VOV4.Bahnar - Hrei au, hlŏh 95% đak sut kơdrot kơ Việt Nam tŏk bŏk tĕch mơdro tơ̆ tĕh đak Mi, lơ̆m au, dêh char Dak Lăk tơmơ̆t mĭnh poăt, hơtŏ hăm hlŏh 20.000 tân lơ̆m 1 sơnăm. Trŭh au kơnh, tơdăh Mi pơlăp kiơ̆ thuê̆ tang găn tĕch phă kơ jă tŏk trŭh 412%, đak sut kơdrot Việt Nam gô pă đei rơvơn vă tĕch mơdro ăn tơ̆ tĕh đak au. Pơ đĭ bơngai rong sut kơdrot hăm hơnĭh tĕch mơdro tơ̆ tĕh đak đe jei gô tơ ƀơ̆p tơnap tap mư̆h tim mă tơchă đei hơnĭh răt iŏk hle.

Hăm tơdrong hơ iă găh tŏ ‘mi kial, groi tĕh, lơ kơ loăi ‘long pơkao sut kơdrot gơ̆h trep đak pơkao vă pơjing đei đak sut kơdrot

Hloh 30 sơnăm jang rong sut kơdrot iŏk đak, ŭnh hnam ƀok Đinh Quang Khang oei tơ̆ phương Tân Lập, pơlei tơm Buôn Ma Thuột hrei au tŏk bŏk rong đei vă jê̆ 6.000 tơpu sut kơdrot. Ƀok tơroi tơbăt, rim sơnăm đak sut kơdrot ŭnh hnam ƀok đei dôm yơ ‘nŏh tĕch mơdro hlot pơ đĭ dôm nŏh hăm kơ jăl 40.000 hla jên lơ̆m 1 kĭ. Hăm kơ jă au bơngai rong sut kơdrot iŏk đei lơ hlŏh ƀar ‘măng tơmơ̆t kon jên jang ‘măng mă blŭng. Mă lei đơ̆ng khei 11/2021 Dơnŏ anĭh tơm vei lăng Mơdro sa Mi (DOC) tơbăt hơdăh jang kiơ̆ thuê̆ tang găn tĕch phă kơ jă hlŏh 412%, pơm ăn rim kŏng ty tĕch mơdro đak sut kơdrot tơ̆ tĕh đak đe răt iŏk đơ̆ng bơngai rong tôch tŏ sĕt:“ Trŭh au kơnh kơ jă 15.000 hlak jên mư̆h rim kŏng ty jei pă đei ‘mĕh răt iŏk. Rŏ tĕch hlot tơ̆ tĕh đak đe nei kơna răt, ăp kŏng ty tĕch hlot ‘noh kơna đe hăp mă răt. Păng dang ei hlôi tơmơ̆t jên rong bơih jei ư̆h kơ gơ̆h vă pơdơ̆h ôh. Bơ̆n tơmơ̆t jên jang rong sut kơdrot trŭh khei ‘năr iŏk đei đak ‘nŏh tơhoach trŭh 1 trĭu hlak jên lơ̆m 1 tơpô. Dang ei trŭh pơyan iŏk đak ‘nŏh ba jei iŏk đĕch bơih, tơdăh tĕch ư̆h kơ hlot jei hơdrin iŏk răk đak đĕch bơih”

        Atŭm hăm bơngai rong sut kơdrot, rim hơnĭh tĕch mơdro tơmam drăm tơ̆ tĕh đak đe jei tŏk bŏk mơ hoal tơchă hơnĭh răt iŏk đak sut kơdrot. Ƀok Lê Thanh Vân, Kơdră chĕp pơgơ̆r Kŏng ty sut kơdrot Dak Lăk tơbăt: hăm tơdrong hơ iă găh tŏ ‘mi kial, groi tĕh, lơ kơ loăi ‘long pơkao sut kơdrot gơ̆h trep đak pơkao vă pơjing đei đak sut kơdrot. Mă kăl, hăm tơdrong đĭ joăt rong sut kơdrot đunh sơnăm ‘nŏh đak sut kơdrot Dak Lăk đei ‘lơ̆ng păng iŏk đei lơ. Tơdrong pơlăp thuê̆ ‘moi kiơ̆ kơ jă đak sut kơdrot lei lăi hăm Ấn Độ ‘nŏh gô pơm ư̆h gan iŏk đei kơ jăp, đei ƀơm kơtă trŭh tơdrong jang rong sut kơdrot tơ̆ Dak Lăk. Ƀok Lê Thanh Vân tơbăt:“Dak Lăk đei rơvơn găh pơkao lơ păng pơjing đei lơ đak sut kơdrot. Mă ƀar, tơdrong jang rong sut kơdrut hlôi đei đơ̆nh đunh hlŏh 50 sơnăm kơ au. Mă 3, rim hơnĭh mơdro sa tĭh găh răt iŏk tĕch mơdro tơ̆ tĕh đak đe đak sut kơdrot jei akŏm tơ̆ Dak Lăk. Đĭ đăng dôm tơdrong đei tôm lơ lau ‘nŏh jing bơ̆n đei đak sut kơdrot lơ hlŏh. Kơna mư̆h pơlăp thuê̆ lơ lơ lau ‘nŏh hơdrô̆ Dak Lăk jei hiong răm kơtang hlŏh”.  

Bơngai rong sut kơdrut Dak Lăk yak lơ̆m pơyan iŏk đak sut kơdrot pơkao chehphe

Rim sơnăm đak sut kơdrot Dak Lăk iok đei trŭh 28.000 tân. ‘Nau jing dêh char đei 50% đak sut kơdrot lơ̆m tĕh đak tĕch mơdro ăn tĕh đak đe. Tơdăh Mi pơlăp thuê̆ tang găn tĕch phă kơ jă trŭh 412% hăm đak sut kơdrot tĕch mơdro tơ̆ tĕh đak đe kơ Việt Nam, gô pơm kơnê̆ trŭh tơdrong jang sa iŏk đei kơ bơngai rong, hơnĭh mơdro păng mĭnh păh tơdrong thuê̆ ăn hơnĭh mong jên bơ̆ jang Dak Lăk dơ̆ng. Hrei au dêh char Dak Lăk hlôi chĭh pơtrŭh hla bơar tơroi tơbăt păng apĭnh athei Thủ tướng tĕh đak pơrô̆ athei rim hơnĭh tơm, hơnĭh jang hrôih đei trong jang tơgŭm djru tơnap tap ăn hơnĭh jang rong sut kơdrot. Adoi, ƀar hơnĭh mơdro sa lơ̆m tơdrong dăr lăng kơ DOC ‘nŏh Kŏng ty đak sut kơdrot Dak Lăk hăm Kong ty đak sut kơdrot Ban Mê Thuột hlôi iung bơ̆ jang, pơtrŭh tơbăt rim kơtơ̆ng ang ăn rim kŏng ty khôi luơt tơ̆ tĕh đak Mi vă tơlĕch nơ̆r ƀơ̆r pơma athei hŭt tơdrong tơchơ̆t đơ̆ng DOC hăm tơdrong pơkăp thuê̆ tang găn tĕch phă kơ jă đak sut kơdrot kơ Việt Nam.

        Găh đunh đai, hơnĭh jang đak sut kơdrot Việt Nam kăl đei trong jang kơ jăp ‘lơ̆ng: atŏk kơtang tơdrong ‘lơ̆ng, pơjing đei lơ tơmam drăm, tơchă đei lơ hơnĭh tĕch mơdro đak sut kơdrot tơ̆ tĕh đak đe vă dă ƀiơ̆ đei tơdrong hiong răm. Lơ̆m ‘măng apĭnh hơlen Kơdră chĕp pơgơ̆r Dơnŏ anĭh tơm vei lăng Mơdro sa tơ̆ hop akŏm mă 9 Dơnŏ anĭh bơ̆ jang Kuô̆k hô̆i ‘nao au, yă Lê Thị Thanh Xuân, Kơ iĕng kơdră Khŭl kơdră tang măt Kuô̆k hô̆i dêh char Dak Lăk apĭnh athei.“Đei ƀơm trŭh tĕch mơdro đak sut kơdrot tơ̆ tĕh đak đe, nhôn jei ‘mĕh vă Dơnŏ anĭh tơm vei lăng Mơdro sa đei trong jang hơdăh hlŏh dơ̆ng lơ̆m tơdrong tơchă hơnĭh răt iŏk ‘nao tơplĭh ăn bơ̆n lăp tơplĭh trong chă rong vă trŏ ƀlep ‘lơ̆ng tơdrong pơkăp tĕch mơdro tơ̆ tĕh đak Mi”.

        Tơdrong Mi vă pơlăp jang kiơ̆ thuê̆ tang găn phă kơ jă hăm hơnĭh jang rong sut kơdrot hlôi đei ƀơm kơnê̆ kơtă trŭh hơnĭh mơdro sa păng tơdrong jang sa kơ bơngai rong sut kơdrot. ‘Nau jei nơ̆r tơbăt ăn vă hơnĭh jang rong sut kơdrot Việt Nam pơma atŭm păng hơnĭh rong sut kơdrot Dak Lăk pơma hơdrô̆ kăl lăng hơlen dơ̆ng vă đei trong jang trŏ ƀlep lơ̆m tơdrong tĕch mơdro hiôk hian lơ̆m plei tĕh hrei au.

Bơngai chĭh: Hương Lý

Tơblơ̆ nơ̆r: Amazưt