VOV4.Bahnar - Vă pơ jing trong jang tơ gŭm anih jang mơ dro sa yak hloh mơ mat tat, pơ trŭt pơm tơ lĕch tĕch mơ dro, hơ tŏk tơ iung mŭk drăm - tơ pôl lơ̆m tơ drong ‘nao, kơ sơ̆ ‘năr 25/3, Anih tơ chĕng hơ len hơ tŏk tơ iung kơ dih ( găh Khŭl kơ dră teh đak) jang hơ dai hăm Khul jang tơ̆r ‘long păng tơ mam tơ̆r ‘long Việt Nam păng dôm khŭl jang tơ̆r ‘long tơ ring pơ gơ̆r hop akŏm tơ gop nơ̆r ăn  hla ar tơ roi tơ băt ‘ Anih jang tơ̆r ‘long Việt Nam: tơ drong păng trong jang vei sơ đơ̆ng vă jang truh 2030”. 10 sơ năm âu ki, anih jang tơ̆r ‘long jang tŏk tôch kơ ‘lơ̆ng hăm 2 kơ sô̆. Sơ năm 2021, mă đơ̆ng đei ƀơm ưh kơ ‘lơ̆ng đơ̆ng jĭ COVID-19, anih jang pơm tơ lĕch tơ̆r ‘long păng dôm tơ mam tơ̆r ‘long tĕch tơ̆ teh đak đe lơ̆m teh đak đei hloh 15 ti 800 triệu USD, tŏk 20% pơ têng hăm sơ năm hơ drol. Mă lei, vă iŏk đei tơ drong hơ găt tĕch tơ̆ teh đak đe 25 ti USD lơ̆m sơ năm 2030, kăl kơ đei trong jang tơ gŭm vă pơm tơ drong hiôk ăn anih jang tơ̆r ‘long hơ tŏk tơ iung hloh dơ̆ng lơ̆m tơ drong ‘nao. Tơ̆ hop akŏm, bơ ngai tang măt apĭnh teh đak kăl kơ tơ gŭm găh jên vă anih jang mơ dro sa tơ mơ̆t jên jang tơ plih kơ măy kơ mŏk pơm tơ lĕch, pơ tho bơ ngai jang păng tơ mam bri pơ tăm lơ̆m teh đak.

Thuem: Tơ blơ̆