Tơ̆ Đắk Lắk – tơring pơtăm cheh phe tơm kơ lơ̆m teh đak, lơ anih mơdro sa tŏk bŏk kơchăng hơmet ming dơ̆ng kơjă kăp gĭt, tơmơ̆t jên jang ‘lơ̆ng đơ̆ng tơring tơmam, pơm tơlĕch jrŭ truh tĕch mơdro lơ̆m apŭng plĕnh teh. Ƀok Lê Đình Tư, Kơdră vei lăng Kŏng ti TNHH MTV Aeroco tơbăt, anih mơdro sa tơchĕng hơlen - hơtŏk tơiung tơmam hai, sơng đei dôm khŭl chă tơmang lăng apŭng plĕnh teh truh lăng trong pơm tơlĕch hai. Tơmam đơ̆ng mir pơgar pơtơm đei hơnhăk tơ̆ dôm hơnih tĕch mơdro điện tử tơ̆ grŭp ‘lơ̆ng hloh păng dôm cham gre păr apŭng plĕnh teh kơ Việt Nam, iŏk đei kon jên hơiă. Ƀok Lê Đình Tư hơmĕng:

“Bơ̆n đei lơ tơdrong ‘lơ̆ng vă hơtŏk tơiung Robusta kơ Đắk Lắk pơma hơdrô̆ păng Việt Nam pơma atŭm. Lơ̆m dôm sơnăm âu ki, ‘noh Aeroco hlôi đei dôm tơmam hơpăh apŭng plĕnh teh, iŏk đei dôm jơnei tôch kơ ‘lơ̆ng hơiă. Sơnăm ‘nâu kŭm athei hơdrin lơ hloh dơ̆ng, ăn bôl buăl lơ̆m teh đak păng teh đak đe băt truh lơ hloh păng gô pơm marketing ‘lơ̆ng lơ hloh dơ̆ng.”

Vang hơdai đon lui lơ̆m sơnăm ‘nao, lơ bơngai mơdro sa sơnăm mơlôh kŭm tŏk bŏk chih tơƀôh tơ̆ hla kak cheh phe ‘lơ̆ng apŭng plĕnh teh. Yă Dương Nữ Thiên An, Kơdră vei lăng Kŏng ti tĕch mơdro pơvih pơvăn pơm tơlĕch răt tơmơ̆t đơ̆ng teh đak đe Si Cafe vang tơroi, sơnăm 2026 đei lăng ‘noh jĭ tơlĕch jang tôch kơ hiôk iŏk đơ̆ng blŭng sơnăm, anih tĕch mơdro Nhật Bản hlôi chu răt tơmơ̆t tơmam cheh phe 100% Robusta găr hơdrĕng yua đơ̆ng kŏng ti pơm tơlĕch, côngtenơ chơ tơmam mă blŭng đei tĕch tơlĕch lơ̆m blŭng khei 1/2026 păng hơmet ăn vă tĕch tơlĕch côngtenơ tơmam mă 2:

“Lơ̆m sơnăm ‘nâu, nhôn akŏm pơđĭ tơmam ăn anih tĕch mơdro Nhật Bản, đơ̆ng rơih iŏk tơmam, hơtŏk tơiung tơmam truh pơm bơ̆n tơpu tăh, vă sơđơ̆ng păng pơih să anih tĕch mơdro 1 trong kơjăp ‘lơ̆ng”.

Ưh khan lăp akŏm lơ̆m tơdrong jang tĕch mơdro, anih mơdro sa cheh phe ‘lơ̆ng oei kơchăng tơgoăt hơdai, chông ba păng pơjing hơnih rơgoh ăn tơmam. Ƀok Hoàng Danh Hữu, bơngai pơcheh đei hơnăn Miss Êđê - anih mơdro sa hlôi tĕch cheh phe tơ̆ Mi, Hàn Quốc, Singapore păng Nga – akhan, tơdrong hlôh băt anih tĕch mơdro gĭt kăl păng ‘meh vă đơ̆ng dôm bơngai joăt jang apŭng plĕh teh ‘noh jĭ tơkhoă gĭt kăl vă cheh phe ‘lơ̆ng Việt Nam năm hơtăih hloh. Lơ̆m sơnăm 2026, anih mơdro sa gô hơnơ̆ng ‘moi kiơ̆ dôm tơdrong jang tơbôl tĕch mơdro vă tơgŭm dôm bơngai jang cheh phe ‘lơ̆ng gơh băt hrĕnh hloh hăm anih tĕch mơdro gĭt kăl kơ Hàn Quốc:

“Mưh hlôh đei dôm anih mơdro sa kăl yă kiơ, nhôn gô tơroi dôm tơdrong ‘meh vă, tơdrong hơgăt ‘lơ̆ng ‘noh truh dôm bơngai pơm tơlĕch, grŭp jang păng mơdro sa lơ̆m teh đak, vă vang hơdai băl pơm đei 1 trong jang hơdai, 1 hơnih jang ‘lơ̆ng, tơgŭm dôm bơngai jang pơgar ưh pă năm mĭnh drô̆ păng ưh pă đei tơdrong lăp năm pơlong mă ưh kơ đei anih tĕch".

Tơgop gĭt kăl lơ̆m tơdrong jang tơƀôh hơdăh kơjăp cheh phe Robusta ‘lơ̆ng, ‘noh jĭ hơnăp jang chông ba đơ̆ng dôm anih tĕch mơdro tĕch tơ̆ teh đak đe tih. Tơ̆ Đắk Lắk, Kŏng ti tĕch tơlĕch tơ̆ teh đak đe 2-9 Đắk Lắk (Simexco Đắk Lắk), hlôi jang hơdrol pơjing trong jang tĕch mơdro sa kơjăp, vei lăng ‘lơ̆ng, tơchă băt anih pơm tơlĕch, tơgoăt hơdai păng vang yak hơdai đunh đai kŭm hăm tơdrong jang cheh phe ‘lơ̆ng. Ƀok Nguyễn Tiến Dũng, Phŏ Kơdră dơnơm vei lăng kŏng ti Simexco Đắk Lắk tơbăt, anih mơdro sa hlôi tơgŭm dôm hơp tak xăh, ŭnh hnam jang mir pơgar păng vei lăng tơgŭm dôm hơnih pơchơt ‘lơ̆ng apŭng plĕnh teh hăm ‘meh vă tơgop tơplih tơdrong ‘lơ̆ng jing kơjă tĕch mơdro tơpă:

“Nhôn tŏk bŏk hơdai hăm 50.000 ŭnh hnam kon pơlei jang chŭn mir Tây Nguyên vă pơm tơlĕch cheh phe ‘lơ̆ng kơjăp. Yua kơ ‘meh pơm tơlĕch đei cheh phe ‘lơ̆ng ‘noh athei đei hơnih ‘lơ̆ng, pơtih gia nhen kơmăy sơ̆k ne, kơmăy kơmŏk kăl vă pơm tơlĕch đei cheh phe ‘lơ̆ng kŭm nhen pơm tơlĕch cheh phe ‘lơ̆ng hloh, hơtŏk ‘lơ̆ng kơjă đơ̆ng găr cheh phe ‘noh gô hơnhăk ăn tơplih ‘lơ̆ng tơdrong jang sa ăn kon pơlei jang chŭn mir lơ hloh”.

Hăm đon lui pran kơtang lơ̆m cheh pheh ‘lơ̆ng kơ Đắk Lắk pơma hơdrô̆, Việt Nam pơma atŭm, sơnăm 2026 đei hơmĕng gô jing 1 sơnăm jang tŏk pran đơ̆ng cheh phe Robusta ‘lơ̆ng, ưh khan lăp pơih să anih tĕch tơlĕch tơ̆ teh đak đe mă oei ƀrư̆ ƀrư̆ hơtŏk anih dơ̆ng cheh phe Việt Nam lơ̆m hla kak apŭng plĕnh teh, lơ̆m jơhngơ̆m đon lui ngeh, kơchăng păng ƀĕnh tơdrong hơmĕng ăn jăl trong ‘nao.