VOV4.Bahnar - Thủ tướng tĕh đak ‘nao tơ lĕch tơ drong tơ chơ̆t găh iŏk tơ lĕch phe đơ̆ng Anih ‘măn răk kơ tĕh đak ăn dôm dêh char Bình Phước, Bạc Liêu, Sóc Trăng vă tơ gŭm ăn kon pơ lei tơ ƀâp mơ mat tat yoa đơ̆ng jĭ COVID-19. Akŏm đĭ đăng kơ sô̆ phe đei ƀơk hlŏh 4.117 tân.

Tơ drong tơ chơ̆t chih hơ dăh: Lăng kiơ̆ nơ̆r apinh đơ̆ng Anih tơm vei lăng bơ ngai jang, linh jĭ rơ ka păng tơ bôl, Anih tơm vei lăng jên hu, ‘năr brei (16/8), Thủ tướng tĕh đak hlôi tơ lĕch tơ drong tơ chơ̆t asong ăn Anih tơm vei lăng jên hu iŏk ƀơk đĕch hlŏh 4.117 tân phe đơ̆ng anih ‘măn răk kơ tĕh đak ăn dôm dêh char Bình Phước, Bạc Liêu, Sóc Trăng vă tơ gŭm ăn kon pơ lei tơ ƀâp mơ mat tat yoa đơ̆ng jĭ COVID-19.

Kiơ̆ kơ ‘nŏh, dêh char Bình Phước đei tơ gŭm hlŏh 559 tân phe; dêh char Bạc Liêu đei tơ gŭm hlŏh 636 tân phe păng dêh char Sóc Trăng đei tơ gŭm hlŏh 2.921 tân phe. Thủ tướng tĕh đak pơ jao ăn Anih tơm vei lăng bơ ngai jang, linh jĭ rơ ka păng tơ pôl, Anih tơm vei lăng jên hu jang kiơ̆ tơ drong hơ găt, roi tơ băt păng chih hơ met tôm kơ sô̆ ƀơk vă tơ roi ăn anih jang kơ pal.

Dơ̆ng: Tơ blơ̆