VOV4.Bahnar - ‘Măng hop akŏm Kuô̆k hô̆i hội jăl 14 hlôi tôch hăm tơ drong jang kĕh ‘lơ̆ng tơ drong rơih bơ ngai jang tih, lơ̆m nŏh đei Khul kơ dră tĕh đak jăl ‘nao. Đơ̆ng rŏng kơ iŏk kơ chư̆k đơ̆ng Thủ tướng ‘nao Phạm Minh Chính kŭm nhen dôm bơ ngai jang lơ̆m khul kơ dră ‘nao, dôm bơ ngai tang măt Kuô̆k hô̆i tơ ƀôh đon lui păng hơ pơi ‘mĕh mĭnh khul kơ dră tĕh đak bơ̆ jang pran kơ tang, tơ păt ‘lơ̆ng vă pơ jing tơ drong hiôk hian, bơ̆ jang gơ̆h hơ gei.

Dôm bơ ngai tang măt tơ chĕng ‘lơ̆ng akhan thủ tướng ‘nao Phạm Minh Chính jĭ bơ ngai rơ gei, đei đon tơ plih ‘nao, jang tơ năp, tơ drong jang hơ gei đei tơ ƀôh kiơ̆ đơ̆ng dôm tơ drong jang mă ƀok iŏk chĕp kơ̆l păng kiơ̆ đơ̆ng bơ̆ jang tơ̆ yăn âu. Bơ ngai tang măt Bùi Sĩ Lợi, khul Thanh Hóa pơ ma hơ dăh:

“Hăm Thủ tướng tĕh đak, ‘nâu jĭ um rup bơ ngai chĕp kơ̆l tôch tơ păt ‘lơ̆ng, jang kiơ̆ rim tơ drong tơ̆ yăn âu ƀât ƀok pơm Bí thư đảng dêh char Quảng Ninh, đơ̆ng rŏng kơ ‘nŏh pơm Kơ dră Anih pơ gơ̆r trung ương păng jing bơ ngai băt hơ dăh trong bơ̆ jang đơ̆ng Đảng. Hăm jơ hngâm đon ‘nŏh, hăm tơ drong iŏk jang lơ tơ drong thoi nŏh, ‘moi kiơ̆ kơ jăp tơ̆ yăn âu, inh tôch hơ mĕng Thủ tướng jĭ bơ ngai jang pran kơ tang, akŏm lơ̆m dôm tơ drong gĭt kăl kơ tĕh đak, sek tơ lang dôm tơ drong tơ tŏ mă kon pơ lei oei gô chang”.

Đei đunh khei ‘năr bơ̆ jang hăm Thủ tướng Phạm Minh Chính ƀât ƀok pơm Bí thư đảng dêh char Quảng Ninh sơ̆, bơ ngai tang măt Đỗ Thị Lan, khul Quảng Ninh pơ ma akhan:

“Thủ tướng Phạm Minh Chính hơ nơ̆ng tơ ƀôh hơ dăh jĭ bơ ngai rơ gei, băt lăng hơ tăih păng bơ ngai bơ̆ jang tôch tơ năp, ‘moi kiơ̆ trong jang đơ̆ng trung ương păng yoa tơ drong đei yoa kơ kon pơ lei, yoa tơ drong jang tŏk kơ tĕh đak. Lơ̆m khei ‘năr bơ̆ jang tơ̆ Quảng Ninh nhôn ƀôh hơ dăh dôm tơ drong jang đei mă thủ tướng ‘măn ăn, pơ tih gia nhen mong akŏm jên ăn tơ drong man anih jang, pơm trong, lơ̆m tơ drong chĕng hơ met, tơ prŏh hơ drol păng tơ lĕch trong jang kiơ̆ vă atŏk tơ iung dôm tơ ring jang kơ măy, tơ ring jang mŭk drăm, tơ guăt rim tơ drong jang mŭk drăm panwg tĕh đak, akŏm jơ hngâm tưk tơ iung trong hrơ̆ch ‘lơ̆ng... đang kơ ‘nŏh bơ̆ jang hơ met ming trong pơm hla ar vei lăng”.

Oei bơ ngai tang măt Nghiêm Vũ Khải, khul Hải Phòng ‘nŏh akhan: Mơ mat tat kŭm nhen tơ drong nol hrei ‘nâu lơ̆m tơ drong chĕp kơ̆l pơ gơ̆r pơ ma atŭm păng trong bơ̆ jang kơ Khul kơ dră tĕh đak pơ ma adrô̆ ‘nŏh jĭ chăl ‘nao dang ei hơ nơ̆ng tơ plih, jur tŏk. ‘Nŏh jĭ tơ drong mă Thủ tướng ‘nao păng Khul kơ dră tĕh đak jăl ‘nao athei tơ rĕk truh:

“Ƀât mă tĕh đak đei lơ tơ drong ‘lơ̆ng, kŭm đei hloi tơ drong nol, đei lơ tơ drong nol kơ tă lơ̆m khul kơ dră tĕh đak nhen tơ drong hơ met ming trong pơm hla ar vei lăng, mă đơ̆ng hlôi iŏk đei lơ tơ drong jơ nei ră mă lei oei đei lơ tơ drong tam mă lăp hai, dăh mă tơ drong tơ dra hơ drol rim tơ drong lơ̆m apŭng plenh tĕh păng sek tơ lang ‘lơ̆ng dôm tơ drong tơ roi, ‘nâu jĭ tơ drong kăl đei bơ̆ jang mă hrĕnh tơ hơ năp tơ drong tơ plih găh mŭk drăm, anih tơ mât jên jang. Bơ̆n athei iŏk yoa kơ măy kơ mŏk ‘nao, iŏk yoa tơ drong rơ gei ưh lăp lơ̆m tơ drong jang khoa hŏk, kơ măy kơ mŏk đĕch mă lơ̆m tơ drong vei lăng, tơ dra hơ drol găh anih pơm tơ lĕch tơ mam, tĕch mơ dro kơ apŭng plenh tĕh hai, rim tơ drong kăl đei tơ plih ‘nao rơ gei, kơ chăng mât jang hơ doi păng kơ chăng chơng hơ nhăk anih jang mŭk drăm jang xa kơ jăp ‘lơ̆ng”.

Tơ̆ hop akŏm ‘măng mă âu, Kuô̆k hô̆i pôk hơ tŏk 2 ‘nu Phó Thủ tướng tĕh đak păng 12 ‘nu kơ dră chĕp kơ̆l anih jang kơ pal. Dôm bơ ngai tang măt akhan, dôm bơ ngai đei pôk pơm Phó Thủ tướng, Kơ dră chĕp kơ̆l anih tơm ‘măng mă âu jĭ dôm bơ ngai, khei ‘năr âu ki hlôi bơ̆ jang gơ̆h hơ gei, đei yoa tơ̆ tơ ring, băt trong vei lăng anih jang păng đei đon jang tơ năp hăm tơ drong jang kơ dih. Mă loi ‘nŏh jĭ bơ ngai rơ gei, đei đon ‘lơ̆ng, jang tơ năp, đei bơ ngai tang măt Kuô̆k hô̆i, dôm bơ ngai jang lơ̆m Khul kơ dră tĕh đak păng kon pơ lei lui. ‘Nâu jĭ tơ drong ‘lơ̆ng ăn dôm ƀok yŏng chĕp kơ̆l anih jang bơ̆ jang tơ drong jang đơ̆ng kơ dih tơ̆ hơ năp kơnh. Bơ ngai tang măt Phạm Văn Hòa, khul Đồng Tháp akhan:

“Inh tơ chĕng, blŭng a dôm bơ ngai chĕp kơ̆l anih jang, bơ̆ jang ‘lơ̆ng dôm tơ drong jang đơ̆ng dôm bơ ngai pơ gơ̆r hơ drol ki ‘măn ăn, dang ei tam mă jang đei tơ̆ anih jang lơ̆m tĕh đak, kiơ̆ tơ drong hơ pơi ‘mĕh đơ̆ng kon pơ lei vă chĕp kơ̆l pơ gơ̆r bơ̆ jang khŏm đei tơ̆ hơ năp kơnh. Vă dôm bơ ngai chĕp kơ̆l anih jang ‘nŏh bơ̆ jang tơ drong jang đơ̆ng kơ dih, pơm lăp hăm tơ drong ‘mĕh vă đơ̆ng dôm bơ ngai tang măt Kuô̆k hô̆i mưh đe sư lui, pôk hơ tŏk. Dôm tơ drong ‘nŏh, tơ drong mơ mat tat đơ̆ng kon pơ lei tơ̆ noh, ‘nŏh đe ƀok yŏng anih jang athei vang jang hơ doi, tơ lĕch trong bơ̆ jang đơ̆ng kơ dih vă sek tơ lang dôm tơ drong mơ mat tat”.

Hơ drô̆ hăm anih pơ tho pơ hrăm, bơ ngai tang măt Nguyễn Thị Việt Nga, khul Hải Dương hơ pơi ‘mĕh, ƀok Kơ dră ‘nao gô tơ lĕch đei trong jang mă rơ đăh vă anih pơ tho pơ hrăm đei hơ yak tŏk ‘lơ̆ng găh pơ tho pơ hrăm nhen tơ drong tơ chơ̆t đơ̆ng Hop akŏm mă 13 kơ Đảng:

“Nhôn tôch hơ mĕng lơ̆m jăl truh, Anih tơm vei lăng pơ tho pơ hrăm gô đei trong jang trŏ ƀlep ƀiơ̆. Bơ̆n tơ chĕng hơ len vă jang tŏk dăh mă hơ met ming trong pơ tho pơ hrăm ‘nŏh jĭ tơ drong jang ưh kơ sĭ vă jang 1,2 năr đĕch ôh, kơ na athei tơ chĕng hơ len mă ‘lơ̆ng, mă kơ chăng. Bơ̆n ưh gơ̆h hăt hot tơ plih ming, nhen vă prĕh lê̆ kơ nhŏng đĕch mă athei pơm tơ plih găh trong jang đunh đai, athei đei kơ sô̆ chih hơ len. Bơ̆n athei hơ len năng mă brĕ, đei trong jang mă rơ đăh, đei khei ‘năr hơ met tôch ai, rơ đăh rơ đong, ưh gơ̆h hăt hot kiơ".

Nhen nơ̆r hơ ngăh tơ̆ hơ năp Kuô̆k hô̆i, Thủ tướng Phạm Minh Chính pơ kăp kŭm hăm dôm bơ ngai jang lơ̆m Khul kơ dră tĕh đak vă akŏm đĭ jơ hngâm, yak hlŏh rim tơ drong mơ mat tat, pơ long nol; ‘moi kiơ̆, tưk tơ iung tơ drong juăt, đon hlôh vao kăp gĭt; adrin kŭm hăm dôm bơ ngai chĕp kơ̆l Khul kơ dră tĕh đak, bơ ngai jang lơ̆m Khul kơ dră tĕh đak tơ guăt 1 ƀơ̆r đon, tơ păt ‘lơ̆ng, bơ̆ jang pran kơ tang, rơ gei, đei yoa, đĭ jơ hngâm pơ vih ăn tĕh đak, pơ vih ăn kon pơ lei. Nhôn lui, hơ mĕng dôm khei ‘năr ‘lơ̆ng hơ iă ƀiơ̆ ăn tĕh đak gô truh tơ̆ hơ năp kơnh.

Dơ̆ng: Tơ blơ̆