VOV4.Bahnar - Khei năr au ki, gơnơm tơlĕch jang kơtang đơ̆ng khŭl kơdră, rim hơnĭh jang păng kơdră tơring, hŏk tro, sinh viên răt iŏk ƀao hiêm jang pơgang tŏk bŏk roi tŏk lơ. Sơnăm hok 2020-2021, măt bơngai hŏk tro, sinh viên vang răt iŏk ƀao hiêm jang pơgang ‘nŏh hlŏh 18 trĭu (tŏk 1,6% pơtêng hăm sơnăm hŏk 2019-2020) păng 3 trĭu 500.000 ‘nu hŏk tro sinh viên vang răt iŏk dôm ƀao hiêm anai. Lơ̆m sơnăm hŏk 2021-2022, Dơnŏ anĭh jang ƀao hiêm Tơpôl hơdrin iŏk đei 100% hŏk tro, sinh viên răt iŏk ƀao hiêm jang pơgang, tơgŭm ăn jơhnơr mơlô̆h đei iŏk yua sa hơpăh đơ̆ng tơdrong jang vei lăng năng tông tơdrong erĭh sa tơpôl.

Ƀao hiêm jang pơgang hŏk tro, sinh viên - Hơyak gĭt kăl lơ̆m jang kiơ̆ ƀao hiêm jang pơgang đĭ đăng kon pơlei

Dôm sơnăm tơjê̆ au, gơnơm tơlĕch jang kơtang đơ̆ng khŭl kơdră, rim hơnĭh jang păng kơdră tơring, hŏk tro, sinh viên răt iŏk ƀao hiêm jang pơgang tŏk bŏk roi tŏk lơ kiơ̆ rim sơnăm. Sơnăm hŏk 2020-2021, mă đơ̆ng đei ƀơm kơnê̆ đơ̆ng jĭ hơbŭh Covid-19 mă lei tơdrong tơlĕch jang Ƀao hiêm jang pơgang hŏk tro sinh viên oei hơnơ̆ng iŏk đei jơnei hơ iă hăm hlŏh 1 trĭu ‘nu hŏk tro, sinh viên lơ̆m tĕh đak vang răt yua. Ŏh Nguyễn Thị Kim Hường, hŏk tro lăm 12 B1 hnam trương jăl pêng Dương Đông, pơlei tơm Phú Quốc, dêh char Kiên Giang tơbăt, kơtheh Ƀao hiêm jang pơgang hlôi hơnhăk hơ iă ăn hŏk tro lơ̆m tơdrong hŏk pơhrăm:“Mư̆h đei kơtheh ƀao hiêm jang pơgang nhôn sơđơ̆ng jơhngơ̆m, măkăl hăm dôm ŭnh hnam mơmat tat sa roi sơđơ̆ng hlŏh dơ̆ng. Trong jang tơgŭm đơ̆ng tĕh đak ƀơk ăn kơtheh Ƀao hiêm jang pơgang, mư̆h bơ̆n chă jĭ jăn, tơdăh bơ̆n đei kơtheh ƀao hiêm lei pă đei pơngơ̆t găh kon jên khăm ming hơmet jĭ jăn tơ̆ hnam pơgang bơih”.

        Tơ̆ hơnăp tơdrong jĭ hơbŭh Covid-19 pơrăm kơtang, vă iŏk đei trong tơlĕch jang 100% jing vă akhan đĭ đăng hŏk tro sinh viên vang răt yua ƀao hiêm jang pơgang lơ̆m sơnăm hŏk 2021-2022, Ƀao hiêm Tơpôl Việt Nam hlôi athei ƀao hiêm tơpôl 63 dêh char, pơlei tơm atŏk kơtang pơrô̆, pơtho tơbăt găh trong jang tơgŭm djru đơ̆ng Ƀao hiêm jang pơgang hăm lơ trong pơgơ̆r trŏ ƀlep; vang tơgŭm djru ăn kon jên iŏk yua ƀao hiêm jang pơgang ăn hŏk tro, sinh viên, mă kăl hăm dôm bơngai tơnap tap, kon pơlei kon kông ... ‘Ngoăih kơ ‘nŏh, hơnơ̆ng iung jang hơdoi hăm Dơnŏ anĭh vei lăng Hnam trương pơtho pơhrăm pơtho tơbăt tơlĕch jang kiơ̆ bơ̆ jang ƀao hiêm jang pơgang ăn hŏk tro sinh viên, pơjao nơ̆r pơkăp ăn rim hơnĭh pơtho pơhrăm. Tơdrong jang kiơ̆ iŏk đei jơnei dôm yơ ‘nŏh vă tơbăt hơdăh jang keh đang lơ liơ trong tơlĕch jang pơting dĭh băl, pôk hơpăh kơ rim hnam trương. Ƀok Nguyễn Hoàng Hà, Kơdră Hơnĭh Bơ̆ jang chĭnh trĭ păng vei lăng sinh viên kơ Hnam trương Đăi hŏk Kinh tê̆ kuô̆k yân tơbăt, bơ̆ jang pơrô̆, tơƀô̆h tơbăt găh Ƀao hiêm jang pơgang hŏk tro sinh viên đei hnam trương pơgơ̆r hơ iă, hăm lơ trong pơgơ̆r, hơdrin iŏk đei 100% sinh viên hnam trương vang răt yua ƀao hiêm jang pơgang:“Lơ̆m giĕng hop akŏm blŭng sơnăm, trŭh hloi tŏk bŏk jăl pơtho pơhrăm dăh mă hơtuch sơnăm, nhôn jei đei pơgơ̆r tơbăt hơdăh kơtang, găh tơdrong pơkăp jang kiơ̆ ăn đe hŏk tro sinh viên, ‘ngoăih kơ ‘nŏh chă tơroi tơbăt găh Ƀao hiêm jang pơgang hloi. Kơsô̆ 100% hŏk tro sinh viên răt yua ƀao hiêm jang pơgang jing tơdrong hơ iă dêh mă lei vă iŏk đei tơdrong pơkăp au jei tôch tơnap tap. Kơ yuơ lơ lŏh, hăm rim đe ŏh sinh viên ŭnh hnam tơnap tap, ư̆h kơ đei kon jên vă răt yua ƀao hiêm jang pơgang ‘nŏh nhôn tơchă trong tơgŭm djru ăn đe ŏh”

        Kiơ̆ đơ̆ng yă Đinh Mai Hạnh, Kơ iĕng Kơdră chĕp pơgơ̆r Hơnĭh iŏk akŏm kơ Ƀao hiêm Tơpôl Việt Nam tơbăt, Ƀao hiêm jang pơgang hŏk tro sinh viên hrei au tŏk bŏk đei kon jên bơ̆ jang tĕh đak tơgŭm djru 30%. Rim hŏk tro sinh viên găh ŭnh hnam đei iŏk yua ăn tĕh đak, ŭnh hnam tơpôl tơgŭm djru, kon pơlei kon kông ... ‘nŏh ƀơk ăn đĕch ƀao hiêm jang pơgang. ‘Ngoăih kơ ‘nŏh, mĭnh ƀar tơring oei đei dơ̆ng trong jang tơgŭm djru ăn hŏk tro sinh viên mư̆h răt yua ƀao hiêm jang pơgang. Kon jên tơlĕch ăn chă khăm ming hơmet jĭ jăn ‘moi kiơ̆ ƀao hiêm jang pơgang ăn hŏk tro sinh viên kơ yuơ Hơnĭh mong jên Ƀao hiêm jang pơgang kla ăn dôm sơnăm tơ jê̆ au hlôi trŭh rơbau ti hlak jên lơ̆m 1 sơnăm. Đei lơ hŏk tro sinh viên đei tơgŭm ăn kon jên khăm ming hơmet jĭ jăn hăm kon jên tôch kơ lơ, tŏk trŭh kơ hrĕng trĭu hlak jên.

        Mă kăl, đơ̆ng blŭng sơnăm 2021 trŭh dang ei, bơngai răt yua ƀao hiêm tơpôl, lơ̆m au đei hlŏh 18 trĭu ‘nu hŏk tro sinh viên đei sơng iŏk lơ trong jang tơgum djru hơ iă hlŏh. Mă kăl ‘nŏh trong tơgŭm djru đĭ đăng tơ̆ rim hơnĭh khăm ming hơmet jĭ jăn hăm kơtheh ƀao hiêm jang pơgang đei tơlĕch jang lơ̆m tĕh đak iŏk đơ̆ng năr 1/1/2021, tơgŭm ăn rim bơngai răt yua ƀao hiêm jang pơgang chă ming hơmet tơ̆ hơnĭh kơpal jei đei ƀao hiêm kla ăn tôm kon jên ming hơmet. Yă Đinh Mai Hạnh tơbăt:“Lơ̆m khei ‘năr jĭ hơbŭh Covid-19 pơrăm kơtang, đơ̆ng khei 8, nhôn hlôi pơjing tơdrong tơchơ̆t vă pơrô̆ athei ƀao hiêm Tơpôl rim dêh char, pơlei tơm. Ƀao hiêm Tơpôl rim dêh char jei tŏk bŏk hơdrin tơlĕch jang mĭnh ƀar trong jang vă sơnăm au khŭl hok tro, sinh viên kăl vang răt yua tôm. Vă hơdrin tơdrong răt yua ƀao hiêm tơpôl pơma atŭm păng Ƀao hiêm jang pơgang pơma hơdrô̆ đei rim răih bơngai vang răt yua ‘nŏh bơ̆n kăl atŏk tơ iung hloi dôm khŭl nhen ƀao hiêm jang pơgang hŏk tro sinh viên păng rim khŭl đei tĕh đak răt ăn”

        Tơdrong đei iŏk yua đơ̆ng vang răt yua ƀao hiêm jang pơgang hlôi đei ƀô̆h hơdăh, mă lei dang ei lơ̆m tĕh đak oei pă 3% hŏk tro, sinh viên, hơtŏ hăm vă jê̆ 600.000 ‘nu bơngai tim mă răt yua. Tơdrong mă au pơm ăn mĭnh ƀar khŭl bơngai mơlô̆h păng ŭnh hnam đe sư ư̆h kơ iŏk đei tơdrong tơgŭm djru ‘lơ̆ng hơ iă. Sơnăm hŏk ‘nao 2021 - 2022 hlôi trŭh, vă jang kiơ̆ keh đang trong tơlĕch jang 100% hŏk tro sinh viên răt yua ƀao hiêm jang pơgang, pơjing rơvơn tơgŭm ăn đe ŏh đei atŏk tơ iung tôm tong pơđĭ jơhngơ̆m đon hơgei păng akau jăn pran kơtang, tôch kăl đei tơdrong vă iung jang kơtang đơ̆ng khŭl jang chĭnh trĭ đơ̆ng Trung ương trŭh tơ̆ rim tơring. Mă kăl ‘nŏh hơnăp jang kơ rim hnam trương, ƀok thây kô pơtho lơ̆m chă hơvơn hŏk tro sinh viên, adoi nhen mĕ ƀă đe hŏk tro sinh viên vang răt yua ƀao hiêm jang pơgang hŏk tro sinh viên, tơgop atŏk ‘lơ̆ng bơ̆ jang vei lăng năng tông jơhngơ̆m pran jăng grăng akau ăn jơhnơr mơlô̆h.

Ƀai chĭh đơ̆ng VOV1

Tơblơ̆ nơ̆r: Amazưt