Lơ̆m dêh char Dak Lăk đei vă jê̆ 41.000ha sâu riêng, lơ̆m ou 26.600ha tŏk bŏk đei plei, să hloh 4.000ha pơtêng hăm sơnăm 2024. Plei sâu riêng iŏk đei dang 392.000 tân, lơ hloh dang 30.000 tân. Dak Lăk hrei ou đei 269 mã tơring pơtăm đei ƀơk ăn hăm hloh 7.400 ha, đei plei dang 220.000 tân. Lơ̆m dêh char jei đei hloh 250 hơnih răt iŏk-pơm tơlĕch, 11 hơnih pơm pơkrot păng 40 hơnih tăh ‘nŭng sâu riêng hlôi đei ƀơk ăn mã kơsô̆ tĕch mơdro tơ̆ teh đak đe. Kiơ̆ đơ̆ng ƀok Nguyễn Minh Huấn, Kơdră chĕp pơgơ̆r Hơnih vei lăng Choh jang sa păng Cham char dêh char Dak Lăk, vă vei lăng kơhret tơdrong ‘lơ̆ng đơ̆ng tơm hloi, dêh char Dak Lăk hlôi pơjao ăn vei lăng tơring pơtăm, hơnih tăh ‘nŭng păng tơdrong jang mơdro sa sâu riêng ăn khul kơdră tơring.