Tơ̆ dôm tơring choh jang sa tơm kơ Đắk Lắk, tơdrong jang pơjei băl iŏk jơnei kơkuh chơt hơiă Hop akŏm Đảng ‘măng mă XIV đei tơƀôh hơdăh kiơ̆ rim pơyan, rim tơdrong jang pơm tơlĕch đei yua. ‘Nhŏng Lyby Niê Siêng, kon pơlei jang chŭn mir xăh Krông Búk tơbăt, kon pơlei tôch kơ chhôk ‘nă tơ̆ hơnăp dôm jơnei iŏk đei păng ling lang lăng găh Hop akŏm hăm jơhngơ̆m đon jang tơnăp ‘lơ̆ng:

“Kơkuh chơt hơiă, ling lang pơjei băl đei dôm tơdrong hơgăt pơm liơ vă hơnhăk ăn kon pơlei lơ̆m tơdrong jang kon pơlei choh jang sa Đắk Lắk ling lang đei hơtŏk tơiung ‘lơ̆ng hloh vă tơgop pơjing teh đak roi ‘năr roi pơdrơ̆ng ‘lơ̆ng hloh.”

Jơhngơ̆m đon pơjei băl kơkuh chơt hơiă Hop akŏm XIV kơ Đảng kŭm păr ang pran kơtang lơ̆m dôm anih mơdro sa, mă loi ‘noh jĭ tơdrong jang tĕch tơ̆ teh đak đe tơmam đơ̆ng choh jang sa đei - tơdrong jang tơm mŭk drăm kơ dêh char. Tơ̆ Kŏng ti tĕch tơ̆ teh đak đe 2-9 Đắk Lắk (Simexco Đắk Lắk), hơnăp jang pơm tơlĕch, tĕch mơdro đei tơklep hơdai hăm dôm tơdrong hơgăt pơjei băl hơdăh. Ƀok Nguyễn Tiến Dũng, Phŏ Kơdră vei lăng Kŏng ti roi tơbăt:

“Kơkuh chơt hơiă Hop akŏm Đảng, khei ‘nâu ‘noh nhôn tơlĕch tơdrong hơgăt ‘noh jĭ trong vă jang ‘noh răt 25.000 tấn păng tĕch tơ̆ teh đak đe hloh 20.000 tấn păng đĭ đăng akŏm lơ̆m bơngai jang đơ̆ng đảng viên klĕp truh kang ƀô̆ bơngai jang vă đei bơ̆jang hơdai hơnhăk ăn iŏk yua kŭm nhen hơnhăk ăn jơnei pơm tơlĕch tĕch mơdro ‘lơ̆ng hloh”.

Kŭm hăm anih mơdro sa teh đak, tơring mơdro sa kơdih kŭm tơƀôh hơdăh tơdrong vang yak hơdai păng hơmĕng lơ̆m trong vă jang tih đơ̆ng Đảng. Yă Dương Nữ Thiên An, Kơdră vei lăng Kŏng ti tĕch mơdro pơvih pơvăn pơm tơlĕch tĕch răt tơmơ̆t tơ̆ teh đak đe Si Cafe tơroi:

“Lơ̆m Hop akŏm ‘măng mă XIV, akŏm tôch tih ‘noh jĭ lơ lơ̆m tơdrong pơtrŭt anih jang choh jang sa. Kơna kơdih kâu mơdro sa jang lơ̆m tơdrong jang choh jang sa ‘noh nhôn tôch kơ jang kiơ̆. Lơ̆m pơm tơlĕch, lơ̆m tĕch mơdro, jô̆ hloi tơdrong hơnhăk tơmam roi tơƀôh ăn teh đak đe nhôn kŭm hlôi iŏk đei tơdrong tơgŭm tôch kơ tih đơ̆ng dôm trong jang tơgŭm. Tơ̆ hơnăp kơnh ‘meh vă gô đei tơgŭm lơ hloh đơ̆ng dôm tơdrong jang tơgŭm ‘nao đơ̆ng Teh đak”.

Đơ̆ng yan âu tơ̆ tơring, dôm tơdrong tơplih ‘lơ̆ng lơ̆m hơtŏk tơiung mŭk drăm - tơpôl tơ̆ tơring ‘noh jĭ tơƀôh hơdăh ăn iŏk yua đơ̆ng trong jang đơ̆ng Đảng lơ̆m khei ‘năr âu ki. Ƀôh hơdăh ‘noh jĭ tơ̆ xăh Ea Knuêc, dêh char Đắk Lắk. Sơnăm 2025, xăh jang đang păng yak hloh dôm tơdrong hơgăt hơtŏk tơiung mŭk drăm - tơpôl, jang tŏk đei dang 10%, iŏk yua jô̆ păh lăp kơ̆l bơngai ưh kơ đei pơdơh đei hơtŏk. Jĭ tơring đei lăng ‘noh tơring tơm sầu riêng kơ dêh char Đắk Lắk, Ea Knuếc hlôi pơjing tơring choh jang sa tih, tơklep hăm tơmang lăng choh jang sa păng tĕch tơmam kiơ̆ kơmăy điên tư, pơih să anih tĕch tơ̆ teh đak đe. Yă Nguyễn Thị Cẩm Loan, Phŏ Kơdră Anih jang MTTQ Việt Nam xăh Ea Knuếc, ‘meh vă: 

“Athei pơma hơdăh ‘noh jĭ bơnê kơ Đảng, teh đak hlôi đei dôm trong jang tơgŭm păng đei trong tơƀôh jang vă kon pơlei nhôn tơ̆ kơsô̆ hơrih jô̆ păh lăp păi dang ei jing dôm bơngai pơdrŏng tên grên... mă loi ‘noh jĭ hơtŏk ‘lơ̆ng kơjă kăp gĭt jơhngơ̆m đon, tơmam drăm ăn kon pơlei jang chŭn mir, tơdrong vei lăng sơđơ̆ng tơdrong hơrih sa tơpôl, hơtŏk ‘lơ̆ng anih jang pơgang, tho pơhrăm păng đei tơdrong vang drơ̆ng lăp ‘lơ̆ng”.

Hăm jơhngơ̆m đon pơjei băl chơt hơiă, tơdrong drơ̆ng lăp đơ̆ng kon pơlei jang chŭn mir, anih mơdro sa păng khŭl jang chĭnh trĭ, Đắk Lắk tŏk bŏk lăng găh Hop akŏm XIV kơ Đảng hăm dôm tơdrong jang hơdăh ‘lơ̆ng, lui ngeh lơ̆m dôm tơdrong jang ‘nao gô hơnơ̆ng pơm tơdrong ‘lơ̆ng ăn choh jang sa, kon pơlei jang chŭn mir păng tơring tơrang hơtŏk tơiung kơjăp.