Tơ̆ Gia Lai, dôm anih ƀơm pơrang đei ƀôh dang ei tơ̆ 29 unh hnam rong kon tơrong lơ̆m 24 thôn, pơlei lơ̆m 14 xah. Pơtêng hăm giĕng hơdrol ki, kơsô̆ xah đei nhŭng ƀơm jĭ tŏk 6 tơring, lơ̆m noh 5 xah lơ̆m tơring gah Pơmơ̆t Gia Lai păng 1 xah tơ̆ tơring Hlĕch Gia Lai 'noh: Ia Tul, Ia Krái, Ia Grai, Chư Sê, Ia Krêl, Tuy Phước. Vă hơlen tang găn pơrang jĭ, lơ̆m hloh 1 khei kơ ou, 4 anih jang hơlen pơrang jĭ tơ̆ dôm jăl trong dơnơm kơ dêh char Gia Lai hlôi hơlen jê̆ 900 tong gre vih vơ̆t chơ kon tơrong, pruih pơgang brai pơnhŭl lơ̆m gre mơ̆t lĕch đơ̆ng dêh char.

Anih Choh jang xa păng Cham char dêh char Gia Lai pơtoi pơgơ̆r rim tơring hơlen kơjăp pơrang jĭ, iŏk hơlen pham vă băt đei pơrang păng sek tơlang mă tơnăp mưh băt đei anih 'nao ƀơm pơrang jĭ, atŭm hăm noh tơroi tơbăt ăn kon pơlei dah tơroi hơdah păng pơm kiơ̆ tơnăp dôm tơchơ̆t tang găn păng tơjră hăm pơrang jĭ.