VOV4.Bahnar - Giĕng âu ki, tơ̆ Hnam Kuô̆k hô̆i, hăm tơ drong pơ gơ̆r đơ̆ng Kơ dră jang lơ̆m Anih tơm Chinh trĭ, Kơ dră Kuô̆k hô̆i Vương Đình Huệ, Anĭh chĕp kơ̆l pơ gơ̆r Kuô̆k hô̆i hop akŏm ‘măng mă 56. 1 lơ̆m dôm tơ drong tơm đei pơ ma nuh, tơ gop nơ̆r ‘nŏh jĭ hla ar Chih tơ roi đơ̆ng Khul kơ dră tĕh đak găh tơ drong ‘mơ ‘met, tang găn brăh brư, pơ huach kư̆ kă sơ̆ năm 2020.

Hla ar tơ roi găh tơ drong ‘mơ ‘met, tang găn brăh brư, pơ huach kư̆ kă sơ năm 2020 ăn ƀôh: Ƀât mă tơ drong thu mong jên tĕh đak jur yoa đơ̆ng sar bar tŏ ‘mi kial kơ nê̆, jĭ jăn, tơ drong akŏm klăih song jên jang tơ̆ jơ̆p tơ ring mơ mat tat, Anih tơm vei lăng jên hu roi tơ ƀôh ăn Khul kơ dră tĕh đak, Thủ tướng tĕh đak pơ tho ăn dôm anih tơm, anih jang kơ pal, tơ ring tơ rang hơ tŏk tơ drong ‘mơ ‘met, tang găn brăh brư, pơ huach kư̆ kă, ‘mơ ‘met đei 10% jên tơ lĕch jang hơ nơ̆ng; kăt tơ jur jên pơ gơ̆r hop akŏm, jên năm jang, ‘mơ met ƀiơ̆ dôm kơ sô̆ jên tơ lĕch ăn tơ drong jang ưh gan kăl. Jên trung ương ‘mơ ‘met đei dang 55 rơ bâu ti, hơ tŏ hăm 5% kơ sô̆ tơ dra đơ̆ng Kuô̆k hô̆i pơ jao. Vei kơ jăp ki luơ̆t, tơ păt ‘lơ̆ng, hơ tŏk tơ drong dăr lăng, vei lăng tơ drong tơ lĕch jên jang kơ tĕh đak; bơ̆ jang ‘lơ̆ng tơ drong sek tơ lang tơ păt dôm bơ ngai pơm glăi, pơ huach jên tĕh đak đei chă ƀôh kiơ̆ đơ̆ng dăr hơ len năng.

Kơ dră Kuô̆k hô̆i Vương Đình Huệ pơ ma nơ̆r pơ tho lơ̆m hop akŏm

Mă lei, kiơ̆ đơ̆ng dăr lăng, jô̆ hơ len păng vei lăng tơ drong tơ lĕch jên đơ̆ng Anih mong jên tĕh đak oei ƀôh đei tơ drong vei lăng, iŏk yoa jên tĕh đak tam mă trŏ hăm kơ sô̆ hơ găt tơ̆ 1,2 anih jang. Pơ ma lơ̆m hop akŏm, yă Lê Thị Nga, Kơ dră Anih jang tư phap kơ Kuô̆k hô̆i akhan, athei sek tơ lang tơ păt păng hil tơ hlâu dôm anih jang, tơ ring tơ rang ưh jăh tơ lĕch trong jang ‘mơ ‘met, tang găn brăh brư, pơ huach kư̆ kă. Mă loi, sek tơ lang tơ păt tơ drong brăh brư, pơ huach kư̆ kă 1,2 tơ mam drăm nhen tĕh, chuơh, bri ‘long, đak. ‘Ngoăih kơ ‘nŏh, oei đei lơ tơ drong ưh kơ lăp lơ̆m tơ drong chih tơ roi kơ sô̆ jên răt tơ mam tơ pôl:

“Nhôn akhan, tơ drong tơm pơm tơ lĕch dôm tơ drong ưh kơ lăp mưh răt, iŏk yoa tơ mam tơ pôl ‘nŏh yoa lơ̆m tơ drong vei lăng, pơ gơ̆r jang tam mă vei lăng đĭ rim tơ drong ưh hơ iă ƀônh đei. Lơ̆m tơ drong chă rơih anih, bơ ngai răt tơ mam tơ pôl, đei 1 kơ sô̆ kăn ƀô̆ ưh đei hlôh vao trŏ hơ năp jang mưh bơ̆ jang kiơ̆ dôm tơ drong hơ găt găh chih tơ roi rơ đăh rơ đong păng đei hla ar chih tơ blang mă lăp. Tơ drong dăr hơ len bơ̆ jang kiơ̆ tơ drong hơ găt găh chih tơ roi rơ đăh rơ đong, tam đei bơ̆ jang hơ nơ̆ng, tam gan tơ năp. Tơ drong tơ rĕk păng đon hlôh vao lơ̆m tơ pôl găh tơ drong gơ̆h sơng iŏk nơ̆r roi tơ băt rơ đăh rơ đong tam mă jrŭ”

Bơ ngai tang măt Bùi Văn Cường, Kơ dră vei lăng Anih jang kơ Kuô̆k hô̆i ăn tơ băt athei hơ nơ̆ng hơ tŏk tơ drong tơ roi tơ băt pơ hlôh đon ăn đảng viên găh tơ drong ‘mơ ‘met, tang găn brăh brư, pơ huach kư̆ kă tơ̆ đĭ đăng anih jang; hơ nơ̆ng pơ gơ̆r hơ len năng tơ drong jang kiơ̆ trong ‘mơ ‘met mă hơ dăh lơ̆m rim tơ drong.

“Athei hơ tŏk tơ drong dăr lăng, vei lăng bơ̆ jang kiơ̆ trong ‘mơ ‘met, tang găn brăh brư, pơ huach kư̆ kă tơ̆ rim anih jang, tơ ring tơ rang, roi tơ ƀôih dôm tơ drong ưh kơ lăp, kiơ̆ đơ̆ng nŏh tơ lĕch trong hơ met ming. Athei chih hơ dăh tơ drong phak mă rơ đăh mưh sek tơ lang tơ drong glăi găh tơ drong ‘nâu, mă loi ‘nŏh jơ̆ hơ năp jang đơ̆ng bơ ngai chĕp kơ̆l kŭm nhen pôk hơ păh, jô̆ hloi tơ drong jang kăn ƀô̆ đei ƀơm truh tơ drong ‘mơ ‘met, tang găn brăh brư, pơ huach kư̆ kă, thoi nŏh gơ̆h pơm tơ plih ‘lơ̆ng ƀiơ̆”

Pơ ma hơ dăh tơ drong jang kiơ̆ trong ‘mơ ‘met, tang găn brăh brư, pơ huach kư̆ kă ‘nŏh jĭ trong jang tih kơ plăh tĕh đak oei tơ nuh hin, Kơ dră Kuô̆k hô̆i Vương Đình Huệ pơ ma hơ dăh, hiong răm yoa đơ̆ng pơ huach kư̆ kă ưh đei pha kiơ kơ tơ drong xa pơ jĭp, ƀât lăp oei dêh hlŏh dơ̆ng. Lơ̆m hla ar chih tơ roi đơ̆ng Khul kơ dră tĕh đak păng Hla ar hơ len năng đơ̆ng Anih chĕp kơ̆l pơ gơ̆r Kuô̆k hô̆i, lơ tơ drong oei chih atŭm atŭm, nhen vă pơ trŏ, tam mă trŏ hăm yăn âu, đei tơ drong veh ver. Kơ dră Kuô̆k hô̆i Vương Đình Huệ athei, hla ar chih tơ roi đơ̆ng Khul kơ dră tĕh đak păng hla ar hơ len năng găh tơ drong jang kiơ̆ trong ‘mơ ‘met, tang găn brăh brư, pơ huach kư̆ kă athei chih ‘moi kiơ̆ tơ drong jang ‘mơ ‘met, tang găn brăh brư pơ huach kư̆ kă sơ̆ năm 2020, mă loi ‘nŏh găh jên hu, anih mong jên, tơ mam drăm, cham char păng tơ drong ‘mơ ‘met jơ năr, hơ tŏk tơ drong jang…. Sek tơ lang anih tĕch mơ dro jang xa ưh pran, anih mong jên jang xa ưh đei yoa. Lơ̆m tơ drong jang tơ pôl athei năng kăl truh tơ drong tơ hlăk lơ̆m tơ drong tơ proh trong jang, tơ mât jên jang kơ tĕh đak, tơ mât jên ăn anih tĕch mơ dro, bơ̆ jang ‘mơ ‘met lơ̆m kon pơ lei:

“Tơ jră tang găn xa pơ jĭp ‘nŏh ưh kơ jor bơih mă lei athei tơ klep hăm tơ drong ‘mơ ‘met păng tang găn brăh brư, pơ huach kư̆ kă. Dôm tơ drong hiong răm âu tam mă jô̆ truh jơ năr bơ̆ jang. Iĕm athei tơ ƀôh hơ dăh dôm tơ drong jơ nei mă bơ̆n jang đei lơ̆m tơ drong hơ met ming khul jang, tơ jur ƀiên chê̆, mă loi jĭ hăm dôm tơ ring jang ‘lơ̆ng. Lơ tơ ring dang ei kơ sô̆ jên tơ lĕch jang hơ nơ̆ng lăp 1 puăt đĕch, tơ lĕch jên vă tơ mât ăn tơ drong jang truh 1 puăt. Mĭnh kơ sô̆ anih tơm, anih jang kơ pal jang ‘lơ̆ng dăh mă dôm tơ drong ƀơm truh kăt tơ jur hla ar dăr hơ len tơ̆ anih jang, bơ̆n athei chih tơ mât lơ̆m hla ar tơ roi âu, ‘moi kiơ̆ luơ̆t ‘mơ ‘met, tang găn brăh brư, pơ huach kư̆ kă, ‘moi kiơ̆ tơ drong Tơ chơ̆t 166 ‘năr 23 khei 1 sơ năm 2020”

Dơ̆ng: Tơ blơ̆