VOV4.Bahnar -  Kơ sơ̆ ‘năr 12/10, Anih vei lăng kon pơ lei dêh char Lâm Đồng pơ gơ̆r tơ drong jang pơ ma dơ nuh păng pôk pơ ư hơ năn bơ ngai jang mơ dro sa, anih jang mơ dro sa hơ gei. Lơ tơ drong mơ mat tat, ưh kơ ‘lơ̆ng lơ̆m bơ̆ jang pơm tơ lĕch, tĕch mơ dro đei rim anih jang mơ dro sa tơ lĕch păng apĭnh dêh char bơ ngơ̆t truh hơ met pơ ‘lơ̆ng. Tơ̆ jơ pơ ma dơ nuh, kơ dră chĕp kơ̆l dêh char Lâm Đồng tơ roi, mă đơ̆ng ƀơm ưh kơ ‘lơ̆ng đơ̆ng jĭ hơ buh Covid-19, mă lei mŭk drăm - tơ pôl 9 khei blŭng sơ năm 2021 kơ dêh char oei iŏk đei lơ jơ nei ‘lơ̆ng.

Jơ pơ ma dơ nuh đơ̆ng anih jang mơ dro sa păng kơ dră chĕp kơ̆l Anih vei lăng kon pơ lei dêh char Lâm Đồng

Jơ nei âu đei tơ drong tơ gop tôch kơ tih đơ̆ng khŭl jang mơ dro sa păng hloh 11.000 anih jang mơ dro sa lơ̆m dêh char. Vă hơ met pơ ‘lơ̆ng mơ mat tat, tơ iung ming pơm tơ lĕch lăp hăm tơ̆ hơ năp jĭ hơ buh, rim bơ ngai jang mơ dro sa athei tơ lĕch, apĭnh hăm kơ dră chĕp kơ̆l dêh char Lâm Đồng lơ tơ drong kăl kơ bơ ngơ̆t truh hơ met pơ ‘lơ̆ng. Tơm ‘noh jĭ athei tơ jur jên cheh tŏk iŏk jên đơ̆ng anih mong jên; pơm hơ tăih jên nôp ƀao hiêm tơ pôl, ƀao hiêm pơ gang lơ̆m 6 khei; set hơ len ưh kơ iŏk, tơ jur jên thuê teh; tơ gŭm anih jang mơ dro sa gơ̆h jang păng bơ̆ jang kiơ̆ dôm tơ drong jang tơ plih ki thuơ̆t kơ sô̆ vă tơ tĕnh tơ mơ̆t yua lơ̆m vei lăng, chă tơ ƀôh tơ mam.

Thuem: Tơ blơ̆