VOV4.Bahnar - ‘Năr 5/10, Khul tang măt Kuô̆k hô̆i dêh char Gia Lai đei jơ tơƀâp bơ ngai tăh hla tơ̆ 4 xăh tơ ring sơ lam đei: Ia Mơr, Ia Ga, Ia Piơr păng Ia Lâu, apŭng Chư Prông, tơ roi găh tơ drong vă hop akŏm mă 2, Kuô̆k hô̆i jăl XV păng chih iŏk nơ̆r tơ gop đơ̆ng bơ ngai tăh hla.

Khul tang măt Kuô̆k hô̆i dêh char Gia Lai tơ ƀâp bơ ngai tăh hla tơ̆ apŭng Chư Prông

Tơ̆ jơ tơ ƀâp, dôm bơ ngai tăh hla pơ ma tơ lĕch 1,2 tơ drong nhen: Anih gru groa so Plei Me đei chih tơ băt jĭ anih gru groa kơ tĕh đak mă lei tam mă đei tơ lĕch jên man hơ met tơ găl vă sơng tơ moi truh lăng, athei tơ rĕk truh dôm tơ drong jang pơm trong tơ̆ tơ ring, chĕng song tĕh oei, tĕh choh jang xa ăn kon pơ lei kon kông.

Bơ ngai tăh hla Gia Lai oei athei dôm anih jang kơ pal sek tơ lang dôm tơ drong ƀơm truh unh điên măt ‘năr pơm kơ pal bơ bŭng hnam, vei lăng dôm tơ drong jang rong kon tơ rong tơ̆ tơ ring, dôm tơ drong ưh kơ lăp mưh pơ gơ̆r hŏk trư̆k tuyê̆n… Mă loi, lơ bơ ngai tăh hla pơ ma truh tơ drong “tơ tŏ” găh tơ drong tang găn jĭ Covid – 19, pơm thoi yơ vă chă tơ drong jang ăn dôm bơ ngai ‘nao vih đơ̆ng tơ ring đei jĭ.

Dơ̆ng: Tơ blơ̆