VOV4.Bahnar - Anih tơm vei lăng bơ ngai jang, linh jĭ rơ ka păng tơ pôl đei hla ar chih gơih ăn Thủ tướng tĕh đak athei tơ gŭm phe dŏng pơ ngot ăn kon pơ lei ƀơm ưh ‘lơ̆ng đơ̆ng jĭ COVID-19 tơ̆ dôm tơ ring oei pơ vang găn lơ̆m tơ pôl.

Yoa jĭ COVID-19 tơ pŏh ‘măng mă 4 tôch dêh ƀơm kơ nê̆ truh tơ drong arih xa, bơ̆ jang đơ̆ng kon pơ lei păng bơ ngai jang, mă loi hăm dôm bơ ngai athei pơ dơ̆h jang, hiong tơ drong jang, ưh đei jên khei... ưh kĕ vei lăng ‘lơ̆ng tơ drong arih xa kơ na tôch krê pơ ngot.

Kơ sơ̆ ‘năr 18/8, Anih tơm vei lăng bơ ngai jang, linh jĭ rơ ka păng tơ pôl tơ roi ăn Thủ tướng tĕh đak tơ gŭm 130.175 tân phe vă dŏng ƀât oei pơ ngot ăn hlŏh 8,6 triu ‘nu bơ ngai găh 24 dêh char, ƀơm kơ nê̆ đơ̆ng jĭ COVID-19. Tơ gŭm 1 ‘nu ‘nŏh 15 kĭ phe lơ̆m dang 1 khei.

Dơ̆ng: Tơ blơ̆