VOV4.Bahnar - Hăm hlŏh 80.000 ha ƀum nhak, đei ƀum hlŏh 1,6 triu tân 1 sơ năm, hrei ‘nâu Gia Lai jĭ dêh char pơ tăm ƀum nhak lơ hlŏh lơ̆m tĕh đak. Mă lei, iŏk yoa đơ̆ng kon pơ lei pơ tăm ƀum lăp tŏ sĕt đĕch, athei đei trong tơ plih đơ̆ng pơ tăm truh pơm tơ lĕch tơ mam vă iŏk yoa ‘lơ̆ng dôm tơ drong đei tơ̆ tơ ring pơ tăm ƀum păng pơm hơ tŏk iŏk yoa ăn kon pơ lei.

Unh hnam mŏ Rơ Com H’Duyệt tơ̆ xăh Chư Ngọc, apŭng Krông Pa, dêh char Gia Lai đei 1 ha ƀum nhak. Sơ năm sơ̆, gơ nơm đei ƀum lơ, kơ jă sơ đơ̆ng, kơ na pơ huach tôm jên jang, mŏ oei iŏk đei 30 triu hlak jên. Sơ năm ‘nâu, jĭ tơ vĕnh hla pơm ăn pơ gar ƀum ưh đei ƀum lơ, mŏ lăp iŏk đei 1 puăt pơ têng hăm sơ năm sơ̆ đĕch: “Sơ năm sơ̆ đei ƀum lơ, kơ jă tĕch sơ đơ̆ng. Sơ năm ‘nâu, ƀum ưh đei ƀum lơ, kơ na ưh đei iŏk yoa dôm yơ. Kăl đei tĕh đak hơ nhăk ăn hơ drĕch ƀum ‘nao vă đei ƀum lơ ƀiơ̆”.

Hrei ‘nâu, tơ̆ dêh char Gia Lai đei hlŏh 80.000 ha ƀum nhak, đei pơ tăm lơ tơ̆ dôm apŭng Krông Pa, Ayun Pa păng Ia Pa. Mă lei, bŭm ƀum lăp iŏk đei dang 20 tân 1 ha, đơ̆ng rŏng trư tôm jên jang, 1 ha ƀum 1 sơ năm lăp hơ nhăk iŏk yoa đơ̆ng 20 - 30 triu đĕch. Ƀok Nguyễn Như Cường- Kơ dră Anih vei lăng rei pơ tăm, Anih tơm vei lăng choh jang xa păng atŏk tơ iung tơ ring tơ rang tơ tă ăn kon pơ lei athei pơ tăm hăm hơ drĕch ƀum kĕ tơ jră hăm pơ rang jĭ, đei ƀum lơ: “Bơ̆m kăl đei hơ drĕch ‘nao ‘lơ̆ng, jang kiơ̆ mă trŏ trong jang, săy phŏng, tuh mơ̆r, tơ ruih đak, pơm thoi yơ vă đei ƀum lơ, kơ jă tĕch măk. Mĭnh tơ drong dơ̆ng ‘nŏh jĭ hnam kơ măy ot ƀum athei jang hơ doi păng đei hơ năp jang ‘lơ̆ng vă hơ tŏk tơ ring pơ tăm, tơ gŭm ăn kon pơ lei pơ jing dôm HTX pơ trŭt choh jang, tơ plih ki thuơ̆t jang ‘nao”.

Kon pơ lei jang chŭn mir tơ̆ apŭng Krông Pa, Gia Lai rô̆ chơ ƀum

Ƀok Lưu Trung Nghĩa- Kơ dră Anih vei lăng chŏh jang xa păng  atŏk tơ iung tơ ring tơ rang dêh char Gia Lai akhan, kăl hơ tŏk kơ loăi ‘long ‘nâu kiơ̆ trong jang kơ jăp đunh kiơ̆ trong jang hơ doi đơ̆ng pơ tăm truh ot tĕch. Jơ̆p lơ̆m dêh char đei 5 tŏ hnam kơ măy ot ƀôt ƀum, mă lei tam mă đei hnam kơ măy yơ pơm hla ar pơ kăp răt iŏk pơ đĭ ƀum đơ̆ng kon pơ lei jang đei. Tơ drong ‘nâu pơm ăn bơ ngai pơ tăm ƀum ưh gơ̆h kơ chăng vă jang xa. Găh nŏh, kơ măy ot đơ̆ng dôm hnam kơ măy hrei ‘nâu đei kơ sư̆k lăp ai đĕch, tơ mam tĕch tơ̆ tĕh đak đe tam mă lơ, kơ sư̆k pơ jei tam mă pran. Truh âu kơnh anih chŏh jang xa dêh char Gia Lai vă jang hơ doi hăm Khul jang ƀum Việt Nam vă sek tơ lang dôm tơ drong ‘nâu: “Khei ‘năr âu ki, ƀât kon pơ lei pơ tăm đei ƀum thoi nŏh, anih tĕch mơ dro truh răt đĕch, ưh đei pơm hla ar pơ kăp răt iŏk đơ̆ng blŭng pơ yan. Kơ na hơ pơi ‘mĕh đei hnam kơ măy ot ƀum vang jang hơ doi. Nhôn vă adrin jang hăm Khul jang ƀum Việt Nam krao hơ vơn, sơng đe sư vang jang tơ drong ‘nâu. Hăm tơ ring pơ tăm truh 80.000 ha âu, tơ dăh bơ̆n jang ‘lơ̆ng tơ drong ‘nâu ‘nŏh gơ̆h krao hơ vơn đơ̆ng 3 - 4 tŏ hnam kơ măy đei kơ măy kơ mŏk ‘lơ̆ng, đei jên jang xa kơ jăp truh jang, pơ jing tơ ring pơ tăm ƀum kơ jăp ‘lơ̆ng”.

Gơ nơm đei ot păng tĕch tơ̆ tĕh đak đe, hrei ‘nâu ƀum nhak păng dôm tơ mam đơ̆ng ƀum nhak đei lơ tơ drong ‘lơ̆ng vă hơ tŏk kơ jă. Yoa thoi nŏh, vă tơ gop pơm hơ tŏk iŏk yoa ăn kon pơ lei pơ tăm, atŭm hăm ‘nŏh tơ iung jơ hngâm pran đơ̆ng tơ ring pơ tăm ƀum xă hlŏh lơ̆m tĕh đak, Gia Lai athei đei trong jang tơ plih ming mă lăp, atŏk tơ iung ƀum nhak kiơ̆ trong jang kơ jăp đunh, đei yoa ƀiơ̆.

Nguyễn Thảo: Chih

Dơ̆ng: Tơ blơ̆