VOV4.Bahnar - Hŏk pơ hrăm păng bơ̆ jang kiơ̆ nơ̆r pơ tho đơ̆ng Ƀok Hô hăm dôm tơ drong jang đei yoa 'lơ̆ng, Ƀô đô̆i vei lăng tơ ring sơ lam Kon Tum vang tơ gop pơ jing tơ drong jang kon pơ lei vang vei lăng tơ ring sơ lam kơ jăp 'lơ̆ng. Lơ̆m dôm sơ năm âu ki, ƀô đô̆i vei lăng tơ ring sơ lam dêh char Kon Tum đei lơ tơ drong jang 'lơ̆ng vang tơ gŭm ăn kon pơ lei atŏk tơ iung mŭk drăm, tơ pôl, mă loi 'nŏh hăm kon pơ lei kon kông. Kiơ̆ đơ̆ng noh, um rup “Ƀô đô̆i Ƀok Hô” roi 'lơ̆ng hơ iă hăm kon pơ lei.

Khul linh vei lăng tơ ring sơ lam Kon Tum jang hơ doi hăm dôm anih jang kơ pal, khul grŭp tơ pôl tơ̆ tơ ring pơ gơ̆r dăr hơ len, tơ prŏh hơ met, chih hơ dăh trong jang pơ jing tơ ring choh jang xa kiơ̆ dôm tơ drong hơ găt pơ jing tơ ring tơ rang ‘nao, lăp hăm rim tơ drong đei tơ̆ tơ ring sơ lam. Adrin roi tơ ƀôh, jang hơ doi hăm tơ ring, pơ jing dôm trong jang, tơ drong jang vă tơ gŭm ăn kon pơ lei, tơ mât tơ drong krao hơ vơn hăm jur pơ tho tơ̆ mir pơ gar, vang choh jang tơ gŭm ăn kon pơ lei vei rong, kăt yoă, vei rơ gŏh pơ lei pơ la; pơ jing, hơ met ming hnam...

Hăm nơ̆r tơ băt: “Kơ đông ‘nŏh hnam, tơ ring sơ lam ‘nŏh pơ lei, kon pơ lei dôm hơ drĕch kon kông ‘nŏh jĭ ‘nhŏng oh” păng trong bơ̆ jang: “Mơ̆ng kon pơ lei pơ ma, pơ ma kon pơ lei hlôh, jang kon pơ lei lui”, kăn ƀô̆, linh vei lăng tơ ring sơ lam dêh char jang kiơ̆ “3 druh kiơ̆, 4 hơ dai” hăm kon pơ lei pơ jing lơ trong jang atŏk tơ iung mŭk drăm tơ pôl tơ̆ tơ ring sơ lam đei yoa ‘lơ̆ng, nhen: Trong jang rei pơ tăm ƀa đak 2 pơ yan, pơ tăm ‘long Sâm hro...

Hơ păh rơ mo yŏng ăn drŏ kăn tơ nuh tơ̆ xăh Iadal

Vă pơ jing tơ drong ‘lơ̆ng ăn dôm trong jang, tơ drong jang, Ƀô đôĭ vei lăng tơ ring sơ lam dêh char hơ tŏk tơ drong krao hơ vơn, kơ chăng jang hơ doi hăm Mặt trận Tổ quốc jơ̆p tơ ring, dôm anih jang kơ pal lơ̆m păng ‘ngoăih kơ dêh char, dôm anih tĕch mơ dro vă pơ jing dôm anih mong jên. Gơ nơm thoi nŏh, lơ trong jang đei bơ̆ jang kiơ̆ kơ jăp ‘lơ̆ng, hơ nhăk ăn đei yoa ‘lơ nhen: Trong jang “Rơ mo yŏng ăn bơ ngai tơ nuh”, hlôi đei pơih xă, rong đei truh 124 tŏ rơ mo ăn 67 unh hnam; Tơ drong jang “Chông ba ŏh năm hŏk” iŏk tơ gŭm ăn 75 ‘nu hŏk tro đei tơ drong arih xa mơ mat tat, hăm kơ sô̆ jên 500.000 hlak 1 ‘nu mon 1 khei; Trong jang “Kon rong kơ đông linh vei lăng tơ ring sơ lam”, dang ei đei 14 kơ đông iŏk rong 14 ‘nu mon; man kơ hrĕng tŏ “Hnam ăn bơ ngai tơ nuh tơ̆ tơ ring sơ lam”, “Hnam tơ pôl tơ gŭm ăn bơ ngai mơ mat tat”, “Hnam tơ gŭm ăn bôl boăl linh Trường Sơn”, “Hnam ‘mêm kơ eng” păng lơ anih jang gĭt kăl nai hai, pơ yoa ăn tơ drong choh jang xa, arih xa, pơm hơ tŏk tơ drong arih ăn kon pơ lei.

Ƀô đô̆i vei lăng tơ ring sơ lam Kon Tum jang hơ doi hăm Khul drŏ kăn dêh char păng dôm khul drŏ kăn tơ̆ plt Hà Nội, dêh char Đồng Nai, Bến Tre bơ̆ jang tơ drong jang “Yak hơ doi hăm drŏ kăn tơ̆ tơ ring sơ lam” tơ̆ 05 xăh sơ lam vă tơ gŭm man hnam oei, hnam hum kơ jă rĕh, pơ ‘nhŏ ăn tơ drong jang xa, arih xa kơ kon pơ lei, hăm dôm trong jang: “Drŏ kăn kŭm hăm Ƀô đô̆i vei lăng tơ ring sơ lam vei kơ jăp trong sơ lam, jrăng sơ lam hơ dai hăm vei lăng tơ mam drăm bri brăh; “Grŭp tơ guăt drŏ kăn kon kông rong nhŭng bronh”, “Grŭp rong nhŭng lai”, “Grŭp pơ tăm ƀum nhak ‘lơ̆ng”… păng kơ chăng jang hơ doi hăm anih tĕch mơ dro vei lăng ‘lơ̆ng tơ drong răt iŏk tơ mam đơ̆ng kon pơ lei jang đei.

Trong nơ năm tơ̆ xăh, tơ̆ pơ lei pơ la đei tơ lĕch jên man, pơm hơ met tôch ‘lơ̆ng tơ ƀưh hơ dai hăm trong dăr joang tơ̆ tơ ring sơ lam, tơ ƀưh jơ̆p pơ lei pơ la tơ ter tơ ring sơ lam, tôch hiôk hian ăn kon pơ lei chơ tĕch tơ mam, jang xa. Truh dang ei, đei hlŏh 13% unh hnam tơ nuh tơ̆ tơ ring sơ lam hlôi tŏk klăih đơ̆ng tơ nuh hin kơ jăp ‘lơ̆ng; 96% unh hnam đei yoa unh điên tĕh đak; 85% kơ sô̆ unh hnam man đei hnam kơ jăp ‘lơ̆ng; 4/13 xăh sơ lam jang kĕh tơ drong pơ jing tơ ring tơ rang ‘nao.

Kŭm hăm ‘nŏh, dôm anih jang, khul grŭp găh khul linh vei lăng tơ ring sơ lam Kon Tum adrin roi tơ ƀôh ăn anih jang đảng, khul kơ dră tơ ring, pơ lei pơ la, xăh sơ lam chih pơ jing hla ar pơ kăp, tơ drong hơ găt pơ jing tơ drong arih xa ‘lơ̆ng, rơ gei; vei kơ jăp, atŏk tơ iung dôm tơ drong jang so, tơ drong juăt ‘lơ̆ng đơ̆ng sơ̆ kon pơ lei pơ lei. Hơ tŏk hơ năp jang đơ̆ng kră pơ lei, bơ ngai đei kon pơ lei lui yom, kăn ƀô̆ jĭ bơ ngai kon kông lơ̆m tơ drong tơ roi tơ băt, krao hơ vơn kon pơ lei sut pơ đĭ dôm tơ drong juăt ưh kơ ‘lơ̆ng, pơ jing, atŏk tơ iung dôm pơ lei jang xa rơ gei, vei kơ jăp dôm tơ drong jŏh ayŏ kơ dŏ xoang ‘lơ̆ng.

Hŏk pơ hrăm păng jang kiơ̆ jơ hngâm đon ‘lơ̆ng đơ̆ng Ƀô đô̆i Ƀok Hô hăm lơ tơ drong jang tôch rơ đăh, đei yoa, Ƀô đô̆i vei lăng tơ ring sơ lam Kon Tum vang tơ gop pơ jing đei tơ drong jang kon pơ lei vang vei kơ jăp tơ ring sơ lam, hơ met kơ jăp đon lui đơ̆ng kon pơ lei hăm anih jang đảng, khul kơ dră tơ ring păng jing gơng tơ ƀưh hơ nhăk trong jang đơ̆ng Đảng, khôi luơ̆t tĕh đak truh hăm kon pơ lei. ‘Nŏh kŭm jing tơ drong pran vă đe sư adrin, kơ chăng vang bơ̆ jang dăr joang, vei lăng kơ jăp ‘lơ̆ng jrăng sơ lam, trong sơ lam tĕh đak tơ̆ dêh char.

Dơ̆ng: Tơ blơ̆