VOV4.Bahnar - Tơ̆ hop akŏm mă 6 đơt 1 hơ tuch giĕng âu ki, Anih chĕp kơ̆l pơ gơ̆r Kuô̆k hô̆i tơ gop nơ̆r găh tơ drong asong bơ̆ jang kiơ̆ 1,2 trong jang, tơ drong tơ gŭm lơ̆m tơ drong jang pơ gang vă pơ yoa ăn tơ drong tang găn jĭ Covid-19. Đơ̆ng 4 grŭp tơ drong jang tih găh tang găn jĭ Covid-19 yoa Anih tơm vei lăng jang pơ gang tơ lĕch, Anih chĕp kơ̆l pơ gơ̆r Kuô̆k hô̆i athei hơ len năng mă tôm dôm tơ drong đei ƀơm truh, tơ drong gơ̆h jang, mă loi jĭ tơ drong asong ăn dôm bơ ngai vang jang tang găn jĭ păng anih mong jên tĕh đak dăh mă anih mong jên ƀao hiêm y tê̆ kla jên khăm hơ met jĭ.

Kơ dră tơm vei lăng jang pơ gang Nguyễn Thanh Long athei, Anih chĕp kơ̆l pơ gơ̆r Kuô̆k hô̆i asong ăn Anih tơm vei lăng jang pơ gang, dôm anih tơm, anih jang kơ pal păng dôm tơ ring gơ̆h krao akŏm, iŏk yoa bơ ngai jang ăn tơ drong tang găn jĭ Covid-19 mă ưh kăl lăng kiơ̆ tơ drong jang đei chih lơ̆m hla ar bơ̆ jang dăh mă tơ drong đei, dăh mă ưh đei hla ar bơ̆ jang. Athei asong bơ̆ jang khăm, hơ met jĭ đơ̆ng hơ tăih ăn bơ ngai jĭ Covid-19 dăh mă bơ ngai ưh gơ̆h truh tơ̆ anih khăm, hơ met jĭ yoa tơ drong jĭ Covid-19. Atŭm hăm ‘nŏh, athei asong ăn Kơ dră tơm vei lăng jang pơ gang set hơ len, tơ chơ̆t hăm tơ drong iŏk yoa pơ gang hlôi đei asong răt iŏk đơ̆ng tĕh đak đe pơ yoa ăn tơ drong nai vă pơm tơ lĕch pơ gang tang găn păng hơ met jĭ Covid-19.

Anih chĕp kơ̆l pơ gơ̆r Kuô̆k hô̆i athei, dôm tơ drong tơ gŭm ‘nao kăl đei set hơ len mă tôm dôm tơ drong đei ƀơm truh, gơ̆h bơ̆ jang kiơ̆, mă loi ‘nŏh tơ drong asong ăn rim bơ ngai vang jang tang găn jĭ mưh tơ drong jĭ pơ joă truh tơ drong arih, jơ hngâm pran kon bơ ngai. Phŏ Kơ dră Kuô̆k hô̆i Trần Quang Phương athei: “Hơ mơt tôch dêh, thoi yơ jĭ hơ mơt tôch dêh? Thoi yơ jĭ hơ mơt ưh dêh, athei tơ chĕng mă hơ len. Mă 2, khul bơ ngai vang ƀet bơ̆ng, set hơ len jĭ, vei lăng hơ met jĭ. Pha hăm tơ drong bơ̆ jang ‘nŏh hơ dăh bơih, mă lei athei chih tơ băt truh dang yơ vă gơ̆h đei trong vei lăng dôm bơ ngai âu. Veh ver tơ drong pơ gâm, pơ vĕr mưh tơ drong tam mă gan kăl dăh mă tam gan krê hơ mơt dêh mă lei oei pơ gơ̆r jang kiơ̆”.

Anih tơm vei lăng jang pơ gang oei pơ ma nơ̆r apinh hơ nơ̆ng kla jên kiơ̆ tơ drong hơ găt tơ̆ Tơ drong tơ chơ̆t kơ sô̆ 268 đơ̆ng Anih chĕp kơ̆l pơ gơ̆r Kuô̆k hô̆i, mă lei asong chih dơ̆ng tơ drong hơ găt mưh ưh gơ̆h akŏm jên ‘nŏh jên tĕh đak athei kla ăn ngăl; atŭm hăm ‘nŏh asong ăn Khul kơ dră tĕh đak tơ chơ̆t tơ drong iŏk yoa jên đơ̆ng Anih mong jên ‘măn răk hiă kơ Anih mong jên ƀao hiêm y tê̆ vă kŭm hăm jên tĕh đak vang kla ăn tơ drong khăm hơ met jĭ Covid-19. Tơl tơ blang, pơm hơ dăh jên kŏng, jên khei hăm khul jang tang găn jĭ.

Phŏ Kơ dră tơm vei lăng jên hu Võ Thành Hưng ăn tơ băt: “Lơ̆m tơ drong hơ găt đơ̆ng Khul kơ dră tĕh đak hrei ‘nâu, đĭ đăng bơ ngai vang jang tang găn jĭ đei tơ gŭm ngăl. Hơ drô̆ tơ drong jang pơ gang đei ƀơm truh trong kla jên tơ̆ anih jang kơ tĕh đak. Pơ tih gia, anih jang đei tôm jên kla hơ nơ̆ng ‘nŏh dôm anih âu athei kla tôm jên khei ăn bơ ngai jang. Mă lei mưh vang bơ̆ jang tang găn jĭ ‘nŏh jên tĕh đak athei kla tôm jên khei ăn dôm bơ ngai âu. Mă loi tơ lĕch thim jên vă răt hơ met mă tôm tơ mam, pơ gang vă vei sơ đơ̆ng kơ jăp".

Drơ̆ng nơ̆r hăm Anih tơm vei lăng jang pơ gang găh trong kla jên kiơ̆ tơ drong Tơ chơ̆t 268, mă lei đei kơ sô̆ yoa Khul kơ dră tĕh đak chih hơ găt vă Anih mong jên ƀao hiêm y tê̆ tơ lĕch kla. Phŏ Kơ dră chĕp kơ̆l Ƀao hiêm Y tê̆ Phạm Lương Sơn akhan: “Đĭ đăng dôm kơ sô̆ jên pơ yoa ăn jang pơ gang tơ̆ ‘ngoăih kơ tơ drong hơ găt kla jên đơ̆ng Anih mong jên ƀao hiêm y tê̆ ‘nŏh jĭ tơ drong mă 1. Mă 2 dôm pơ gang hơ met jĭ sĭt kơ tang vă yoa hơ met jĭ Covid đĕch. Mă 3, đĭ đăng kơ sô̆ jên giơng. Kơ lih yoa bơ ngai jĭ đơ̆ng năr mât truh năr roi tơ băt klăih jĭ ‘nŏh đei năng nhen thoi bơ ngai hơ met jĭ Covid tơ dăh athei ƀich hơ met kơ tă tơ̆ hnam pơ gang ‘nŏh athei jô̆ jên giơng ƀich hơ met jĭ. 1 kơ sô̆ tơ drong set hơ len jĭ, kơ măy kơ mŏk kăl nhen kơ măy dui jơ hngâm, ép mô… kăl đei khei ‘năr hơ len năng. Nhôn drơ̆ng nơ̆r hăm trong kla jên kiơ̆ tơ drong tơ chơ̆t 268”.

Tơ̆ hop akŏm, Kơ dră Kuô̆k hô̆i Vương Đình Huệ athei chih hơ dăh jên tĕh đak păng jên đơ̆ng Anih mong jên Ƀao hiêm y tê̆ kla ăn tơ drong khăm, hơ met jĭ: “Ƀao hiêm nôp ‘nŏh athei đei xa yoa, oei jên tĕh đak kla ăn bu ‘nŏh jĭ tơ drong tơ chơ̆t đơ̆ng tĕh đak. Kơ na lơ̆m tơ drong tơ chơ̆t âu inh drơ̆ng nơ̆r ưh đei pơ jao ăn Khul kơ dră tĕh đak pơ gơ̆r tơ lĕch dang ăi băl đơ̆ng Jên tĕh đak păng jên Ƀao hiêm. Tơ drong tơ chơ̆t âu kăl chih mă hơ dăh, yă kiơ kla hăm jên tĕh đak, yă kiơ kla hăm jên Ƀao hiêm y tê̆. Tơ drong kiơ ưh đei rơ đăh ‘nŏh athei kla hăm jên teh đak, athei chih mă hơ dăh.”

Anih chĕp kơ̆l pơ gơ̆r Kuô̆k hô̆i athei Anih tơm vei lăng jang pơ gang hơ nơ̆ng hơ met pơ ‘lơ̆ng hla ar vă tơ roi ăn Anih tơm Chinh trĭ tơ gop nơ̆r. Atŭm hăm ‘nŏh, hơ nơ̆ng hơ len năng Tơ drong tơ chơ̆t vă chih mă kơ đĕh, ƀônh hlôh, mă loi hăm dôm tơ drong ƀơm truh tơ drong jang pơ gang, vă jăh bơ̆ jang kiơ̆ tơ drong gŭm lơ̆m tơ dỏng jang pơ gang, vă pơ yoa ăn tơ drong jang tang găn jĭ Covid-19 hrei ‘nâu.

 Lại Thị Hoa: Chih

Dơ̆ng: Tơ blơ̆