VOV4.Bahnar - Bơ̆ jang tơ drong tơ ƀâp bơ ngai tăh hla đơ̆ng rŏng kơ hop akŏm mă 2, Kuô̆k hô̆i jăl XV, ‘nao âu, Kơ dră chĕp kơ̆l Ban nội chính trung ương Phan Đình Trạc kŭm hăm Khul tang măt Kuô̆k hô̆i dêh char Lâm Đồng pơ gơ̆r tơ ƀâp bơ ngai tăh hla tơ̆ tơ ring tơ ring. Kiơ̆ kơ ‘nŏh, bơ ngai tăh hla tơ ƀôh đon hơ iă găh tơ drong jơ nei đơ̆ng hop akŏm Kuô̆k hô̆i ‘nao âu hăm tơ drong tơ plih ‘nao, rơ gei, atŭm hăm ‘nŏh tơ lĕch lơ nơ̆r pơ ma apinh ƀơm truh lơ tơ drong gĭt kăl tơ̆ tơ ring.

Đơ̆ng rŏng kơ pơ tôch hop akŏm mă 2 Kuô̆k hô̆i jăl XV, Kơ dră chĕp kơ̆l Ban nội chính trung ương Phan Đình Trạc kŭm hăm Khul tang măt Kuô̆k hô̆i dêh char Lâm Đồng pơ gơ̆r tơ ƀâp bơ ngai tăh hla 1,2 xăh, phương găh dôm apŭng Đức Trọng, Lạc Dương păng plt Đà Lạt, dêh char Lâm Đồng.

Jơ tơ ƀâp bơ ngai tăh hla tơ̆ xăh Lát, apŭng Lạc Dương, dêh char Lâm Đồng

Tơ̆ dôm anih tơ ƀâp, bơ ngai tăh hla Lâm Đồng tơ ƀôh đon lui păng hơ mĕng lơ̆m dôm tơ drong tơ chơ̆t vă atŏk tơ iung mŭk drăm, tơ pôl, trong jang vă tŏk hlôi mơ mat tat yoa đơ̆ng jĭ Covid-19 đơ̆ng Khul kơ dră tĕh đak, đơ̆ng Kuô̆k hô̆i kiơ̆ đơ̆ng hop akŏm mă 2 Kuô̆k hô̆i jăl XV. Atŭm hăm ‘nŏh , tơ lĕch nơ̆r pơ ma apinh ƀơm truh lơ tơ drong nhen tơ drong vei lăng tĕh đak lơ̆m rim tơ drong jang, dôm tơ drong tơ gŭm vei sơ đơ̆ng tơ drong arih xa tơ pôl păng trong atŏk tơ iung jang xa, tĕch mơ dro lơ̆m khei ‘năr oei đei jĭ.

Tơ̆ xăh Hiệp An, apŭng Đức Trọng, đei lơ nơ̆r pơ ma đơ̆ng bơ ngai tăh hla ƀơm truh tơ̆ tĕh, mă loi ‘nŏh jĭ tơ drong pơm hla ar tĕh hiơ̆; tơ drong chĕng hơ met tĕh choh jang xa tam mă rơ đăh; tơ drong tơ klăh hô̆ khâu, pơm trong tơ̆ tơ ring, hrŭ ‘mong tĕh vă man dơ nâu đak Ta Hoét oei ưh kơ lăp... Kiơ̆ bơ ngai tăh hla Mai Khả Cử, tơ̆ plei Tân An, xăh Hiệp An, hơ dai hăm dôm tơ dỏng tơ tŏ âu, tơ drong vei lăng ming man kŭm jing tơ drong tơ tŏ kăl đei Kuô̆k hô̆i, khul kơ dră jơ̆p tơ ring tơ rĕk, hơ met ming.

"Xăh Hiệp An đei lơ̆m tơ ring vă pơ jing tơ ring kơ drâm mă lei tơ drong ming man ưh đei tơ prŏh ‘lơ̆ng. Tơ ter trong gre 20 man thoi yơ mă hnam, anih tĕch mơ dro, et xa, plŏh plĕch băl. Anih pơm hơ drol ‘nŏh ưh đei phak, pơm đơ̆ng rŏng ‘nŏh phak... Athei anih jang kơ pal jăh dăr hơ len, lăng năng tơ drong vei lăng đe ming man".

Nhen thoi nŏh mơ̆n, bơ ngai tăh hla xăh Lát, apŭng Lạc Dương ‘nŏh pơ ma tơ lĕch 1,2 tơ drong ƀơm truh tơ drong tơ plih tĕh choh jang xa, tĕh bri jing tĕh oei; tơ drong pơm hla ar tĕh, tơ drong pơ jing plei hle ƀơm truh tơ drong jang man Hnam kơmăy unh điên Đạ Dâng - Đạ Chomo; tơ gŭm tŏk iŏk jên vă choh jang xa, tŏk klăih đơ̆ng tơ nuh hin; tơ drong tơ gŭm hăm 1,2 kơ chư̆k jang tơ̆ xăh. Bơ ngai tăh hla oei athei hơ tŏk hrĕnh tơ drong jang pơm trong ĐT 726 vă yak hiôk hian, pơ yoa ăn tơ drong jang tŏk mŭk drăm; sek tơ lang tơ păt gre chơ tơ mam trăp hlŏh tơ drong, hơ tŏk kơ sô̆ unh hnam yoa đak rơ gŏh…

Ƀok Phan Đình Trạc iung pơ ma lơ̆m jơ tơ ƀâp

Kơ plăh ‘nŏh, bơ ngai tăh hla plt Đà Lạt tôch tơ rĕk truh tơ drong tang găn jĭ Covid-19 păng dôm trong vă tơ iung ming jang xa, tĕch mơ dro, pơ vih pơ văn, jang tŏk mŭk drăm, tơ pôl. Bơ ngai tăh hla Nguyễn Thị Hiếu Hòa, Kơ dră chĕp kơ̆l Anih jang pơ gang Đà Lạt akhan, hăm tơ mam păng bơ ngai ưh kơ lơ, hơ nơ̆ng đei hrăt hrot bơ ngai jĭ nhen hrei ‘nâu, tơ dăh ưh đei trong hơ met tơ tom ‘nŏh Đà Lạt hơ nat vă gơ̆h jang đei 2 tơ drong tơm lơ̆m khei ‘năr oei đei jĭ hơ buh.

“Anih oei hơ nơ̆ng bơ̆ jang chă khăm hơ met jĭ, tang găn jĭ, vei lăng kơ sô̆ măt bơ ngai, hơ dai hăm tang găn jĭ hơ buh. Bơ ngai jang oei ưh kơ măh, kơ plăh ‘nŏh oei hơ nơ̆ng pơm kiơ̆ tơ drong kăt tơ jur kơ sô̆ bơ ngai jang dơ̆ng. Tơ̆ hơ năp kơnh, mưh tơ lĕch dôm tơ drong jang tơ̆ anih hơ met jĭ kŭm nhen tang găn jĭ, dôm tơ drong jang tơ̆ hnam pơ gang, khăm hơ met, vei lăng jơ hngâm pran... ưh jor gô jang roi glĕh păng đei hrăt bơ ngai jĭ tơ̆ hnam pơ gang tơ ring”.

Dơ̆ng tang ăn Khul tang măt Kuô̆k hô̆i dêh char Lâm Đồng, Kơ dră chĕp kơ̆l Ban Nội chính Trung ương Phan Đình Trạc chih răk, tơ chĕng ‘lơ̆ng dôm nơ̆r pơ ma lăp hăm yăn âu, lăp hăm tơ drong arih xa kơ bơ ngai tăh hla. Atŭm hăm ‘nŏh tơ blang, pơm hơ dăh dơ̆ng 1,2 tơ drong ƀơm truh tơ drong tơ gŭm đơ̆ng rŏng kơ klăih đơ̆ng tơ nuh hin, vă gơ̆h klăih đơ̆ng tơ nuh hin kơ jăp ‘lơ̆ng; tơ drong tơ gŭm hăm kăn ƀô̆ tơ̆ xăh, mă loi jĭ kăn ƀô̆ tơ̆ pơ lei pơ la. Kăl loi tơ rĕk truh nơ̆r pơ ma đơ̆ng bơ ngai tăh hla tơ̆ xăh Lát, apŭng Lạc Dương găh tĕh, ƀok Phan Đình Trạc athei khul kơ dră tơ ring păng dôm anih jang kơ pal tơ̆ tơ ring đei trong sek tơ lang tơ tom.

“‘Nâu jĭ 1 xăh groi kông hlôi tŏk klăih đơ̆ng tơ nuh păng jang đei tơ ring tơ rang ‘nao. Hơ pơi ‘mĕh kon pơ lei bơ̆n adrin hlŏh dơ̆ng, tơ guăt 1 ƀơ̆r đon, hơ mơt pơ ‘lơ̆ng mơ mat tat, jang tŏk mă pran hlŏh dơ̆ng, kơ jung hlŏh dơ̆ng vă bơ̆n ưh lăp vei đei xăh Tơ ring tơ rang ‘nao đĕch, mă oei iŏk đei xăh tơ ring tơ rang ‘nao ‘lơ̆ng hơ iă dơ̆ng. Tăp dăr tơ drong ƀơm truh tĕh oei, tĕh choh jang xa, pơm hla ar tĕh, hrŭ ‘mong tĕh, pơ jing plei hle… ‘nŏh athei apŭng, xăh, dêh char jăh tơ gŭm ăn kon pơ lei. Yoa ‘nŏh jĭ tơ drong hơ pơi ‘mĕh tôch tơ găl vă choh jang xa, pơm sơ đơ̆ng tơ drong arih.

Ƀlep ƀât tơ ƀâp bơ ngai tăh hla đơ̆ng rŏng hop akŏm mă 2, Kuô̆k hô̆i jăl XV, Kơ dră chĕp kơ̆l Ban nội chính trung ương Phan Đình Trạc hơ păh ăn dêh char Lâm Đồng lơ tơ mam, pơ gang pơ yoa ăn tơ drong tang găn jĭ Covid-19, đei: 10 tŏ kơ măy dui jơ hngâm, 200.000 blăh che gom păng 200.000 tŏ tơ mam test hrĕnh jĭ Covid-19 đơ̆ng Anih tơm vei lăng jang pơ gang. Atŭk hăm ‘nŏh, tơ gŭm 600 tơ pu tơ mam ăn công nhân păng bơ ngai jang mơ mat tat tơ̆ dêh char Lâm Đồng iŏk đơ̆ng Tổng Liên đoàn Lao động Việt Nam.

Dơ̆ng: Tơ blơ̆