VOV4.Bahnar - Dôm sơ năm tơ jê̆ âu ƀât blŭng sơ năm hŏk ‘nao, 1 tơ drong jang đơ̆ng Anih mong jên vei lăng păng atŏk tơ iung bri dêh char Kon Tum đei tơ pôl tơ chĕng tôch ‘lơ̆ng, ‘nŏh jĭ Tơ drong tơ roi “Yak hơ doi hăm ŏh năm hŏk”. Sơ năm ‘nâu ƀât mă tơ drong jĭ COVID-19 oei tôch hơ mơt, tơ drong jang ‘nâu đei Anih mong jên bơ̆ jang thoi yơ păng dôm tơ drong jang kiơ gô đei Anih mong jên tơ lĕch jang đơ̆ng dang ei truh đĭ sơ năm. Dôm tơ drong ‘nâu gô đei nhôn pơ ma nuh hăm ƀok Hồ Thanh Hoàng, Kơ dră Anih mong jên vei lăng păng atŏk tơ iung bri dêh char Kon Tum.

- Ƀok ăi, lơ̆m dôm sơ năm âu ki 1 tơ drong jang ƀât blŭng sơ năm hŏk ‘nao đơ̆ng Anih mong jên đei tơ pôl tơ chĕng tôch ‘lơ̆ng, ‘nŏh jĭ tơ drong tơ roi “Yak hơ doi hăm ŏh năm hŏk”. Sơ năm ‘nâu ƀât mă jĭ COVID-19 oei tôch hơ mơt, tơ drong jang ‘nâu đei tơ plih ming thoi yơ vă gơ̆h đei yoa ‘lơ̆ng?

-Ƀok Hồ Thanh Hoàng: “Kŭm nhen dôm sơ năm adrol ki, sơ năm 2021 Anih mong jên vei lăng păng atŏk tơ iung bri dêh char Kon Tum pơ jing trong roi tơ băt “Yak hơ doi hăm ŏh năm hŏk sơ năm 2021”, tơ lĕch trong roi tơ băt, pơ tho tơ ƀôh tơ drong kla jên vei lăng cham char bri brăh chih tơ kơ đŏh hla ar hŏk păng in tơ̆ môk, vă hơ tŏk đon hlôh vao ăn đe ŏh hŏk tro, thây kô, hnam trưng păng đe mĕ ƀă hŏk tro lơ̆m tơ ring đei xa yoa đơ̆ng cham char bri brăh găh tơ drong vei lăng bri tơ klep hăm tơ drong kla jên mưh iŏk yoa cham char bri brăh; ‘nâu jĭ gơng tơ ƀơh hơ nhăk nơ̆r roi tơ băt truh hăm đĭ đăng kon pơ lei tơ̆ tơ ring đei xa yoa đơ̆ng tơ drong vei lăng cham char bri brăh.

Sơ năm ‘nâu ƀât mă jĭ COVID-19 tôch hơ mơt, Anih mong jên vei lăng păng atŏk tơ iung bri dêh char Kon Tum jang hơ doi hăm Anih răt hla ar pơ jao hla ar păng môk ăn Khul thây kô vei lăng hnam trưng, hăm tơ drong dơ̆ng lăng đơ̆ng bơ ngai tang măt ăn Dơ nŏ anih vei lăng kon pơ lei xăh, thĭ trơ̆n; Khul thây kô vei lăng dôm hnam trưng athei ƀơk dơ̆ng hla ar hŏk, môk ăn hŏk tro kiơ̆ kơ sô̆ chih jô̆ đơ̆ng Anih mong jên vei lăng păng atŏk tơ iung bri dêh char pơ jao”.

- Ih tơ roi găh tơ drong kăl đơ̆ng Tơ drong tơ roi tơ băt “Yak hơ doi hăm ŏh năm hŏk” mă Anih mong jên vei lăng păng atŏk tơ iung bri dêh char Kon Tum ‘nao bơ̆ jang ƀât blŭng sơ năm hŏk ‘nao thoi yơ lăng?

-Ƀok Hồ Thanh Hoàng: “Bơ̆ jang kiơ̆ trong roi tơ băt “Yak hơ doi hăm ŏh năm hŏk sơ năm 2021”, lơ̆m khei 7/2021, Anih mong jên vei lăng păng atŏk tơ iung bri dêh char Kon Tum jang hơ doi hăm anih pơ gơ̆r răt hla ar in dôm nơ̆r tơ băt găh tơ drong kla jên mưh iŏk yoa cham char bri brăh; vei lăng bri tơ̆ kơ đŏh 600.000 blăh hla ar chih păng 5.000 tŏ môk păng pơ jao ăn 169 hnam trưng tơ̆ 76 xăh, thĭ trơ̆n tơ̆ 10 apŭng, plt kơ dêh char Kon Tum. Dôm nơ̆r chih tơ băt tơ̆ hla ar hŏk păng môk pơm lăp hăm tơ drong ‘mĕh vă roi tơ băt đei tơ lĕch, lăp hăm tơ drong hơ pơi đơ̆ng dôm hnam trưng vă tơ gŭm ăn đe ŏh đei hla ar năm hŏk.

- Lei a! Lơ̆m dôm khei oei đei dơ̆ng kơ sơ năm ‘nâu, Anih mong jên vei lăng păng atŏk tơ iung bri dêh char Kon Tum vă akŏm jơ hngâm bơ̆ jang dôm tơ drong kiơ dơ̆ng, hă ƀok? 

-Ƀok Hồ Thanh Hoàng:: Lơ̆m dôm khei oei đei dơ̆ng kơ sơ năm 2021, Anih mong jên vei lăng păng atŏk tơ iung bri dêh char vă bơ̆ jang 1,2 tơ drong jang tơm tơ̆ hơ la âu:

-Mă 1 hơ nơ̆ng pơm hla ar asong iŏk hơ drol jên vei lăng cham char bri brăh sơ năm 2021 ăn dôm tơ ‘ngla bri ‘nŏh jĭ Khul grŭp, dôm Dơ nŏ anih vei lăng kon pơ lei dôm xăh, thĭ trơ̆n.

-Mă 2 hơ nơ̆ng tơ lĕch jên tơ gŭm pơ jing trong vei lăng bri kơ jăp ‘lơ̆ng ăn dôm anih tơ ‘ngla bri oei đei dơ̆ng đơ̆ng kơ sô̆ jên vei bri sơ năm 2021 kơ Anih mong jên vei lăng păng atŏk tơ iung bri dêh char kiơ̆ tơ drong Tơ chơ̆t kơ sô̆ 1054 ‘năr 27/10/2020 đơ̆ng Dơ nŏ anih vei lăng kon pơ lei dêh char.

-Mă 3 hơ nơ̆ng tơ lĕch trong roi tơ băt kơ sô̆ 03 ‘năr 20/01/2021 Anih mong jên vei lăng păng atŏk tơ iung bri dêh char.

-Mă 4’nŏh, tơ dăh tơ drong jĭ Covid-19 đei tang găn ‘lơ̆ng ‘nŏh vă pơ gơ̆r hop akŏm pơ tôch 10 sơ năm bơ̆ jang kiơ̆ trong kla jên mưh iŏk yoa cham char bri brăh, pơ tăm ming bri ‘long tơ̆ dêh char, hơ dai hăm tơ băt 10 sơ năm năr pơ jing Anih mong jên vei lăng păng atŏk tơ iung bri dêh char.

-Mă 5 bơ̆ jang dôm tơ drong jang kiơ̆ nơ̆r pơ ma đơ̆ng ƀok Nguyễn Hữu Tháp- Phŏ Kơ dră vei lăng kon pơ lei dêh char, Kơ dră chĕp kơ̆l Khul vei lăng Anih mong jên vei lăng păng atŏk tơ iung bri dêh char tơ̆ Hla ar chih kơ sô̆ 1890 ‘năr 01/7/2021 đơ̆ng Anih jang kơ Dơ nŏ anih vei lăng kon pơ lei dêh char găh tơ drong vei lăng, iŏk yoa jên đơ̆ng vei bri păng pơ tăm ming bri ‘long tơ̆ dêh char.

-Mă 6 hơ nơ̆ng pơ gơ̆r hơ len năng tơ drong vei lăng, iŏk yoa jên đơ̆ng vei lăng bri sơ năm 2020 tơ̆ dôm Dơ nŏ anih vei lăng kon pơ lei xăh, thĭ trơ̆n oei đei dơ̆ng.

-Mă 7 pơ jing trong, tơ lĕch jên vă năm dăr lăng, chih jô̆ tĕh bri đei xa yoa đơ̆ng tơ drong jang kla jên mưh iŏk yoa cham char bri brăh sơ năm 2021 đơ̆ng dôm tơ ‘ngla bri ‘nŏh jĭ khul grŭp; tơ ‘ngla bri ‘nŏh jĭ unh hnam, rim bơ ngai, tơ pôl kon pơ lei păng dôm Dơ nŏ anih vei lăng kon pơ lei xăh, thĭ trơ̆n iŏk vei lăng bri păng kĭ pơ kăp la kak kla jên mưh iŏk yoa cham char bri brăh.

-Mă 8 jang hơ doi hăm dôm anih vei lăng bri apŭng, plt chih tơ lĕch la kak đơ̆ng dôm tơ ‘ngla bri đei kla jên mưh vei lăng bri; pơ gơ̆r dăr hơ len, chih tơ băt hơ găt tĕh bri đei kla jên vei lăng cham char bri brăh sơ năm 2021 đơ̆ng dôm tơ ‘ngla bri ‘nŏh jĭ khul grŭp; tơ ‘ngla bri ‘nŏh jĭ unh hnam, rim bơ ngai, tơ pôl kon pơ lei.

-Mă 9 pơ tho ăn dôm anih iŏk yoa cham char bri brăh chih măt kla jên mưh iŏk yoa cham char bri brăh sơ năm 2022.

-Mă 10 ‘nŏh jĭ athei dôm anih oei hre jên đơ̆ng iŏk yoa cham char bri brăh, jên pơ tăm ming bri jăh nôp jên kiơ̆ tơ drong hơ găt. Hăm dôm anih jang ưh chu nôp jên mưh iŏk yoa cham char bri brăh, jên kon đơ̆ng nôp hiơ̆ kiơ̆ tơ drong hơ găt vă athei anih jang kơ pal sek phak.

-Mă 11 ‘nŏh roi tơ băt hơ dăh tơ drong kla jên vei lăng cham char bri brăh păng pơ tăm ming ‘long bri sơ năm 2021,chih pơ jing trong bơ̆ jang lơ̆m sơ năm 2022.

-Lei a. Bơ nê kơ ih ƀok Hồ Thanh Hoàng, Kơ dră chĕp kơ̆l Anih monbg jên vei lăng păng atŏk tơ iung bri dêh char Kon Tum tơ gĕch pơ ma nuh hăm nhôn!

Dơ̆ng: Tơ blơ̆