VOV4.Bahnar - Giĕng âu ki, Khul tang măt Kuô̆k hôi dôm dêh char Tây Nguyên pơ gơ̆r tơ ƀâp bơ ngai tăh hla adrol kơ hop akŏm mă 2, Kuô̆k hô̆i jăl XV. Tơ̆ dôm anih tơ ƀâp, bơ ngai tăh hla tơ ƀôh đon hơ iă tơ̆ hơ năp dôm tơ drong jơ nei đơ̆ng Hop akŏm mă 1 Kuô̆k hô̆i jăl XV, atŭm hăm ‘nŏh drơ̆ng nơ̆r hăm dôm tơ drong vă bơ̆ jang lơ̆m hop akŏm mă 2, păng tơ lĕch lơ nơ̆r pơ ma, apinh ƀơm truh dôm tơ ring kăl tơ̆ tơ ring. Mă hơ dăh nhen jăh ƀơk mă tôm vắc xin tang găn jĭ Covid-19 ăn kon pơ lei, đei trong tơ gŭm ăn kon pơ lei jang tŏk dơ̆ng mŭk drăm đơ̆ng rŏng kơ jĭ, tơ rĕk truh jên tơ mât ăn tơ drong choh jang xa tơ̆ Tây Nguyên,….

Tơ̆ dôm ‘măng tơ bâp bơ ngai tăh hla, Khul tang măt Kuô̆k hô̆i dêh char Dak Lak chih iŏk lơ nơ̆r pơ ma ƀơm truh trong vă bơ̆ jang kiơ̆ 2 tơ drong tơm, jang atŏk tơ iung mŭk drăm tơ pôl hai, tang găn jĭ đei yoa ‘lơ̆ng hai đei lơ bơ ngai tăh hla pơ ma tơ lĕch. Atŭm hăm ‘nŏh, bơ ngai tăh hla apinh hăm Kuô̆k hô̆i, Khul kơ dră tĕh đak, dôm anih tơm, anih jang kơ pal kơ Trung ương păng dêh char hơ nơ̆ng pơ gơ̆r jang mă ‘lơ̆ng tơ drong tang găn jĭ COVID-19, chă vắc-xin ƀet ăn kon pơ lei, hơ tŏk khul jang pơ gang, jô̆ hloi bơ ngai, tơ mam, kăl loi jĭ khul kăn ƀô̆ jang pơ gang tơ̆ tơ ring vă jăh tang găn đei jĭ, hơ nhăk tĕh đak vih dơ̆ng thoi hmă lơ̆m chăl ‘nao.

Khul tang măt Kuô̆k hô̆i dêh char Dak Lak tơ ƀâp bơ ngai tăh hla

Bơ ngai tăh hla Lê Văn Thao tơ̆ xăh Ea Trang, apŭng M’Drak đei nơ̆r pơ ma: “Khei ‘năr âu ki, hăm vacxin đei ƀơk, apŭng pơ gơ̆r ƀet ăn dôm bơ ngai kiơ̆ grŭp kăl tơ gŭm ƀet hơ drol, mă lei vă gơ̆h đei yoa hlŏh dơ̆ng, găn đei tơ drong jĭ tơ pŏh lơ̆m tơ pôl ‘nŏh apinh anih jang kơ pal tơ rĕk truh, ƀơk vacxin mă tôm vă pơm thoi yơ gơ̆h ƀet ăn rim bơ ngai, ƀet ăn đĭ đăng kon pơ lei hai. Kăl loi jĭ kon pơ lei tơ̆ tơ ring kon kông, tơ ring hơ tăih yăih, dôm tơ ring ƀônh tơ pŏh jĭ păng anih ăn oei hơ drô̆, tơ drong tang găn jĭ oei mơ mat tat.

Kŭm lơ̆m giĕng âu ki mơ̆n, Khul tang măt Kuô̆k hô̆i dêh char Gia Lai đei jơ tơ ƀâp bơ ngai tăh hla tơ̆ 4 xăh sơ lam đei: Ia Mơr, Ia Ga, Ia Piơr păng Ia Lâu, apŭng Chư Prông, tơ roi găh dôm tơ drong kăl vă hop akŏm mă 2, Kuô̆k hô̆i jăl XV păng chih iŏk nơ̆r pơ ma đơ̆ng bơ ngai tăh hla. Tơ̆ dôm anih tơ ƀâp, bơ ngai tăh hla tơ ƀôh đon hơ iă tơ̆ hơ năp dôm tơ drong iŏk đei lơ̆m hop akŏm mă 1 Kuô̆k hô̆i jăl XV hlôi pôk rơih đei lơ kơ dră chĕp kơ̆l Kuô̆k hô̆i, tĕh đak, Khul kơ dră tĕh đak jăl jang đơ̆ng 2021-2026 hăm kơ phĭu lui tôch lơ. Atŭm hăm ‘nŏh athei: hơ met ming, chih tơ mât dơ̆ng 1,2 tơ drong lơ̆m luơ̆t nhen: Luơ̆t tĕh, khôi luơ̆t tơ kêng tơ drong yoch sơ năm 2015, Luơ̆t năm pơm linh, Luơ̆t pơ jei pôk hơ păh… vă dôm anih jang tơ lĕch jang tơ păt ‘lơ̆ng, găn lê̆ tơ drong pơm glăi luơ̆t păng lăp hăm tơ drong arih xa yăn âu. Hơ nơ̆ng jang hơ met ming trong jang atŏk tơ iung dơ̆ng mŭk drăm tơ pôl.

Tơ ƀâp bơ ngai tăh hla tơ̆ Gia Lai adrol kơ hop akŏm mă 2 Kuô̆k hô̆i jăl 5

Găh dôm tơ drong kăl tơ̆ tơ ring, bơ ngai tăh hla dêh char Gia Lai tơ roi: Anih gru groa Plei Me đei chih tơ băt jĭ anih gru groa gĭt kăl kơ tĕh đak mă lei tam mă đei tơ lên jên ming man tơ găl vă sơng tơ moi truh, tơ rĕk truh tơ drong tơ mât jên jang pơm trong tơ̆ tơ ring, chĕng song tĕh oei, tĕh choh jang xa ăn kon pơ lei kon kông. Bơ ngai tăh hla Gia Lai oei athei dôm anih jang kơ pal sek tơ lang dôm tơ drong tơ tŏ ƀơm truh tơ drong atŏk tơ iung unh điên măt ‘năr pơm kơ pal bơ bŭng, vei lăng tơ drong rong kon tơ rong tơ̆ tơ ring, dôm tơ drong ưh kơ lăp mưh pơ gơ̆r pơ tho hŏk trư̆k tuyê̆n… Mă loi, lơ bơ ngai tăh hla pơ ma truh tơ dỏng tơ tŏ găh tơ drong jang tang găn jĭ Covid – 19, pơm thoi yơ chă tơ drong jang ăn bơ ngai ‘nao vih đơ̆ng tơ ring đei jĭ.

Bơ ngai tăh hla Nguyễn Trường An, tơ̆ xăh Ia Lâu, apŭng Chư Prông pơ ma: “Mă tơ pă kon hơ ‘lơ̆p tơ̆ tơ ring mưh vih đơ̆ng tơ ring đei jĭ kŭm tôch mơ mat tat, oei hrei ‘nâu ‘nŏh ưh chă đei tơ drong jang tơ̆ tơ ring. Tơ drong nai dơ̆ng kơ plăh âu, lơ bơ ngai chông băl brŏk đơ̆ng tơ ring đei jĭ dơ̆ng, kơ na tơ drong ‘nâu kŭm hơ pơi ‘mĕh anih jang kơ pal tơ chĕng truh. Tơ drong arih xa kơ kon pơ lei tơ̆ tơ ring sơ lam tôch mơ mat tat, hơ pơi ‘mĕh tĕh đak đei trong tơ gŭm, pơ jing tơ drong ‘lơ̆ng ăn kon pơ lei vă gơ̆h kĕ jang tŏk, pơ tho ăn kon pơ lei pơ jing trong jang xa, rei pơ tăm, rong kon tơ rong vă atŏk tơ iung mŭk drăm”.

Tơ̆ Kon Tum, Khul tang măt Kuô̆k hô̆i tơ ƀâp bơ ngai tăh hla tơ̆ apŭng Sa Thầy, Kon Plông păng Kon Rẫy. Bơ ngai tăh hla lăp đon hăm dôm tơ drong vă bơ̆ jang lơ̆m hop akŏm ‘măng mă 2, Kuô̆k hô̆i jăl XV; tơ gŭm ăn trong jang, tơ drong pơ gơ̆r đơ̆ng Khul kơ dră tĕh đak mưh tang găn jĭ COVID-19 păng hơ iă mưh ƀôh kon pơ lei, mă loi jĭ dôm bơ ngai ưh pŭn ai đei tơ gŭm tơ tom.

Bơ ngai tăh hla Kon Tum pơ ma tơ lĕch nơ̆r hăm Khul tang măt Kuô̆k hô̆i

Găh dôm tơ dỏng tơ̆ tơ ring, bơ ngai tăh hla Kon Tum hơ pơi ‘mĕh tơ ‘ngla tơ mât jên jang jăh hơ tŏk hrĕnh tơ drong jang hơ met pơ ‘lơ̆ng dôm jăl trong gĭt kăl tơ̆ trong gre 24 đơ̆ng thĭ trơ̆n Măng Đen, apŭng Kon Plông năm tơ̆ dêh char Quảng Ngãi. Hơ nơ̆ng tơ gŭm hŏk tro kon kông hŏk oei kơ tă tơ̆ hnam trưng. Iŏk pơ dreu dôm tơ drong jang bơ̆ jang hiơ̆ hyĭn, ưh đei yoa vă huei kơ hiong, hŭt hơ chăng tĕh. Hơ tŏk tơ drong vei lăng tơ mam drăm bri brăh. Găn tôch ai tơ drong ưh ‘lơ̆ng đơ̆ng dơ nâu đak hnam kơ măy unh điên păh lăp păng iĕ hăm tơ drong arih xa kŭm nhen choh jang xa kơ kon pơ lei.

Hăm tơ drong vei lăng bri, bơ ngai tăh hla Kon Tum athei dôm anih jang kơ pal jăh hơ len năng hơ găt tĕh bri đei pơ jao kiơ̆ tơ drong tơ chơ̆t 178 đơ̆ng Khul kơ dră tĕh đak. Đei trong tơ gŭm mă ‘lơ̆ng, kăl loi hăm kon pơ lei kon kông găh hơ drĕch, jên jang, ki thuơ̆t vă kon pơ lei pơ tăm ming dơ̆ng ‘long bri tơ̆ groi tĕh hŏh.

Dơ̆ng: Tơ blơ̆