VOV4.Bahnar - Tơ̆ Hà Nội, Khul kơ dră chĕp kơ̆l Anih Trung ương Mặt trận Tổ quốc Việt Nam păng Anih vei lăng hơ drĕch kon kông ‘nao jang hơ doi pơ gơ̆r Hop akŏm pơ tôch 5 sơ năm bơ̆ jang tơ drong jang hơ doi đơ̆ng 2017-2021 păng kĭ pơ kăp jang hơ doi đơ̆ng 2021-2025. Khei ‘năr âu ki, 2 păh jang hơ doi vang vei lăng, tưk tơ iung dôm tơ drong jŏh ayŏ kơ dŏ xoang ‘lơ̆ng hơ iă kơ dôm hơ drĕch kon kông; tơ lĕch lơ trong jang đơ̆ng Đảng, tơ drong tơ gŭm, khôi luơ̆t đơ̆ng tĕh đak găh atŏk tơ iung mŭk drăm, tơ pôl, hơ tŏk tơ drong arih xa ăn kon pơ lei kon kông. 

Kơ dră Anih Trung ương Mặt trận Tổ quốc Việt Nam Đỗ Văn Chiến athei tơ̆ hơ năp kơnh, 2 păh hơ tŏk tơ drong jang hơ doi vang tơ lĕch dôm tơ drong jang tơm kơ tĕh đak atŏk tơ iung mŭk drăm tơ pôl; hơ nơ̆ng băt hơ dăh tơ drong hơ pơi ‘mĕh, pơ gơ̆r jang ‘lơ̆ng dôm tơ drong pơ jei ‘mêm kơ tĕh đak, dôm tơ drong krao hơ vơn vă tơ gŭm ăn kon pơ lei dôm hơ drĕch kon kông jang tŏk mŭk drăm, pơ jing tơ ring tơ rang ‘nao, vei lăng sơ đơ̆ng tĕh đak, sơ đơ̆ng tơ pôl; mă loi ‘nŏh jĭ tơ drong jang tơm kơ tĕh đak atŏk tơ iung mŭk drăm tơ pôl tơ̆ tơ ring kon pơ lei kon kông păng groi kông đơ̆ng 2021-2025.

Dơ̆ng: Tơ blơ̆