VOV4.Bahnar - Kiơ̆ đơ̆ng tơ drong jang tơ pă tơ̆ yăn âu lơ̆m jăl 14 kŭm ăn ƀôh: tơ drong kon pơ lei dôm hơ drĕch hơ drung adrin vang akŏm păng pôk rơih đei dôm bơ ngai tang măt Kuô̆ hô̆i rơ gei, đei đon ‘lơ̆ng ‘lơ ‘lŏ hlôi tơ gop tôch lơ ăn tơ drong jơ nei đơ̆ng Kuô̆k hô̆i, mă loi jĭ lơ̆m tơ drong pơ jing păng pơ gơ̆r bơ̆ jang ‘lơ̆ng dôm tơ drong tơ gŭm ăn kon kông. ‘Nâu jĭ dôm tơ drong tơ gŭm gĭt kăl vă tưk tơ iung tơ drong jang tŏk păng pơm hơ tŏk tơ drong arih xa kơ kon pơ lei tơ̆ tơ ring groi kông. Kiơ̆ tơ drong tơ chĕng, Kuô̆k hô̆I jăl 15 vă adrin iŏk đei tŏ sĕt hlŏh ‘nŏh 18% bơ ngai tang măt ‘nŏh jĭ bơ ngai kon kông.

Kuô̆k hô̆i jăl 14 đei 86 ‘nu bơ ngai tang măt ‘nŏh jĭ bơ ngai kon kông, iŏk đei 17,3%,  pơ têng hăm kơ sô̆ hơ găt blŭng a ưh tôm 4 ‘nu. Mă đơ̆ng thoi nŏh ră, dôm bơ ngai tang măt Kuô̆k hô̆i dơ̆ng tang ăn tơ ring kon kông tơ ƀôh hơ dăh đon adrin, jang tơ năp, vang jang tôch ai lơ̆m tơ drong chih pơ jing khôi luơ̆t, dăr lăng păng tơ chơ̆t dôm tơ drong gĭt kăl kơ tĕh đak. Vă Kuô̆k hô̆i jăl 15 hơ nơ̆ng chĕp vei păng tưk tơ iung dôm tơ drong jang đei, mă loi jĭ lơ̆m tơ drong chih pơ jing păng pơ gơ̆r jang kiơ̆ dôm tơ drong tơ gŭm ăn kon kông athei hơ tŏk hlŏh dơ̆ng tơ drong hlôh vao, gơ̆h hơ gei đơ̆ng bơ ngai tang măt Kuô̆k hô̆i, pôk rơih đei dôm bơ ngai rơ gei ‘lơ ‘lŏ vang jang lơ̆m Kuô̆k hô̆i ‘nŏh jĭ tơ drong đei lơ bơ ngai tăh hla hơ pơi ‘mĕh mưh pơ gơ̆r pôk Kuô̆k hô̆i jăl 15 păng bơ ngai tang măt Jơ nŭm pơ gơ̆r kon pơ lei jơ̆p tơ ring lơ̆m ‘năr 23/5 truh. Bơ ngai tăh hla Phạm Giáo, apŭng Đức Phổ, dêh char Quảng Ngãi hơ mĕng:

“Hơ tŏk bơ ngai tang măt ăn tơ ring mơ mat tat, tơ ring hơ tăih yăih, tơ ring kon kông oei xa ‘nŏh jĭ tơ drong kăl vă gơ̆h băt hơ dăh ƀiơ̆ tơ ring kon kông, jĭ tơ ring đa đei lơ tơ drong mơ mat tat, kon pơ lei ưh đei hŏk jrŭ, tơ drong arih oei tơ nuh hin. Kơ lih thoi noh, roi băt lơ ƀiơ̆ dôm tơ drong mơ mat tat, băt hơ dăh dôm tơ drong hơ pơi ‘mĕh đơ̆ng kon pơ lei ‘nŏh sư hơ nhăk ăn Kuô̆k hô̆i đei lơ trong tơ gŭm dơ̆ng hăm dôm tơ ring âu, pơm ‘lơ̆ng vă hơ tŏk tơ drong arih xa kơ kon pơ lei, hơ met pơ ‘lơ̆ng ƀiơ̆ dôm tơ drong mơ mat tat đơ̆ng đe sư”.

Ƀok Y Khut Niê (Bơ ngai Rađe), Phŏ Kơ dră chĕp kơ̆l khul tang măt Kuô̆k hô̆i dêh char Dak Lak (jăl XIV) tơ ƀâp bơngai tăh hla

Jăl jang âu ki, Kuô̆k hô̆i drơ̆ng nơ̆r ăn 2 tơ drong tơ chơ̆t gĭt kăl, ‘nŏh jĭ tơ drong tơ chơ̆t kơ sô̆ 88 drơ̆ng nơ̆r ăn Tơ drong jang tơm atŏk tơ iung mŭk drăm – tơ pôl tơ ring kon pơ lei kon kông păng groi kông đơ̆ng 2021 – 2030 păng Tơ drong tơ chơ̆t kơ sô̆ 120 kĭ tơ lĕch trong tơ mât jên jang ăn Tơ drong jang tơm kơ tĕh đak atŏk tơ iung mŭk drăm, tơ pôl tơ̆ tơ ring kon kông păng groi kông đơ̆ng 2021 – 2030. Kăl pơ ma ‘nŏh, Tơ drong tơ chơ̆t 88 tơ ƀôh trong jang truh sơ năm 2030 ‘nŏh tơ jur unh hnam tơ nuh hin hơ la kơ 10%. Ưh pă đei xăh, pơ lei pơ la yơ mơ mat tat dêh hlŏh; 70% kơ sô̆ xăh tơ ring kon kông lăp hăm tơ drong hơ găt tơ ring tơ rang ‘nao.

Ƀok Nguyễn Lâm Thành, khul Lạng Sơn akhan: “Kuô̆k hô̆i hlôi drơ̆ng nơ̆r ăn tơ drong Tơ chơ̆t,‘nŏh jĭ dôm tơ drong tôch kăl lơ̆m trong tơ gŭm ăn kon pơ lei kon kông păng dôm tơ drong tih kăl sek tơ lang. Gơ̆h năng ‘nâu jĭ ‘măng mă blŭng Kuô̆k hô̆i đei tơ drong tơ chơ̆t tih. ‘Nâu tơ ƀôh hơ dăh hơ năp jang păng jơ hngâm đon pơ ngơ̆t hăm kon pơ lei kon kông. ‘Nâu kŭm jing jơ năr bơ̆n hơ nơ̆ng bơ nê păng tơ ƀôh hơ năp jang đơ̆ng kơ dih hăm tơ ring oei mơ mat tat vă tơ gŭm ăn tơ ring âu jang tŏk kŭm hăm tĕh đak păng pơm ‘lơ̆ng ăn tơ drong jang tŏk hơ tŏ băl kơ plăh rim hơ drĕch hơ drung.”

Yoa tơ dỏng đei hơ drô̆ tơ̆ tơ ring groi kông, trong yak mơ mat tat, jô̆ hloi găh đon hlôh vao đơ̆ng kon pơ lei… tơ dăh tơ drong pơ ma nuh, krao hơ vơn pôk rơih păng pơ gơ̆r pôk rơih ưh đei jang ‘lơ̆ng sư gô ƀơm ưh ‘lơ̆ng truh tơ drong đei yoa kơ kon pơ lei kŭm nhen ƀơm truh dôm tơ drong iŏk đei atŭm đơ̆ng pôk rơih. Vă gơ̆h đei tŏ sĕt hlŏh ‘nŏh 18% bơ ngai tang măt ‘nŏh jĭ bơ ngai kon kông lơ̆m jăl jang kơ Kuô̆k hô̆i 15, vă rơih đei dôm bơ ngai tơ găl tơ pă, dơ̆ng tang ăn kon pơ lei kon kông athei tơ chĕng hơ len, băt hơ dăh lĭ lĭch bơ ngai lĕch pơ jei. Mă loi ‘nŏh tơ drong tơ roi tơ băt, athei năng mă kăl vă kon pơ lei băt hơ dăh tơ drong kăp gĭt, trong pơ gơ̆r pôk rơih, adrin vang jang păng krao hơ vơn kơ tum kơ tŏng ‘nhŏng ŏh vang năm pôk rơih vă jang kĕh hơ năp jang đơ̆ng bơ ngai tăh hla, kon pơ lei, Kơ lih yoa, pôk rơih đei dôm bơ ngai tang măt rơ gei ‘nŏh jĭ bơ ngai vă dơ̆ng tang ăn kon pơ lei vang chih pơ jing trong tơ gŭm, tơ lĕch tơ drong tơ gŭm păng dăr lăng mư̆h bơ̆ jang tơ drong tơ gŭm. Bơ ngai tang măt Kuô̆k hô̆i jăl 14 Quàng Văn Hương, khul Sơn La pơ ma hơ dăh:

“Roi tơ băt athei đei trong roi tơ băt mă lăp vă kon pơ lei băt truh lĭ lĭch, tơ drong rơ gei, hlôh vao mă loi jĭ đon jang tơ năp đơ̆ng dôm bơ ngai tang măt mă kơ dih vă pôk rơih. Athei roi tơ băt dôm tơ drong jơ nei, jơ hngâm đon bơ ngai rơ gei, đei đon ‘lơ̆ng tơ pă, đơ̆ng nŏh kon pơ lei ƀôh bơ ngai vă dơ̆ng tang ăn kơ dih kâu. Lơ̆m nŏh, tơ dăh rơih đei bơ ngai kon kông dăh mă bơ ngai tang măt arih xa tơ̆ tơ ring kon kông vang jang lơ̆m Kuô̆k hô̆i ‘nŏh, ‘nâu jing dôm bơ ngai pơ ma tơ lĕch nơ̆r ăn kon pơ lei, roi tơ ƀôh jơ hngâm đon ‘mĕh vă đơ̆ng kon pơ lei truh hăm Kuô̆k hô̆i”.

Dơ̆ng: Tơ blơ̆