ ối kơtăn hngế, malối tung mâu hngêi pơkeăng pơtân ki dế khăm pơlât mơngế tro tamo châi, ƀă mâu ngế ki tro nhôm hiăng tâ pơreăng COVID-19, mâu robot VIBOT- cho môi túa kơmăi ki châ mơjiâng pro tiô khoa hok kŏng ngê̆ râ tơnêi têa, hiăng châ Khu xiâm ngăn ‘na khoa hok ƀă kŏng ngê̆ Hok viê̆n Kih thuât khu lêng rak vế, pêi pro hiăng ai châ xúa ing tơdế tíu ki tâ pơreăng hên, môi tiah a kong pơlê Bắc Giang ƀă nôkố cho a Pơlê kong kân Hồ Chí Minh. Pêi cheăng tơniăn plâ hâi plâ măng, mâu robot VIBOT kô teăng ăm mâu ƀok thái pơkeăng, mơngế cheăng tung hngêi pơkeăng tung pơtroh mâu pơkeăng, tơmeăm khăm pơlât, kế kâ, tơmeăm xúa, rak ngăn mơngế tamo châi ƀă hiá hế.

A hngêi pơkeăng pơtân xô̆ 7 (bêng An Khánh, pơlê kong kân  Thủ Đức, Pơlê kong kân Hồ Chí Minh), kơmăi ai 2 to robot VIBOT-2 hiăng ƀă dế veăng kum pơlât ngăn, teăng mâu ngế cheăng ngăn pơkeăng pơlât veăng chiân tơmeăm kế kâ, pơkeăng ôu, mâu tơmeăm ki kal ƀă mâu tơmeăm xúa ki ê ing pá gong vâ mot a kơpong klâ krê, klêi mê vêh nếo. Tơdroăng pêi cheăng kâ kâk pêi tung plâ hâi plâ măng, rêm to robot VIBOT -2 pơkuâ 4-5 râ tung 10 râ dêi hngêi pơkeăng, kum kơdroh tơdroăng cheăng ki pêi hên ki sap 6 troh 7 ngế cheăng ngăn ‘na pơkeăng, ki mâu ngế pleăng hnoăng tơná pêi rêm hâi. 

Ngoh Tô Tuấn Hải, ngế pleăng hnoăng cheăng tơná dế pêi cheăng a Hngêi pơkeăng pơtân xô̆ 7 tối:

“Ngin klâ dêi rơpó 6-7 ngế cheăng a 14 râ mê pá khât ‘nâng, pá ai ivá. La kơnôm ai 2 to robot mê ngin hiăng chía kơdroh iâ tơdroăng cheăng, vâ rak vế dêi ivá. A hlo ai robot mê tơ’lêi hlâu ‘nâng, hlối rơkê há ‘’.

VIBOT cho tơmeăm mơjiâng pro ing đề tài Khoa hok kŏng ngê̆ râ Tơnêi têa “Tí tăng hriăn plĕng mơjiâng pro Kơmăi robot kum cheăng ‘na pơkeăng veăng chơ chiân tơmeăm ăm kơpong klâ krê ki dế ai pơreăng tâ tú hên’’ châ Khu xiâm ngăn Khoa hok ƀă kŏng ngê̆ pơcháu ăm Hok viê̆n kỹ thuật Quân sự mơjiâng pro ing khế 4/2020.

VIBOT ai chiâng teăng mâu ngế cheăng ngăn pơkeăng vâ chiân, chơ tơmeăm  ƀă mâu kế chôu ‘măn tơmeăm kâ, pơkeăng, mâu tơmeăm kal xúa ƀă mâu tơmeăm ki ê ing kơpong ki hbrâ pá gong (cho pá gong kơpong klâ krê) troh a veăng pơlât (ối tung kơbong klâ krê) vâ ăm mâu ngế ki dế pơlât; pơtroh mâu kế ki tâ ‘măn xok lăm troh a veăng pơlât vâ xo xok klêi mê djâ lăm ‘măn a tíu hmâ tơkŭm ‘măn xok; chiân djâ troh a mâu veăng pơlât vâ mâu ƀok thái pơkeăng, mâu ngế ki ai ngế dế pơlât (ối pá gong kơpong klâ krê) pơcháu ăm tơmeăm ing hơngế kơ ngế ki dế pơlât...

Yăo sư Tiê̆n sih Nguyễn Văn Kính – Kăn hnê ngăn Khu pơlât pơreăng tâ tú Việt Nam tối:

“Kal thế kơdroh hâi chôu trâm tơpui ƀă ngế ki dế pơlât… mê pin xua Robot vâ ăm teăng kuăn mơngế, má môi cho vâ  ví  pơreăng tâ tú ing tơdroăng ối achê. Tâ mê nếo ivá pêi cheăng dêi robot mê xuân hôm há ƀă hên ngế kô ôh tá êa mot trâm mâ ngế ki dế pơlât’’.

Hdrối mê, đề tài tí tăng ‘nâi plĕng châ tơbleăng pêi 2 rôh: rôh má 1, Kơmăi robot kum chiân tơmeăm dêi VOBOT – 1  mê cho tíu xiâm séa ngăn, tiê mơhno troăng ƀă 01 robot prôk tiô troăng ki hiăng mơhno ăm. Rôh má 2, pro xiâm kŏng ngê̆ ƀă hriăn pro robot VIBOT-2 chiâng prôk xêh. Robot ki chiâng prôk xêh, rơkê tung tơdroăng lăm pôk ing mâu kơpong ki kŭn hâ ho, pá tơvâ tơvân tâ, tơdroăng cheăng pêi xuân hên tâ há…

Thiê̆u tươ̆ng Nguyễn Lạc Hồng, Kăn phŏ pơkuâ Học viện kỹ thuật Quân sự tối nhên:

“Ngin ai tơdroăng tơ’lêi hlâu cho ing ‘nâi tơrŭm pơla Học viện quân sự ƀă mâu hngêi kơmăi dêi lêng, mâu hngêi kơmăi cơ khí, klêi mê mâu hngêi kơmăi ki ê nếo, mê drêng mơjiâng pro châ khĕn kơdeăn hôm ƀă chiâng prôk pêi cheăng tâi ivá dêi kơmăi mê ngin hlối tơrŭm ƀă mâu hngêi kơmăi tung khu lêng vâ mơjiâng pro hên tâ ai tiô púi vâ dêi mâu tíu pêi cheăng hiăng pơkâ”.

Hdrối Pơlê kong kân Hồ Chí Minh, VIBOT-2 hiăng châ ăm mơnúa pêi cheăng a Hngêi pơkeăng Trung ương Quân đội 108, klêi mê, a mơ’nui khế 4/2021 robot châ ăm pêi cheăng a kơpong klâ krê, tíu pơlât mâu ngế tâ COVID-19 dêi Hngêi pơkeăng Bạch Mai - Tíu khăm pơlât má 2 (a Phủ Lý - Hà Nam). Troh mơ’nui khế 5/2021, VIBOT -2 châ pơtối ăm pêi cheăng a kơpong pơlât mâu ngế F0 dêi Hngêi pơkeăng kân kong pơlê Bắc Giang, veăng kum pơlât hrĭng ngế ki tâ COVID-19, veăng kơdroh tơdroăng cheăng hngăm ăm mâu ngế cheăng pơlât mâu ki tâ pơreăng, ví pơreăng tâ tú troh mơngế ki ê tung kơpong klâ krê, dế pơlât mơngế tâ tú.

Klêi mơnúa xúa ăm pêi cheăng, kơmăi ki mê a mâu hngêi pơkeăng, tíu khăm pơlât dế klâ krê, tíu pơlât mơngế tâ COVID-19 hiăng ăm hlo Robot kum cheăng ‘na pơlât chiân mâu tơmeăm VIBOT pêi cheăng hôm ƀă tơ-ƀrê, veăng kum tung plâ mơdât pơreăng. Hâi lơ 23/7 kố nah, Hô̆i đong khoa hok kŏng ngê̆ tối ‘na kơmăi, tối ‘na tơdroăng pêi pro dêi Khoa hok kŏng ngê̆ râ Tơnêi têa hiăng hôp, hlối tối mâu tơdroăng ki hlo pêi tơ-ƀrê ƀă pâ thế pơtối pro klêi kơmăi nếo, ‘no liăn mro tơ’nôm mâu robot VIBOT vâ veăng kum tung plâ mơdât pơreăng.

Yăo sư - Tiê̆n sih Đào Văn Hiệp - Kăn hnê ngăn Hô̆i đong khoa hok đề tài ‘’Tí tăng hriăn plĕng, hriăn pro kơmăi robot vâ kum ‘na tơdroăng cheăng chiân tơmeăm tung kơpong klâ krê a hngêi pơkeăng  pơlât pơreăng tơ’lêi tâ tú’’ tối:

“Rôh apoăng bú pêi tung 1 khế thế ai robot ai tiô tơdroăng vâ veăng pêi cheăng ‘nôi ki ahdrối veăng pêi cheăng tung kơpong klâ krê. Rôh má 2 mê  gá châ chôu pâ tơdroăng ki rơkê tâ, tơkéa vâ tối robot rơkê. Tơdroăng prôk ôh tá prôk tiô troăng ki mơhno hdrối xếo, mê thế prôk tiô lơgât hiăng kơchuâ hdrối – lơgât mê thế nâp ăm hdrối lơ ing tơná gá mơjiâng dêi. Ôh tá xê bú 1 to robot mê cho thế ai môi khu robot, mê tíu xiâm ki po mơhno troăng  thế tiê mơhno ăm tâi khu rơbot. Tơ’nôm nếo, mâu robot thế ‘nâi dêi rơpó hlê dêi rơpó, klêi mê hlối hlê kơ mâu ki cheăng ngăn pơkeăng pơchân tối la ôh tá êa kơnôm ing khu xiâm tiê kơmăi mơhno hdrối’’.

Klêi mơnúa pro đề tài “Tí tăng hriăn plĕng, pro robot veăng kum mâu ngế cheăng khăm pơlât chiân ăm tơmeăm a mâu kơpong klâ krê tíu pơlât pơreăng tơ’lêi tâ tú’’ ƀă hlo tơ-ƀrê ing kơmăi ki hriăn mơjiâng pro cho (kơmăi robot VIBOT) xúa veăng kum hbrâ mơdât pơreăng COVID-19 hiăng ƀă dế  ăm hlo mâ ngăn rế tơ-ƀrê, tơdroăng pơkâ pêi pro tro dêi khu xiâm Khoa hok ƀă kŏng ngê̆ ƀă ivá pêi cheăng, ing tơdroăng mơ-eăm hriăn plĕng dêi tíu pêi cheăng mơjiâng pro, mâu khu cheăng khoa hok dêi Học viện Kỹ thuật Quân sự tung tơdroăng tơbleăng mơjiâng pro teăm tơdrêng mâu tơdroăng cheăng pơcháu pêi ‘na Khoa hok kŏng ngê̆ ki xúa kơmăi dâi lĕm rơkê nếo nôkố tung veăng kum hbrâ mơdât pơreăng tối krê xuân môi tiah tung troăng rơhlâ pơkâ mơnhông mơdêk khoa hok kŏng ngê̆ dêi tơnêi têa tối tơchoâm.

VOV

Gương tơplôu ƀă tơbleăng