VOV4.Bahnar - Pơgê năr 1/4, tơdrong kơtơ̆ng ang đơ̆ng Hơnĭh vei lăng Rong kon tơrong păng jang pơgang vei lăng kon tơrong dêh char Kon Tum tơbăt, pơrang jĭ toi kon kơlap H5N1 đei ƀô̆h tơ̆ mĭnh ŭnh hnam rong kon kơlap Phạm Thị Thủy, oei tơ̆ tô 1, phương Ngô Mây, pơlei tơm Kon Tum.

Rôp akom bip năm pơlôch hŭt

Lăp đơ̆ng rŏng pơtôch khăm hơlen đơ̆ng Hơnĭh jang pơgang vei lăng kon tơrong tơring V, drung kơsơ̆ năr 31/3, Hơnĭh vei lăng Rong kon tơrong păng Jang pơgang vei lăng kon tơrong dêh char Kon Tum, Dơnŏ anĭh tĕch mơdro tơmam drăm chŏh jang sa pơlei tơm Kon Tum păng Dơnŏ anĭh vei lăng kon pơlei phương Ngô Mây hlôi iung jang dăr lăng păng tơgŭm djru ŭnh hnam yă Thủy pơlôch hŭt kon kơlap hăm akŏp đei 1.700 tŏ iĕr, bip. Akŏp hiong răm trŭh 100 trĭu hlak jên. ‘Nau hơnĭh jĭ hơbŭh iĕr toi H5N1 mă blŭng đei Hơnĭh vei lăng Rong kon tơrong păng Jang pơgang vei lăng kon tơrong dêh char Kon Tum ƀô̆h jô̆ đơ̆ng sơnăm 2021 trŭh dang ei.

Tơblơ̆ nơ̆r: Amazưt