VOV4.Bahnar - Hăm tơ drong pơ gơ̆r đơ̆ng Kơ dră Kuô̆k hô̆i Vương Đình Huệ, Anih chĕp kơ̆l pơ gơ̆r Kuô̆k hô̆i ‘nao hôp hăt hot vang tơ gop nơ̆r ăn tơ drong Tơ chơ̆t đơ̆ng Khul kơ dră tĕh đak găh bơ̆ jang dôm trong jang gĭt kăl vă tang găn jĭ Covid-19 kiơ̆ tơ drong tơ chơ̆t kơ sô̆ 30 đơ̆ng Kuô̆k hô̆i đei tơ lĕch lơ̆m Hop akŏm mă mônh, Kuô̆k hô̆i jăl XV.

Gơ măng ‘năr 5/8 âu ki, Thủ tướng tĕh đak kĭ Hla ar kơ sô̆ 1067 apinh nơ̆r tơ gop đơ̆ng Anih chĕp kơ̆l pơ gơ̆r Kuô̆k hô̆i găh dôm trong jang gĭt kăl vă tang găn jĭ Covid-19 păng ‘năr 6/8, Khul kơ dră tĕh đak đei dơ̆ng hla ar chih apinh nơ̆r tơ gop đơ̆ng Anih chĕp kơ̆l pơ gơ̆r Kuô̆k hô̆i asong ăn Khul kơ dră tĕh đak tơ chơ̆t dôm trong jang gĭt kăl nai, pha hăm tơ drong hơ găt đơ̆ng khôi luơ̆t.

Lăng kiơ̆ tơ drong tơ chơ̆t đơ̆ng Khul kơ dră tĕh đak, dôm bơ ngai jang lơ̆m Anih chĕp kơ̆l pơ gơ̆r Kuô̆k hô̆i lăp đon hăm 4 tơ drong ‘nao, pha hăm tơ drong hơ găt đơ̆ng luơ̆t oei yoa dang ei, mă ưh ‘nŏh pha hăm Hơ năp jang đơ̆ng Anih chĕp kơ̆l pơ gơ̆r Kuô̆k hô̆i, kiơ̆ tơ drong hơ găt đơ̆ng tơ drong tơ chơ̆t kơ sô̆ 30 đơ̆ng Kuô̆k hô̆i.

Anih chĕp kơ̆l pơ gơ̆r Kuô̆k kô̆i tơ chơ̆t lơ tơ drong gĭt kăl vă tang găn jĭ Covid-19

Mă hơ dăh, asong ăn dôm anih tơm jang pơ gang, Khul linh, Công an, Dơ nŏ anih vei lăng kon pơ lei dôm dêh char tơ chơ̆t pơ jing anih sơng akŏm, hơ met ăn bơ ngai jĭ Covid-19 atŭm hăm ‘nŏh pơm hla ar bơ̆ jang păng chih hơ dăh khei ‘năr bơ̆ jang truh đĭ sơ năm 2022, păng lăp tơ mât yoa hăm tơ drong kăl vă tang găn jĭ Covid-19 kiơ̆ trong jang tang găn jĭ păng tơ drong đei tơ pă tơ̆ yăn âu lơ̆m rim tơ ring.

Anih chĕp kơ̆l pơ gơ̆r Kuô̆k hô̆i drơ̆ng nơ̆r hăm tơ drong tơ chơ̆t chih hơ dăh tơ drong kla jên khăm hơ met jĭ hăm bơ ngai jĭ Covid-19, đei hloi jên hơ met dôm tơ drong jĭ nai lơ̆m khei ‘năr hơ met jĭ Covid-19 yoa Anih mong jên tĕh đak hơ găt. Mă lei, Anih chĕp kơ̆l pơ gơ̆r Kuô̆k hô̆i athei, hăm bơ ngai jĭ Covid-19 đei hloi tơ drong jĭ nai (nhen jĭ hơ yô đak sĭk, jĭ plei nuih, jĭ plei lĕn...) ‘nŏh tơ drong kla jên jăm, hơ met jĭ hăm dôm tơ drong jĭ ‘nâu athei pơm kiơ̆ tơ drong hơ găt đơ̆ng Luơ̆t Ƀao hiêm y tê̆ păng dôm tơ drong hơ găt nai.

Anih chĕp kơ̆l pơ gơ̆r Kuô̆k hô̆i drơ̆ng nơ̆r pơ jao ăn Khul kơ dră chĕp kơ̆l Jơ nŭm pơ gơ̆r kon pơ lei tơ chơ̆t găh dôm tơ drong ƀơm truh hơ năp jang đơ̆ng kơ dih păng roi tơ băt lơ̆m Hop akŏm Jơ nŭm pơ gơ̆r kon pơ lei tơ jê̆ hlŏh vă pơm ‘lơ̆ng, lăp hăm rim tơ drong đei tơ̆ dôm tơ ring oei bơ̆ jang kiơ̆ dôm trong tang găn jĭ tôch kơ hret nhen, ưh ăn ngôi akŏm lơ bơ ngai, bơ̆ jang kiơ̆ trong pơ vang găn, ưh ăn yak vih vât mât lĕch lơ̆m tơ pôl. Găh tơ  drong ‘nâu, Anih chĕp kơ̆l pơ gơ̆r Kuô̆k hô̆i athei hơ tŏk tơ drong chĕp kơ̆l pơ gơ̆r, dăr hơ len mă kơ jăp đơ̆ng anih jang đảng tơ̆ jơ̆p tơ ring mưh bơ̆ jang, vă huei đei tơ drong iŏk pơ gâm nơ̆r hơ găt âu tơ lĕch dôm tơ drong ưh kơ kăl, ưh đei ƀơm truh tơ drong tang găn jĭ Covid-19 tơ̆ tơ ring.

Pơ ma lơ̆m hop akŏm, Kơ dră Kuô̆k hô̆i Vương Đình Huệ akhan, tơ drong chih tơ lĕch tơ drong tơ chơ̆t âu tôch gĭt kăl, ƀât mă tơ drong jĭ oei tơ pŏh roi đunh roi krê hơ mơt, ưh gơ̆h băt hơ drol, oei tơ pŏh tơ̆ lơ dêh char, pơ lei tơm, mă loi ‘nŏh jĭ tơ̆ dôm dêh char găh Pơ băh:

“Lơ̆m hla ar chih tơ drong tơ chơ̆t lê̆ iŏk yoa dôm nơ̆r ưh rơ đăh nhen hrôih ƀiơ̆, lơ ƀiơ̆, vă huei đei tơ drong hlôh vao pha ra băl, pơm mơ mat ăn tơ ring jang kiơ̆, ƀât lăp jing đei hloi tơ drong jang kiơ̆ kư̆ kă. Mă tơ pă ăn ƀôh, tơ drong tơ gŭm tôch trŏ, mă lei ƀât lăp tơ̆ tơ ring bơ̆ jang ưh kơ trŏ, tơ ring ‘nâu jang pha, tơ ring to jang pha. Mă hơ tuch găn lê̆ tơ drong chơ chuĕn tơ mam păng tơ drong yak vih vât đơ̆ng kon pơ lei. Tơ̆ hơ năp kơnh, athei Khul kơ dră tĕh đak hơ nơ̆ng pơ tho tơ ƀôh, tơ chĕng hơ len chih tơ lĕch dôm hla ar chih mă rơ đăh dôm tơ drong gơ̆h jang đơ̆ng Khul kơ dră tĕh đak, Thủ tướng tĕh đak. Hơ len năng, chih mă hơ dăh ƀiơ̆ tơ drong gơ̆h jang tơ̆ tơ ring, kăl loi ‘nŏh jĭ tơ drong pơ gơ̆r jang. Dôm tơ drong ƀơm truh trong jang, athei drơ̆ng 1 nơ̆r kơ jăp ‘lơ̆ng. Lơ̆m khei ‘năr gĭt kăl, kơ dră chĕp kơ̆l athei akŏm jơ hngâm bơ̆ jang‘nŏh jĭ tơ drong tôch kăl. Mă loi lơ̆m tơ drong pơ gơ̆r jang, dăh mă dôm tơ drong mă Khul kơ dră tĕh đak, Thủ tướng tĕh đak hlôi tơ lĕch, vă huei đei tơ drong pơ gơ̆r jang pha ra băl tơ̆ dôm tơ ring”.

Kơ dră Kuô̆k hô̆i iung pơ ma pơ tôch akŏm

Đơ̆ng rŏng kơ ‘nŏh, Kơ dră Kuô̆k hô̆i Vương Đình Huệ hlôi kĭ tơ lĕch tơ drong tơ chơ̆t kơ sô̆ 268 găh tơ drong asong ăn Khul kơ dră tĕh đak chih tơ lĕch tơ drong tơ chơ̆t đei 1,2 tơ drong pha hăm tơ drong hơ găt đơ̆ng luơ̆t vă pơm lăp hăm tơ drong jang tang găn jĭ COVID-19. Kiơ̆ kơ ‘nŏh, Kuô̆k hô̆i drơ̆ng nơ̆r hăm nơ̆r apinh đơ̆ng Khul kơ dră tĕh đak găh tơ drong chih tơ lĕch tơ drong tơ chơ̆t bơ̆ jang kiơ̆ dôm trong jang kăl vă tang găn jĭ COVID-19 kiơ̆ tơ drong Tơ chơ̆t kơ sô̆ 30/2021/QH15 ‘năr 28 khei 7 sơ năm 2021 đơ̆ng Kuô̆k hô̆i jăl XV, lơ̆m nŏh đei dôm tơ drong tơ̆ hơ la âu: Tơ chơ̆t pơ jing anih sơng akŏm, hơ met ăn bơ ngai jĭ Covid-19 atŭm hăm ‘nŏh pơm hla ar bơ̆ jang; Pơ jao ăn Anih tơm vei lăng jang pơ gang gơ̆h chih hơ găt dôm hla ar kăl lơ̆m tơ drong tơ chơ̆t kiơ̆ trong pơm hla ar tŏ sĕt ƀiơ̆ vă pơm lăp hăm tơ drong ‘mĕh vă lơ̆m tơ drong tang găn jĭ; Pơ jao ăn Khul kơ dră chĕp kơ̆l Jơ nŭm pơ gơ̆r kon pơ lei tơ chơ̆t dôm tơ drong găh hơ năp jang đơ̆ng kơ dih păng tơ roi ăn Jơ nŭm pơ gơ̆r kon pơ lei lơ̆m hop akŏm jê̆ hlŏh.

Hăm nơ̆r athei chih hơ găt găh tơ drong kla jên khăm hơ met jĭ ăn bơ ngai jĭ COVID-19 tơ̆ dôm anih sơng iŏk, hơ met jĭ COVID-19 (đei hloi jên hơ met dôm tơ drong jĭ nai lơ̆m khei ‘năr hơ met jĭ COVID-19) yoa Anih mong jên tĕh đak hơ găt kiơ̆ kơ sô̆ jên hơ met tơ̆ yăn âu, Khul kơ dră tĕh đak hơ nơ̆ng pơ tho jang kiơ̆, anih mong jên tĕh đak athei kla đĭ jên khăm hơ met jĭ ƀơm truh tơ̆ jĭ COVID-19; hăm bơ ngai jĭ COVID-19 đei hloi dôm tơ drong jĭ nai ‘nŏh tơ drong kla jên khăm, hơ met jĭ hăm dôm bơ ngai âu athei pơm kiơ̆ Luơ̆t tang găn jĭ tơ pŏh, Luơ̆t ƀao hiêm y tê̆ păng dôm tơ  drong hơ găt nai đơ̆ng khôi luơ̆t đei ƀơm truh. Tơ drong tơ chơ̆t đei yoa iŏk đơ̆ng ‘năr 6/8/2021.

Dơ̆ng: Tơ blơ̆