VOV4.Bahnar - Dôm sơnăm kơ au, lơ ŭnh hnam kon pơlei KơTu oei tơ̆ tơring groi kông Hoà Bắc, apŭng Hoà Vang, pơlei tơm Đà Nẵng tơmơ̆t jên pơtăm ‘long bri, hơnhăk đei iŏk yua kơ jăp, tơgŭm ăn kon pơlei yak hlŏh dơnŭh, pơm sơđơ̆ng erĭh sa. Mă lei, găh lơ kon pơlei pơtăm ‘long keo tơdrong hơmơt tĕh rang rar ‘nŏh jĭ kơtang. Tơ jê̆ au, Dơnŏ anĭh vei lăng kon pơlei kơ pơlei tơm Đà Nẵng pơjing tơdrong bơ̆ jang tơgŭm djru, pơtrŭt kon pơlei pơtăm ‘long bri gô hơnhăk đei iŏk yua kơ jăp, tơgŭm ăn kon pơlei mĭnh păh jang sa iŏk yua kơ jăp, mĭnh păh tơgop vei lăng cham char bri brăh dơ̆ng.

Pơyan kŏh tĕch bri ‘nao au, ŭnh hnam mŏ Toả iŏk đei 350 trĭu hlak jên

Sơ̆, mŏ Hồ Thị Thanh Toả, oei tơ̆ pơlei Tà Lang, tơring Hoà Bắc, apŭng Hoà Vang iŏk hơgăt teh đơ̆ng Tĕh đak pơjao ăn vă pơtăm 5ha ‘long bri. Gơnơm pơm kiơ̆ kih thuơ̆t lơ̆m pơtăm, vei lăng kơna bri ‘long keo bluh vơ̆ jing ‘lơ̆ng. Pơyan kŏh tĕch sơnăm au, ŭnh hnam mŏ Toả gô iŏk đei 350 trĭu hlak jên. Mŏ Toả tơbăt, gơnơm pơtăm bri, kơna ŭnh hnam dang ei erĭh sa sơđơ̆ng ƀiơ̆, đei kon jên pơm hnam, răt gre bơbit, tivi, rim tơmam yua lơ̆m hnam.Hrei au, mŏ Hồ Thị Thanh Toả oei chă pơrô̆, pơtho kon pơlei lơ̆m tơring kon pơlei bơngai KơTu atŏk tơ iung jang pơtăm bri ‘long.“Kon pơlei bơngai KơTu tôch mơmat tat, đei tơdrong vă jang đơ̆ng tĕh đak pơjao tĕh, pơjao bri ăn kon pơlei jang sa, roi năr roi jang sa erĭh sa sơđơ̆ng. Jĭ bơngai KơTu kơna hơdrin chă pơrô̆ hơvơn kon pơlei vang chă pơtăm ‘long bri, pă đei ŭnh hnam dơnŭh, pơngot rơvĕt. Lơ̆m sơnăm ‘nao ŭnh hnam tơplĭh pơtăm bri tĭh, ‘long đunh sơnăm”

Mư̆h đei kon jên pơđom, ‘nhŏng Nguyễn Văn Lâm pơtăm ‘long bri tĭh tơplĭh ăn ‘long keo kŏh tĕch hrôih

Dang ei, vă jê̆ 200 ŭnh hnam kon pơlei KơTu oei tơ̆ tơring Hoà Bắc đei tơdrong erĭh sa sơđơ̆ng gơnơm đơ̆ng pơtăm ‘long bri.Bơngai KơTu tơ̆ au pă đei muih rŏh kŏh ‘long vă pơm mir bơih, băt pơm pơdrŏng đơ̆ng groi tĕh kơ dĭh. ‘Nhŏng Nguyễn Văn Lâm, oei tơ̆ tơring Hoà Bắc tơbăt, mư̆h đei chă pơđom kon jên, tơdrong erĭh sa sơđơ̆ng ƀiơ̆ ‘nŏh ŭnh hnam jei tơplĭh đơ̆ng pơtăm ‘long keo kơ đeh khei ‘năr na vă pơtăm ‘long bri tĭh đunh sơnăm.“Hrei au, ‘long bri blŭh vơ̆ tôch kơ ‘lơ̆ng, mĭnh ƀar ŭnh hnam hlôi kŏh tĕch iŏk đei vă jê̆ 300 trĭu hlak jên, jei đei tăh sa, chă pơkom mơ̆n. Tơjê̆ au đei trong tơlĕch jang pơtrŭt kon pơlei pơtăm ‘long bri tĭh, pơjing rơvơn ăn kon pơlei jang sa iŏk yua kơ jăp hlŏh dơ̆ng pơtêng hăm pơtăm ‘long keo. Pơtăm ‘long bri tĭh ‘nŏh đei iŏk yua kơ jăp hlŏh dơ̆ng.”

Pơlei tơm Đà Nẵng hlôi pơjing lơ trong jang tơgŭm djru, pơtrŭt kon pơlei pơtăm ‘long bri tĭh

Apŭng Hoà Vang, pơlei tơm Đà Nẵng đei hlŏh 17.000ha tĕh bri jang sa. ‘Ngoăih tơdrong tơgum djru đơ̆ng Tĕh đak, khŭl kơdră tơring ling lang pơjing rơvơn păng tơgŭm djru vă kon pơlei đei rơvơn jang sa. Lơ ŭnh hnam đei tŏk iŏk kon jên hăm jên chĕh tŏ sĕt vă pơtăm ‘long bri, tơdrong erĭh sa kơ kon pơlei hlôi tơplĭh hơdăh. Mĭnh pơyan kŏh tĕch ‘long keo, đei ŭnh hnam iŏk đei đơ̆g 200 trŭh 400 trĭu hlak jên. Ƀok Hồ Phú Thanh, Kơ iĕng Kơdră chĕp pơgơ̆r tơring Hòa Bắc, apŭng Hoà Vang, pơlei tơm Đà Nẵng tơbăt, đơ̆ng mă đei pơjao ăn tĕh, pơjao bri đơ̆ng Tĕh đak, kon pơlei sơng iŏk tĕh, hơdrin pơtăm ‘long bri:“Đơ̆ng mă kon pơlei tơplĭh tĕh jang mir ƀa vă pơtăm ‘long keo trŭh dang ei lơ ŭnh hnam hlôi yak hlŏh dơnŭh hin păng mă kăl đei ŭnh hnam hlôi đei pơdrŏng. Mĭnh ƀar ŭnh hnam kon pơlei hlôi tơplĭh ‘long keo vă pơtăm ‘long tĭh, kơdră tơring hlôi đei trong tơgŭm ăn kon pơlei vă tơmơ̆t jên jang pơtăm ‘long bri tĭh.”

‘Nao au, Dơnŏ anĭh vei lăng kon pơlei kơ pơlei tơm Đà Nẵng pơjing trong jang tơgŭm djru, pơtrŭt kon pơlei pơtăm ‘long bri tĭh.Hrei au, hlôi đei 41 khŭl, ŭnh hnam chĭh hơnăn apĭnh vang pơtăm ‘long bri tĭh hăm hơgăt tĕh pơtăm vă jê̆ 800 ha. Ƀok Trần Viết Phương, Kơ iĕng Kơdră chĕp pơgơ̆r Dơnŏ anĭh vei lăng Chŏh jang sa păng Atŏk tơ iung tơring tơrang pơlei tơm Đà Nẵng tơbăt: Vă tơdrong jang tơgŭm ăn pơtăm ‘long bri tĭh đei trŭh hăm kon pơlei păng trŏ ƀlep hăm trong tơlĕch jang, Dơnŏ anĭh au hlôi apĭnh athei Dơnŏ anĭh vei lăng kon pơlei kơ pơlei tơm drơ̆ng nơ̆r trong jang tơgŭm djru lơ ‘măng. Kiơ̆ kơ ‘nŏh, ‘măng mă 1, pơlei tơm ‘măn ăn 5 ti hlak jên tơgŭm ăn kon pơlei pơtăm ‘long bri tĭh.“Jang kiơ̆ Tơdrong tơchơ̆t 254 đơ̆ng Jơnŭm vei lăng kon pơlei kơ pơlei tơm găh trong jang tơgŭm djru pơtăm ‘long bri tĭh lơ̆m pơlei tơm Đà Nẵng. Lơ̆m ‘măng mă au pơjing trong vă jang vă pơtrŭh ăn Dơnŏ anĭh vei lăng kon pơlei kĭ tơchơ̆t tơgŭm djru ‘măng mă 1, pơtăm ‘nao 12 trĭu hlak jên lơ̆m 1hek tar, pơtăm tơplĭh ‘nao 8 trĭu hlak jên lơ̆m 1hek tar. Sơ̆ dang 4 trŭh 5 sơnăm kŏh tĕch minh ‘măng, dang ei pơtăm ‘long tih dang 10 sơnăm mă gơ̆h kŏh tĕch kơna tơdrong đei iŏk yua rŏ năng hlŏh pơđăm ‘măng.”.

Bơngai chĭh đơ̆ng: VOV Miền Trung

Tơblơ̆ nơ̆r: Amazưt