VOV4.Bahnar - Kơ sơ̆ ‘năr 22/5, Anih vei lăng găh choh jang sa păng hơ tŏk tơ iung tơ ring tơ rang dêh char Gia Lai pơ gơ̆r lêh pơ jao hla ar drơ̆ng ăn tơ mam OCOP ăn dôm tơ mam ‘lơ̆ng kơ dôm xăh lơ̆m dêh char. Sơ năm 2021 dêh char Gia Lai hơ nơ̆ng hơ tŏk tơ iung đei 67 tơ mam ‘lơ̆ng đei drơ̆ng hơ len lăng ‘lơ̆ng păng asong hla ar drơ̆ng ăn tơ mam OCOP. Lơ̆m noh đei 3 tơ mam đei kơ loăi 4 hơ nglŏng păng 64 tơ mam đei kơ loăi 3 hơ nglŏng.

Pơ jao hla ar drơ̆ng ăn OCOP sơ năm 2021

Tơ mam drơ̆ng ăn đei dôm kơ loăi hơ nglŏng đei Anih vei lăng kon pơ lei dêh char asong Hla ar drơ̆ng ăn, đei yua hơ năn pơ klep drơ̆ng ăn “OCOP Gia Lai” păng kơ loăi hơ nglŏng in tơ̆ tơ pu tơ mam kiơ̆ tơ drong hơ găt. Pơ tôch drơ̆ng ăn đei gơh yua lơ̆m 3 sơ năm jô̆ đơ̆ng năr kĭ tơ chơ̆t drơ̆ng ăn. Thoi noh, đơ̆ng rŏng 3 sơ năm bơ̆ jang kiơ̆ Tơ drong jang OCOP, Gia Lai hlôi đei 25 tơ mam đei 4 hơ nglŏng păng 189 tơ mam đei 3 hơ nglŏng.

Thuem: Tơ blơ̆