VOV4.Bahnar -  Vă tơlĕch jang kiơ̆ roim Tơdrong tơchơ̆t, tơdrong jang, tơdrong vă jang atŏk tơ iung chŏh jang sa dêh char Dak Lăk. Adoi, sơkơ̆t hơdăh nơ̆r pơkăp đơ̆ng dêh char lơ̆m tơdrong tơgŭm djru rim hơnih mơdro sa, bơngai tơmơ̆t jên jang năm tơmơ̆t jên jang, pơm tơlĕch tơmam drăm chŏh jang sa. Năr dơning, năr 29/4, Dak Lăk gô pơgơ̆r “Hop akŏm pơtrŭt tơmơ̆t jên jang lơ̆m chŏh jang sa dêh char Dak Lăk sơnăm 2022”. Vă băt hơdăh hlŏh dơ̆ng găh tơdrong đei, rim trong jang tơgŭm ăn pơtrŭt, tơgŭm djru tơmơ̆t jên jang, Hương Lý, Bơngai chĭh kơtơ̆ng ang ăn Radiô NPMVN oei tơ̆ Tây Nguyên đei apĭnh jet ƀok Nguyễn Đình Trung, Kơdră jang lơ̆m Trung ương Đảng, Bí thư Đảng dêh char Dak Lăk găh tơdrong au, hơvơn kơ mih ma păng bôl boăl vang mơ̆ng.

Bí thư Đảng dêh char Dak Lăk (ao jơk oei dơ̆ng tŏk bŏk) năm lăng chŭn mir pơtăm pro preng ‘long Nova jang kiơ̆ kmăi kmŏk hơgei tơ̆ apŭng Cư Mgar

- Ƀok Nguyễn Đình Trung ăi, Dak Lăk đei lăng jing tơring tơm hlŏh găh chŏh jang sa kơ Tây Nguyên adoi nhen lơ̆m tĕh đak, khei năr au ki Dak lăk hlôi jang tơdrong yă kiơ vă chŏh jang sa tơgăl hăm dôm tơdrong đei ‘nŏh?

Ƀok Nguyễn Đình Trung: Hăm dêh char lơ̆m rim jăl au ki hơnơ̆ng lăng chŏh jang sa, kon pơlei, tơring chŏh jang sa jing tơdrong mă dêh char hơnơ̆ng  lăng ba kơ jăp. Lơ̆m dôm sơnăm au ki, mŭk drăm chŏh jang sa hơnơ̆ng tơmơ̆t 40% lơ̆m tơdrong jang atŏk tơ iung mŭk drăm kơ dêh char. Lơ̆m dôm sơnăm au ki tơ̆ dêh char jei ƀô̆h lơ trong jang sa hơ iă, đei lơ bơngai tơmơ̆t jên jang lơ̆m chŏh jang sa iŏk yua kmăi kmŏk hơgei păng hlôi đei lơ tơmam drăm găh au chă tĕch mơdro lơ̆m tĕh đak păng tơ̆ tĕh đak đe bơih. Hơnô̆ hơnăp kơnh, tơdrong chŏh jang sa oei jing tơdrong kăl hlŏh mă dêh char lăng trŭh atŏk tơ iung kơ jăp ‘lơ̆ng tơklep hăm atŏk tơ iung mŭk drăm kơ dêh char adoi nhen atŏk kơtang erĭh sa sơđơ̆ng ăn kon pơlei.

Bí thư Đảng dêh char Dak Lăk chă mơ̆ng nơ̆r apĭnh đơ̆ng hơnĭh mơdro sa tơmơ̆t jên jang lơ̆m chŏh jang sa rơgŏh ‘lơ̆ng

- Mư̆h lei lơ̆m khei năr kơnh, Khŭl kơdră chĕp pơgơ̆r Đảng dêh char hơnơ̆ng pơrô̆, pơchŏh trong lơ liơ hăm tơdrong chŏh jang sa au hŏ ƀok?

 Ƀok Nguyễn Đình Trung: Khei năr kơnh, Tơdrong tơchơ̆t pơm lêh hop akŏm mă 17 kơ dêh char păng rim tơdrong tơchơ̆t jei hlôi tơlĕch ăn: lơ̆m tơdrong tơlĕch jang hơdrol hlŏh ‘nŏh găh tơdrong chŏh jang sa. Mă kăl ‘nŏh chŏh jang sa hăm kmăi kmŏk hơgei vă atŏk kơtang, iung jang tơgăl hăm tơdrong đei lơ̆m chŏh jang sa kơ Dak Lăk, tơgop gĭt kăl lơ̆m atŏk tơ iung mŭk drăm kơ dêh char, adoi nhen atŏk kơtang erĭh sa sơđơ̆ng dơ̆ng kơ jăp ăn kon pơlei. Dak Lăk pơjing rơvơn vă rim bơngai tơmơ̆t jên jang năm trŭh tơ̆ Dak Lăk vang iung jang, vang yak hơdoi hăm dêh char, atŭm hăm kon pơlei lơ̆m dêh char atŏk tơ iung mŭk drăm.

- Nhen ih ‘nao tơroi, Dak Lăk hlôi pơjing rơvơn vă rim bơngai tơmơ̆t jên jang năm trŭh hăm Dak Lăk, mư̆h lei, mă hơdăh ‘nŏh yă kiơ hŏ ƀok? Mă kăl mư̆h bơngai tơmơ̆t jên jang oei drơ̆ng drơ̆t hăm rim tơdrong đei ƀơm trŭh groi tĕh ‘nŏh ?

Ƀok Nguyễn Đình Trung: Dêh char tŏk bŏk iung jang pơ prŏ lơ̆m dêh char adoi nhen pơ prŏ găh trong jang iŏk yua tĕh, rim tơring tĕh jang sa. Mă blŭng hơnăp jang kơ tĕh đak ‘nŏh kăl jang ‘lơ̆ng bơ̆ jang pơ prŏ ‘lơ̆ng, ƀlep hăm yan au vă mư̆h bơngai tơmơ̆t jên jang năm trŭh tơ̆ dêh char vă chă lăng hơlen, dăr lăng păng tơmơ̆t tơmơ̆t jên jang. Mă 2, tơgoăt jang hơdoi ƀar păh rim khŭl lơ̆m chŏh jang sa pơm tơlĕch, ‘nau jei jing hơnăp jang kơ dêh char, dêh char gô dơ̆ng pang tang măt iung jang kiơ̆ tơgoăt dĭh băl ƀar păh rim khŭl lơ̆m chŏh jang sa hăm kmăi kmŏk hơgei. Tơdrong mă 3 tĕch mơdro tơmam drăm adoi tơ klep hăm hơnĭh jang kmăi kmŏk pơm tơlĕch păng dôm tơdrong găh trong nơnăm, hơnĭh jang, pơnơ̆t đak păng dôm tơdrong anai vă tơgŭm ăn rim tơdrong vă chŏh jang sa hăm kmăi kơmŏk hơgei.

- Lei a, bơnê kơ ih ƀok hơ!

Bơngai chĭh: Hương Lý

Tơblơ̆ nơ̆r: Amazưt